- قولتله إني مبكلمهوش راح قالي طيب وقام مشوح بإيده كدا ال يعني مش هامه
- الكلام ده كان امتى؟
- النهاردة
- بس! يبقى بيخونك
- وقالي وإنتِ من أهله بدل من أهلي ، وعملت ايموشن النكد ده، ولا عمل أى تأثير
- اللي بيخونك معاها عجبته فبقيتي في قائمة الاختيارات البديلة
- كنا بنلعب بنك الحظ ف لما حدف النرد جه على رقم ٣
- ده عدد اللي بيخونك معاهم ..ومش بعيد يكون متجوزهم
- يعني ميمشيش معاكِ إنه صدفة؟
- شششش ، متبرريش للراجل لإنه بذات نفسه خام التبرير ، هتلاقيه رصلك دلوقتي شوية حجج على ربع كيلو أعذار وهيلففك حوالين نفسك وهيطلعك غلطانة
- يبقى ألحق الليلة من أولها وأنكد عليه الأول
- ششششش سيبيه
- ولو ولو أنكد الاول
- أول ما يرد رصيله الكلام رص ومتديهوش فرصة يرد ولا يدافع عن نفسه
الصحاب في الوقت ده بينفعوا اوي ، وبتظهر روح التعاون والخوف والأخلاق ومحمد صلاح، يعني مثلا! لو كلمتِ صاحبتك وقولتلها اتخانقتي إنتِ وزوجك ف تاني يوم هتطلقكم ، اه اومال انتِ فاكرة الموضوع بالصعوبة دي؟ ..قولتِ لصحابك إنك بتفكري في الانتحار ف هيرموكِ من فوق المقطم بحيث يسهلولك الموضوع
مسكت التليفون ورنيت عليه ورد من أول مرة ..طبعًا ما هو خاين ، مش هيبقى خاين وبجح
- ال.......
- من غير لف وحكاوي كتيرة ، إنت خاين وهتفضل طول عمرك خاين ومتبررش ولا تروح يمين وشمال ، عرفاك وهجيبك! وهنزلك من الحنفية وأفكرك إنك خاين
- في ايه؟
- ايه الليى في ايه؟ هيكون في ايه يعني؟ هتبلى عليك؟ هكدب؟
- مش فاهم
بعدت التليفون عني وبصيت لشهد
- ده بيسأل في ايه ومغير صوته؟
- ال يعني ناسي ومش هامه أمرك وزعلك ..قدميله النكد مغلف بشريط هدايا
حطيت التليفون على ودني ورديت عليه
- خد مني النكد ده بقى
- نكد ايه؟
- أنا مش اتصلت عليك وقولتلك مبكلمكش قولتلي طيب؟
- لأ
- كدابة أنا يعني؟
- والله ما حصل
- محصلش في الحقيقة اه لكن حصل في عقلي ، أنا تخيلت رد فعلك وطلع ده
-..............
- وكمان مبتردش؟ اه ما إنت مش لاقي رد للي عملته ، شوفت آخرة الخيانة شوفت؟
- حضرتك المكالمة دي متسجلة! فأنا هشوف إنتِ مين وهتصرف
- حضرتي! على أساس إنك لما تغير صوتك لدكتور الEnglish مش هعرفك! تصدق وتؤمن بالله! إنت وهو فصيلة واحدة! يا خاين ياللي الخيانة بتجري في عروقك مجرى الدم
- وماله دكتور الEnglish؟
- هيكون ماله؟ مبنفهمش منه وبنقضي المحاضرة أنا وشهد أحمد وشروق وأسماء عبدالرحمن محمد عامر نور الدين رغى وأكل وبنخصص محاضرته ك وقت فراغ نتابع فيه أخبار المجتمع
-اممم شهد أحمد وأسماء عبد الرحمن محمد وشروق؟ اسمك ايه إنتِ بقى؟
- وكمان نسيت اسمي يا برجوازي ياأبو راس بجعة
- هايل هايل
سكتّ شوية وبعدت التليفون أستوعب وبعدين بصيت لشهد
- ده مش عايز يرجع لصوته الطبيعي ومصمم إنه يقلد دكتور الEnglish !
شهد علت صوتها - أنا شهد أحمد يا خاين ، عرفاك وهجيبك في شوال..اخص على صلة القرابة اللي بينا اييييخص
- تمام تعالوا بكرا عند مكتبي
قربت التليفون مني واتكلمت - لا يا بابا لو فاكر إني إتساهلت ومضيت على العقد ف انا لا يمكن أروحلك شغلك ولا أقف معاك في مكان ! ايه عايزهم يقولوا شوف المتجوزين واقفين مع بعض أهم؟ أنا هصعد الأمور لماما وبابا وناهد وكلهم
- مكتب دكتور محاضرة الترفيه
رفعت حواجبي وبلعت ريئي بالبطئ - ايه!
- إنتِ وأسماء وشهد وشروق
بعدت التليفون ونورت الشاشة وركزت في الاسم ، التليفون وقع مني على الأرض وصرخت
- يااانهااار
- في ايه؟
بصيت لشهد - اتصلت على دكتور الenglish عشان هو وخطيبي نفس الاسم بس ده قبله dr
- ايه الdr ده؟
- اختصار دكتور و.....إحنا في ايه ولا في ايه ؟
بصيت على التليفون في الأرض ونسيت إني مقفلتهوش ، مسكته واتكلمت تاني
- انا اسمي الحقيقي زينب ههه كنت بهزر معاك يا دكتور ..إنت في برنامج عمل إنساني ، بنشوف رد فعل الدكاترة
- على مكتبي بكرا الساعة ٩ وبإذن الله تنورونا السنة الجاية في نفس المادة
- يا.........
طب قبل ما أعك الدنيا نبهني إنك الدكتور
قفل هو وملحقتش أكمل كلامي ، يعني طب استنى! والله كنت هنكد عليه هو ..انتوا ازاى تتهجموا على الناس في مكلماتها كدا ؟
- شيلنا المادة صح؟
- صح
#ميار_طلعت
