إتخطبت من سنتين لباسم، حب الطفولة ومن شهرين بس خسرته هو وصاحبتي أو بمعني هما اللِ خسروني
كنت متخانقة مع باسم خناقه كبيره، بسبب إنه كان بيشرب سجاير ومكناش عاوزين ندخل ألأهل في
الموضوع يعني كنا حابين نحل المشكلة بينا، إنتهي الموضوع علي إنه مش هيبطلها ولو مش عاجبني نفسخ الخطوبة
قولتله تمام وقفلت وانا منهارة وكنت فاكرة إنُ هيبطلها لوحده عشان نفسه وعشاني ، رنيت علي سارة صحبتي وجاتلي البيت وحكتلها كل اللِ حصل وقولتلها ممكن تتكلمي معاه إنتِ ولو إقتنع هيبطلها ونرجع لبعض تاني أنا عمري مادخلتها بينا بس المرادي فاض بيا
بصتلي بدهشه وقالتلي"انا ؟ لا يعني هو مسمعش للبنت اللِ بيحبها هيسمع مني أنا" قولتلها بس جربي مش هيحصل حاجه سارة صحبتي بقالها خمس سنين وبثق فيها ثقه عمياء إدتلها رقمه قالتلي طيب تمام هروح وابقي أكلمه بلاش أكلمه هنا
مشيت سارة واتطمنت شويه قولت جايز يقتنع أنا برضو صاحبتي قنوعه ، عدا يوم والتاني ومبعتتليش أي مسدچ تطمني فيها إنها عملت حاجة رنيت عليها وسألتها ها ياسارة عملتي اي إقتنع
قالتلي وصوتها متوتر "اهو لسه بتكلم معاه بس دة دماغو نشفه خالص قولتلها طيب أنا جيالك
روحتلها وكانت بتحكيلي بس مكانتش راضيه تديني اشوف الشات ولما أقولها طب وريني عوزة أشوف رد فعله
تقولي أصل الفون هيفصل وتخترع ميت حجة وهي قاعدة معايا قولتلها ممكن تجبيلي مايه أشرب
قالتلي حاضر وحطت تليفونها علي الترابيزة اللِ جمب السرير ، مسكتو كانت عملاله رمز بالإنجلش كتبت اسمها منفعش كتبت تاريخ ميلادها منفعش كتبت اسم باسم واتصدمت إن الرمز دخل مسكت الفون وانا ايدي بتترعش
خوفي يكون حصل اللِ ف دماغي فتحت الواتساب لقيتها مسجلاه el my love دخلت الشات لقيتها بتقوله ياعيني
ياحبيبي دي منهاره فكرتك بجد بتشرب سجاير ماتعرفش إنك اخترعت حجه عارف انها مش هتتقبلها عشان تسيبها
ونتخطب إحنا، شوف أنا مستحملاها بقالي سنتين بس دة عشان خاطر عيونك إنتَ، رد وقالها خلاص ماخلصنا منها
دخلت سارة بكوباية المايه وقالتلي أنتِ بتعملي اي في التليفون بصتلها وعيوني مليانه دموع والفون وقع من إيدي
جريت عليا قالتلي مالك بتعيطي ليه في حاجة ، قولتلها عملتي فيا كدة ليه؟ ليه خدتي مني أعز حاجه لقلبي
"بصت في الأرض ومردتش" سألتها مرة تانيه مردتش سألتها مرة تالته عملتي فيا ليه كدة ياصاحبتي دة انا عشرة عمرك بينا ذكريات وحاجات كتير؟
قامت وقالت بكل زعيق "انتِ متستاهليهوش وبعدين هو إنتِ عوزة تاخدي كل حاجة فلوس ومعاكي، صحاب ومعاكي نجاح واديكي ناجحه عوزة باسم ف اي بقي وبعدين هو كمان باعك وبقي معايا كويس انك عرفتي الحقيقة أنا كدة إستريحت
أنا مدتش أي ردة فعل غير إني إديتها بالقلم علي وشها وطردتني من بيتها ، ومشيت من بيتها والغلط مش غلطها لوحدها الغلط كان منهم الإتنين لما وثقت فيهم ثقه عمياء وهما ببساطه إستعموني ،حسيت وقتها وكإن حد طعني فقلبي بسكينه تلمة معقوله حب عمري وصاحبتي اللِ وثَقت فيها تعمل فيا كدة أروح لمين الوقتي بس أحكيله وجعي !
اتكلمت مع أهلي وحكتلهم اني مش مرتاحة معاه وكده بس مقولتش السبب الحقيقي خوفت من نظرة الشفقه والحزن على حالي اللِ كانت هتتبصلي منهم وانا مش عاوزة اكون البنت الضعيفه قدام حد
دخلت ألأوضه لبست الإسدال وصليت وحكيت ل ربنا علي كل حاجة وشكرته إنه كشفلي الحقيقة بدري عيطت كتير وفضفضتله بينت ضعفي وكسرتي قدامه لإني عارفه إن العلاج عنده هو مش عند البشر وإستكفيت بجملة "ربنا يعوضني عن كل اللِ الوجع حسيته وكل حاجه خسرتها"
سارة جاتلي بعدها بفتره وكانت عوزاني أسامحها وأديها فرصه تانيه وهي مستعدة تسيب باسم ،بس معرفتش أسامحها اللِ عملته كان أصعب من اني اسامحها عليه
تلك المِحنه الذي كشف لك الكثير من حولك لم تَكن صدفة، كان هدية من الله.
لـ سميه خالد
