-إتصالحت إنت وهى إمبارح؟
- اه كله زي الفل ياخيارة
- ما تبطل الاسم ده ياسطا وأنا مش هقول للبنت على بلاويك ولا صورك وإنت صغير
بص في الأرض وبعدين بصلي - إنتِ وافقتِ على سعيد؟
-اه وهنعمل خطوبة كمان
- اه
إبتسمت عشان معيطش -هو ايه اللي اه ياسيف ؟
- أقصد مبروك يعني
-ماشي
-هو ايه اللي ماشي
-أقصد الله يبارك فيك يعني
( خوفت نقرب من بعض ف أخسره ، وهو قريبي كده أفضل ، دايما بشوف العلاقات وهى من بعيد بتنور ومبهرة ،عكس ما بنقرب تمامًا ..أوقات كل حاجة بتتغير لما بنقرب وبيطلع النور اللي بنشوفه ده نار هتإذينا ، طب أخسره ليه ونتخانق وننكد على بعض ؟ ما إحنا حلوين أهو وبنهزر وبنتكلم والشقة فوق الشقة بالظبط ،يروح يتقدم لبنت تاني ليه بقى ويبوخ كل حاجة؟ شعور إن واحدة تانية ممكن تهزر معاه وتضيع وقته ومنتكلمش ده مضايقني )
- تعرف إن أخوك ده حلوف وبايخ وبارد ومعندهوش دم؟
- حصل
- يا أحمد مبهزرش والله
- عايزاني أقول ايه وأقوله ؟
- هى البنت اللي أخوك هيخطبها دي اسمها ايه؟
( مرضتش أقول اسمه وقولت أخوك ك دليل عنيف إني زعلانة وواخدة على خاطري يعني)
- أخو مين؟
- سيف يا أحمد
- أخويا أنا هيخطب؟
كتفت إيدي قدامي ورفعت حاجبي - والله!
- اه اه افتكرت ، اسمها زى بقية البنات عادي
- هو قالي إن اسمها مروة
- اه مروة
ضيقت عيني وقربت منه - ولا أنا شاكة فيك يالا!
- عيب عليكِ والله ده أنا بتهزأ عشانك
- طب هو هيخطب ليه؟
- عشان يكمل حياته
- يعني كان هيموت من غيرها ؟ ايه الرخامة دي
- وإنتِ كنتِ هتموتِ من غير سعيد ده!
- ملكش دعوة
- طب هو سعيد فعلا ولا أوقات بيبقى حزين؟
مضحكتش وضربته في كتفه - خفة دمك دي تبطلها
- حددتوا الخطوبة؟
- معرفش
-نعم؟
- أقصد هنحددها يعني لسه معرفش الميعاد
- ه مش مفروض احنا قرايب ؟ محدش عزمنا ليه؟
- لسه متحددتش يا أحمد
- طب وريني صورته
- مش معايا ..آخد صورته أعمل بيها ايه ؟
- هتشتحتي بيها ..(سكت شوية وكمل) - هتكوني هتعملي بيها ايه يعني
- أحمد ! يا تسكت يا تطلع برا
- طالع برا تدري ليش؟ لإني مش هسكت
مفروض أنزل من البيت دلوقتي لإنه جاى ، ووقت ما بييجي بيروح يسلم على مامته وبينزل يقعد معانا تحت ، وأنا مش حابة أقابله
لبست ووقفت قدام المراية أعدل الطرحة ، تليفوني رن ففتحت علاطول لإني عارفة إنه هو ..ومش بيبطل يتصل من وقت ما عرف إني هوافق على سعيد
- إنتِ في البيت؟
- لأ نازلة أشتري حاجات
- متنزليش لوحدك ، أنا جاى ونروح مع بعض
- متأخرة والله ياسيف ، مش هينفع
- ٥ دقائق وهوصل
- هتأخر بقولك ، وبعدين هاخد أحمد معايا ( سكت شوية وكملت بعصبية ) - واقفل لتكون مروة بترن عليك ولا حاجة
- مروة!
- اه مروة خطيبتك ..اللي هتكون زوجتك عارفها؟
- اه هروح أكلمها لأحسن أكون معطلك عن مكالمة سعيد بردو
قفلت التليفون ورميته على السرير ونفخت بصوت عالي
معرفش ليه صدق وقت ما قولتله إني عمري ما هفكر فيه ك زوج ،والله كنت بهزر زى ما بهزر معاه دايمًا ، ليه صدق كلامي المرة دي وهو عارف إني بهزر؟
نزلت من غير ما أعرف أنا نازلة ورايحة فين
- لفينا الشارع ييجي أربع مرات ، قولي عايزة ايه بس وأنا أجيبهولك
- مش عايزة حاجة يا أحمد
- نعم ياروحي؟
ابتسمت - يلا نروح
- حسبي الله في دي عيلة والله ، أنا ايه الللي خلاني أتولد في مصر
ضحكت - ما خلاص يا احمد
