- إن راح منك يا عين هيروح من قلبي فين ؟
- يا رحمه.
- دا القلب يحب مرة ميحبش مرتين.
- يا ست شادية.
- زن..زن..زن أية في أية ؟
- عاوز اروح.
- هو انا ماسكاك ؟
- ومين هيوصلك؟
- أنت.
- يا ولي الصابرين.
- ما تهمد ما عم المستعجل، أنت مش شايف الجو بيقول أية ؟
- بيقول أية ؟
- بيقول : مقدرش محبكشي وحياتك مقدرشي.
- تاني.
- في ايديك قوة تهد جبال في ايدك قوة، وعليك صبر وطوله بال...
- رحمه.
غمزت - وعينيك حلوة.
شد الهاند فري من ودني ووقف.
- كدا انت جامد يعني ؟ مانا حافظاها.
- أنا عاوز اروح يا رحمة.
- روح يا زين، روح، أنا هقعد شوية دلوقتي...
- لكن ...
- متحاولش تمثل إنك خايف عليا.
- بس انا خايف عليكي فعلا.
- فعلا؟ طب لحقت تكوي بدلتك علشان تحضر خطوبتك بكرا ولا كالعادة نسيت.
-...
- لسه بدري، أنا شوية ومروحة، شوف طريقك يلا، وافتكر أن السؤال حتى بعد النهاردة مش من حقك.
- بقيتي قاسية بشكل!
ضحكت بسخرية وحطيت الهاند فري وغنيت من تاني.
- في ايديك قوة تهد جبال في ايدك قوة، وعليك صبر وطولة بال وعينيك حلوة.
بصلي لآخر مرة ومشي، نظرتي رقت وصوتي رق وغلب عليه الحزن وانا ببص لخياله الي قرب يختفي في ضلمة الليل.
- دا القلب يحب مرة ميحبش مرتين.
ميحبش مرتين.
ميحبش..
مرتين.
#رحمة_طارق.
