-معتصم ابن عمك هيخطب
قالتها ماما وسابتني ..قالتها وانا حسيت ان الدنيا كلها بتلف وقعدت ع الارض محستش بدموعي اللي غرقت وشي ..اللي حسيت بيه وجع قلبي ،الشكه اللي جت فجأة ،مش قادرة اخد نفسي ،مش عارفه ابطل عياط..
معتصم هيخطب!؟..خلاص هيخطبها
انا ليه متفاجأة ،انا كنت عارفه م الاول انه اكيد هيخطبها ،عارفه انه بيحبها،انا بنفسي شاهدة علي حبهم ده
معتصم كان بيقف بالساعات في البلكونة يستناها وهي راجعة من الكلية ،وانا كنت اقف ف بلكونتنا فوق اراقبه وهو مستنيها
انا عارفه ان معتصم بيحبها ،بس انا بحبه ..بحبه من قبل ما يعرفها حتي !
قومت بسرعة اتوضيت وانا ببكي ،مكونتش عارفه المياه دي م البكا ولا الوضوء!
-ياارب انا بحبه يارب ..ياربي انت عالم انا بحبه قد اي صح؟..انا عاوزاه يكون فرحان وبس ..حتي لو مع حد تاني غيري بس يكون فرحان وسعيد ،يارب انا دعيت كتير انه لو مش نصيبي تخرجه من قلبي وتشفيني من حبه ..انا لسه بحبه يارب ،انا لسه عيانة بيه ،هيخطب اهو !،والله ما بعترض ع قضائك بس انا تعبانة وقلبي واجعني ..هنا يارب ،هنا في حاجة هتموتني ،يارب صبرني يارب ،هيخطب اهو يارب سامعني ،اشفيني ياحبيبي اشفيني منه
.....
-ندي ..ندي اصحي ياندي
_نعم ياماما
-انتي نعستي وانتي بتصلي ياحبيبتي ،قومي نامي ع سريرك يلا
_حاضر ياماما حاضر
ماما خرجت وقفلت الباب ،قومت فتحت البلكونة وبصيت ع بلكونة اوضته ،كان واقف زي ما توقعت وبيتكلم في الفون ..
-تابلت ..حاضر يا اية عيوني
-ياستي ،انتي بس تؤمريني -ياست البنات وانا انفذ والله
-هو انا عندي كام اية بس !
-انا مش متخيل ان حلمي بيتحقق يا اية ..ربنا يعدي بكره ع خير وابوكي يوافق بقي !
سمعت كلامه ،كان بيكلمها ،بيضحك.. وفرحان،انا عاوزه اي اكتر من اني اسمع ضحكته دي بس ..حلمه بيتحقق ،بصيت للسما وقولت ياارب
دخلت ونمت ..
.......
-رفضوه!!تااني؟،ازاي ياماما ،رفضوه كمان ؟فهميني!
_باباها بيتنك عليه وبيتآمر ،وزي مانتي عارفه قال عاوز يجوز بنته ف مستوي اعلي منه هو شخصياً ومعتصم مش هيقدر يحققلها طلباتها الكتير و..كل شئ قسمة ونصيب ،وكمان ابن صاحبه ف الشغل كلمه وهو وافق
-طب..طب ومعتصم ياماما ..معتصم عامل اي دلوقتي ،ده حلمه!
_والله يابنتي مرات عمك هاله بتقول مش راضي يخرج من اوضته ولا حابب يكلم حد وعمك تعب معاه حتي
-ط..طب اية ،اية وافقت ياماما ع التاني ده ؟ ،ده هي ومعتصم بيحبوا بعض
_ابوها بيقول وافقت ،واهو اول امبارح كانوا بيجيبوا الدهب والست هانم كانت الضحكة مالية وشها ولا الارض شايلاها ..يلا ربنا يهنيها بعيد عنا
-انا عاوزه انزل اشوف معتصم ياماما
_تنزلي فين ياندي ،ده مش طايق يشوف حد
-علشان خاطري ياماما ..هعمل اللي عليا ع الاقل
_اممم،ماشي يابنتي روحي ،ربنا يريح قلبك
....
نزلت ،نزلت وانا اصلا مش عارفه هقوله اي ،او هتكلم معاه ازاي ..!،من بعد فترة طويلة ييجي اكتر م سنة ،كنا صحاب اوي ،اوي كمان .. في اعدادي انا كنت اصغر منه بسنتين ،وكنت ملازماه ف كل مكان زي ضله ..
......
-معتصم ياا معتصم
_ياادماغي!!،عاوزه اي يابنتي ،زهقتيني
-بالله عليك تجبلي الوردة دي مش طايلاها
_تجبلي الوردة دي مش طايلاها ..يي يي يي ،اموت واعرف اي سر حبك للورد ده ،اي بتاكليه !
-علشان خاطري علشان خاطري ،طب بص لو جبتها هعملك اللي انت عاوزه
_اللي انا عاوزه ..اممم ،بما ان بابا بيحبك اكتر مني ،فانا هستغلك وتقنعيه يوافق اطلع الرحلة
-ماشي ماشي ،هاتها يلا..
_اهي ياستي ..والله المفروض نسميكي ورد مش ندي
-شكراً يا معتصم ،والله انت احسن حد في الكون ده كله
....
خبط ع بابهم..فتحتلي طنط هالة ،مامت معتصم
-ندي ..تعالي ياحببتي ادخلي
_ازيك ياطنط عامله اي،ااا..ومعتصم عامل اي ؟
_والله يابنتي قافل ع نفسه ومش طايق حد ولا بياكل ولا بيشرب ومقطع قلبي ...
-مين ياهاالة؟
_دي ندي يا ماهر
_اهلا اهلا بزينة البنات ،وانا اقول البيت منور لي
-اكيد هيبقي منور يا ميمو مش الحج ماهر فيه .
_ههههه ،دايماً غالباني كده ..الا صح ،في حاجه ولا اي؟
-لا ده انا جايه اا لمعتصم اشوفه يعني و ..
_اهو عندك ياندي جوه ،والله هو اللي تاعب نفسه تالت مره يترفض ولسه مصمم
_الله يريح قلبه..انا هروح اشوفه ،بعد اذنك
...
خبط ع بابا اوضته وانا برجف ،انا مكسوفة وخايفة ومتوترة..انا ازاي جاتلي الجرأة اجيله بس
فتح وبصلي
-ندي!!
_ااا..ازيك يا معتصم ..،هو انا كنت جايه يعني..اا ..علشان..
-تعالي نقعد في التراس..
دخلنا التراس
التراس بتاع معتصم واخد جزء كبير من اوضته ..معتصم غاوي تربية عصافير ..التراس تقريبا مليان اقفاص عصافير وياما طيرتهملوا واحنا صغار
-عامل اي يامعتصم؟
_اتخطبت ياندي
-هاا
_3سنين ياندي ..3سنين بحاول ابقي انسان يشرفها بشتغل بكل طاقتي علشان اتقدملها وتبقي حلالي..كانت..كانت دايماً تقولي مش هسيبك ،و..وانا معاك ،اتقدمت 3 مرات واترفضت ..بقاوح وادوس ع كرامتي علشانها علشان اوصلها وفي الاخر ،اتخطبت ياندي اتخطبت وسابتني .
مكونتش عارفه اقوله اي ،كنت بعيط وبس ..بعيط علي عياطه ،معتصم بيعيط؟؟
نفسي احضنه ،اقوله انا هنا معاه ،عمري ما هسيبك والله ..انا هنا اهو انت مش لوحدك ،متبكيش ،مينفعش انت تبكي يامعتصم ..
بس لساني كان اتربط ،منطقتش بحرف ،ولا حرف واحد
رفع راسه وبصلي لقاني بعيط ..
-بتعيطي ليه؟
_ماانت بتعيط !
-تقومي تعيطي؟!!
_يعني اسيبك تعيط لوحدك؟
رفع حاجبه وراح مبتسم وبص علي الشارع وراح باصصلي تاني
-كنتي بتقفي في البلكونة بالليل لي؟
_ها ..انت عرفت ازاي؟
-ظلك..كنت بشوف ظلك
قطع كلامنا صوت طنط هالة
-جبتلكوا قهوة اهو ،عارفه انكوا بتحبوها
في صوت واحد انا ومعتصم ردينا عليها
_مظبوط؟
وضحكنا ..
-ياااه ،بقالي كتير مشوفتكش بتضحك كده يابني ،انتي عملتيله اي يا ندي؟
_انا..!!،والله ما عملتله حاجه ،انتي ولداه كده ياحجة !
-هتتغدوا بقي اجيب الاكل ؟
_ياختااي ،انا سبقتكم وكلت والله
- معتصم مكلش لسه ،ده مش راضي...
_ها..،يلا ياطنط هاله هاتي الغدا يلا ،اهو الواحد يزود عادي
....
فات 6شهور وانا ومعتصم بقينا ع طول مع بعض ،رايحين الكلية ،او راجعين منها مع بعض
كنا راجعين من الكلية في يوم ..بننزل م التاكس لمحت اية وخطيبها جايين م اول الشارع بعربيته ..كانت بتضحك وفرحانة اوي وبتهزر معاه ،كانت من غير حجاب !!،اية قلعت الحجاب؟؟
لفيت لمعتصم لقيته واقف بيبصلهم ومتنح ..عينه لمعت فيها الدموع..قلبي وجعني اوي معتصم بيحبها يارب!
....
-ياارب هو بيحبها ياارب ،يارب لو هي شر ابعدها عنه واشفيه من حبها يارب ياارب ،انا بحبه يارب ..يارب انا قلبي بيحبه والله غصب عني قلبي مربوط بيه ياارب ياارب
...
-عمك طلب ايدك لمعتصم
_نعم؟؟،معتصم مين ؟
-ههههه ،اي يابنتي هي الصدمة لحست نفوخك ..معتصم ياندي ،ابن عمك
-ازاي ؟،و..ومعتصم موافق !!
_والله اكيد ابوه مش غاصبه يعني ،هيطلع يقعد معاكي بكره
-لا لا ..مش يطلع ،انا هصلي استخارة وارد عليكي ..
سبت ماما وجريت عالبلكونة بصيت ع بلكونته ،لقيته واقف ..وفجأة راح بااصص لفوق ،عيني جت في عينه قلبي اتنفض،ورجعت لورا بسرعة ..بصيت تاني لقيته مبتسم..روحت جاريه ع جوه اتوضيت وصليت
-ياارب ،معتصم عاوزني انا ياارب ًانا مش مصدقة ..يعني هو بيحبني يااربي ،بس هو زعل لما شاف اية وخطيبها ..يبقي لسه بيحبها ،طب ..طب عاوزني ليه ؟ يارب قلبي يارب ..
.....
-موافقة ياماما
....
-ها ياندي ، عمك والمأذون معتصم هيطلعوا كمان نص ساعة اجهزي ..
بقالي 3ساعات واقفة قدام المراية ،مش عارفه البس اي !،مش عاجبني حاجه ،النهاردة كتب الكتاب ..مش عارفه انا وافقت ازاي ،بس انا كنت فرحانة..صليت وارتحت ووافقت ..
اخيراً استقريت ..
لبست دريس لونه ازرق فاتح مليان ورد وخمار بلون الورد ..
-يلا ياندي اطلعي
خرجت وانا مكسوفة ،لا لا ده انا هموت كسوف ،انا بحلم!!،خمس سنين دعاء ربنا استجاب ،خلاص هيبقي حلالي ..
كان معتصم باصصلي ومبتسم اووي ،وكان شكله حلوو اوي
فوقت من دنيتي علي صوت المأذون
"بارك الله لكما وعليكما وجمع بينكما ف خير "
لقيت عمي قرب مني وهمس ف ودني ..
"الواد ده لو زعلك ،انا اللي هفرمهولك..انا ابوكي انتي مش ابوه"
من وقت موت بابا الله يرحمه واعمي معوضني عنه..ولا مره حسسني اني مش بنته
وخرجوا وسابونا لوحدنا ،وكنت قاعده باصه ف الارض..خايفه ارفع عيني حتي
-مبارك
_شكراً
-لسه بتحبي الورد!
_هااا،رفعت عيني لقيته ماسك بوكية ورد ..قام من مكانه وقعد جمبي ..كان بينا ولا حاجه ،جسمي رجف
-ورد كتير اهو كُليه كله بقي
اخدته بسرعة منه ،معرفش ازاي نتشته وحضنت البوكية جامد .
ضحك جامد وبصلي
-مش بقول نسميكي ورد.
_بحبه بقي اعمل اي
قرب مني جامد وهمس
-وهو كمان بيحبك .
-هوو..احم ..هو انت زعلت لي لما شوفت اية وخطيبها ..
_انا مزعلتش عليها ..انا زعلت ع نفسي ،لاني ف يوم كنت فاكر اني بحب البني ادمه دي ..مش عارف ازاي كنت اعمي بس ومببصش فوق ،كنت جاهل ،وببص تحت رجلي ومش شايف القمر اللي في سمايا ،اما البلكونة بتاعتكوا بيطلع فيها حتة قمر بالليل انما اي
-اتلم..،و.انت ..انت بتقرب كده ليه ياا..
همس بصوت واطي "بحبك يا حلالي " راح حاضني ..وسكت ،سكت وحسيت اني تايهه جواه ،انا مش عاوزه اخرج من جوا حضنه ده
،خايفه يكون حلم واصحي..تبت فيه جامد..محستش بنفسي غير وانا بقول وانا بحبك ..كنت بقولها جوايا بس خرجت بصوت اتكسفت وبعدت عنه ،كنت بيعيط..بيعيط من الفرحة..هي دي بقي دموع الفرحة؟
معتصم بصلي ولقيته عيط
دي تاني مره اشوف معتصم بيعيط ..بس المرة دي كان بيضحك وهو بيعيط ..مقدرتش امنع نفسي لما شوفت دموعه ..بصيتله باستغراب
-بتعيط ليه؟!
_مانتي بتعيطي !
-تقوم تعيط؟؟!!
_يعني اسيبك تعيطي لوحدك!!
#ندى_سلامة
#حكاوي_ندى_سلامة.
