- ياستي أية يزعلك وانا اعمله ؟
- لا أنا.. لحظة الجملة دي معكوسة !
- لا هي صح كدا، انا مش عارف ازعلك ازاي بجد !
- وتزعلني لية يابيبي؟ ربنا مايجيب زعل
- يعني انتي مبتزعليش خالص؟ مفيش مرة اتعصبتي ؟ مفيش حاجة بتضايقك في الحياة ؟
- اكيد فيه
- أيوة أية هي بقي ؟
ابتسمت - مانا نسيت، اصلي بشوفك بنسي كل الي بيزعلني وافضل مبتسمة كدا، شفت مبتسمة ازاي
- ابتسامتك وحشة
- طب انت اعمي ياروحي، انا ذنبي أية ؟
- ياالله ! يابنتي مش كدا ؟
- شفت، شفت بتقول بنتي ازاي ! يعني بتشوفني بنوتك
كفاية حب بقي هيغمي عليا والله
- ياشيخة بقي مش كدا والله.
الباشا يتمني يسبني، فاكرني هبلة وهقوله بالسلامة وكرامتي وقلبي وعقلي دول هينفعوني لما يخطب زينب ويحرق دمي ؟ وانا اربي فيه وفي الاخر اسيبه وكمان في العيد !
انا هاخد العيدية يعني هاخد العيدية
- بصي يارحمة انتي أكيد متفهمة الموقف
- طبعا مُتفهمة ومقدرة كمان
- طب ما ها بقي
- ها اية؟ لو عاوز تدخل الحمام اتفضل علي ايدك اليمين انت مش غريب
- حمام أية بس، قصدي يعني كل شئ قسمة ونصيب
- اه طبعا عارفة أن كل شئ قسمة ونصيب ومقدر ومكتوب واحنا نقدر نقول غير كدا
شهقت فجأة - ولا انت مش مؤمن بكدا ؟
- استغفر الله العظيم، طبعا مؤمن في اية ؟
- لا إله إلا الله، دي عين والله عين
- امي دايما تقول كدا
- ماما دي حبيبتي، انت بتشغل سورة البقرة قبل النوم ؟
- اه بشغلها، وهي كمان بتح... ماما أية دلوقتي ؟ يارحمة
- ياعيون رحمة
- ها
ابتسمت - ها أية ياحبيبي ؟ عاوز تقول أية ؟
- أحم، عاوز يعني..
- قول ياعيوني قول كل الي نفسك فيه
- ياولي الصابرين، اظبطي يابت كدا متخلنيش اعمل حاجة نندم عليها
- تندم عليها، أنا اندم لا
- يعني مش هتندمي ؟
- وانت مفكر نفسك هتلحق ؟ دي خرجتك هتكون اسرع
- بالله أية دا ! هو الواحد ميعرفش يهزر معاكي
- لا متهزرش، انا بقلب وقلبتي وحشة، خاف مني
- ياعم الشرس، طب ما كل شي قسمة ونصيب
- ماهو أكيد نصيب ياعيوني أومال هيكون أية
- طب بصي، انا كلي عيوب ومش هتستحملي والله
- مين قالك مش هستحمل، جربت ؟ لا ريلي جربت ؟ لما تجرب ابقي اتكلم بقلب جامد
- انا فوضوي
- هنظم حياتك ملكش دعوة
- انا مش هتغير
- انا بحبك كدا، مع انك متتحبش بس يلا
- وجاية علي نفسك لية ؟
- اهو نصيبي كدا هقول أية
- طب ما كل شئ قسمة ونصيب
- وانت نصيبي ياعيوني، احلي نصيب دا ولا أية
- أنا مش بحبك
- أية !!
بلع ريقه - أيوة بصراحة مش بحبك
- كان نفسي اقولك بالسلامة أو اقولك قلبي انكسر أو ربنا يوفقك مع الي هتحبها، بس إن شاء الله ربنا يوفقك معايا
- يابنتي انتي مستوعبة ! بقولك مش بحبك
جبت طبق فشار - هتحبني يابيبي، انا مش مستعجلة علي حاجة، لية السرعة يعني؟ بكرة تحبني وتتمنالي الرضا ارضي
- احبك أية ؟ رضا مين !
- ابن خالتي وصاحبي الانتيم
- اه.. أية ! انتي مصاحبة ولاد ياهانم ؟
- اومال أصاحب بنات ؟
- لا الكلام دا مش عندي، تقطعي علاقتك بيه
- ياوعدي، وأية كمان ؟
- واياكي اشوفك بتتكلمي مع راجل ولا حتي مجرد سلام
- اوعي الحمش أبو دم حامي، اسلم عليك انت وماله
- اه سلمي عليا و... آية دا ؟ ماتصاحبي ولا تولعي حتي
- ساعات بتكون زبالة شوية ، تولع انت ياروحي أن شاءالله
- ومش هتطفيني ؟
- اطفيك بدموعي ؟ اسفة مبعيطش
- طب ماتعيطي
- علشان أية ؟
- علشان خاطري، عيطي واضربيني بالقلم وقوليلي..
قاطعته وكملت - واقولك انت خاين ومش عاوزة اعرفك ولا اشوفك تاني ؟
- بالظبط
- ولية الفرهدة دي ؟ عاوز تمشي أمشي
- امشي ؟
- امشي
- امشي بجد ؟
- أية أمشي بجد دي ! عاوز تمشي امشي
- ماشي سلا...
- بس متنساش وصل الأمانة القمرز الي مضيت عليه يابيبي
- ها.. لا لا قلبك ابيض أمشي أية بس
- لا امشي، اقولك انا زهقت منك اصلا ومبحبكش
- أية !
- أيوة بصراحة مش بحبك
- بس انا بحبك
- اوكاي، دي يور بروبلم بقي، باي
- لا رحمة استني بس، انا كنت بهزر والله بحبك
- والقسمة والنصيب ؟
- قسمة دي بنت خالتي وماتت محروقة، والنصيب حلو اهو وعيونه خضرا والنسل هيتحسن واخر حلاوة
- باد بوي تمام اوي ، طب وابتسامتي ال..
- القمر ابتسامتك القمر
- القمر برضو ! وماله ، طب والقدر والمكتوب ؟
- طبعا مؤمن بالقدر والمكتوب ولا انتي مش مؤمنه بيهم ؟
- لا طبعا مؤمنه
- اوعي تكوني مش مؤمنة
- لا إله إلا الله، يعني هنكتب الكتاب في العيد ؟
- ان شاء الله و.. أية ؟ نكتب أية !
- يبقي هنكتب في العيد
#رحمة_طارق
