Special Crime Investigation Journal Of Mystery Book 2 - Completed

Love Murder 3- Unknown Motive

Unicode

ပိုင်ယွိထန်နှင့် ကျန်ကျောက်တို့က SCI အဖွဲ့သားများခေါ်၍ Garden Villa သို့ ရောက်လာကြသည်။ ရဲအရာရှိများက ကြိုးဝါများတားလိုက်သည့်အခါ လူအတော်များများက စိတ်ဝင်တစားနှင့် ဝိုင်းကြည့်နေကြသည်။

သူတို့အားလုံး villa ထဲသို့ လျှောက်လာကြသည်။ အရင်ရောက်နှင့်နေသော မာရှင်းက သူတို့ကို ပြုံးပြ၏။

" wow မာရှင်း ဟုတ်နေပြီကွ.. တစ်ယောက်ထဲ အပြင်တွေဘာတွေ ထွက်လို့ရပြီပေါ့"

မာရှင်းက လည်ပင်းတွင်ဆွဲထားသော တာဝန်ကတ်ပြားကို ဂုဏ်ယူစွာ လှုပ်ယမ်းပြသည်။
" Bao Sir က အရင်အမှုတုန်းက ညီမအလုပ်လုပ်တာ အဆင်ပြေလို့ စောင့်ကြည့်ကာလကို လွှတ်ပေးလိုက်ပြီ ဆရာကုန်းစွန်းကလဲ အသိအမှတ်ပြု လက်မှတ်ထိုးပေးပြီးသွားပြီ ညီမက အခုဆို အလုပ်သင်မဟုတ်တော့ဘူး တရားဝင် မှုခင်းဆရာဝန် ဖြစ်ပြီ"

ကျောက်ဟူက သူ့ဘေးမှာ ရပ်နေတဲ့ မာဟန်ကိို ကြည့်လိုက်သည်။

" အစ်ကိုမာ.. ဒီကောင်မလေး လုပ်နိုင်တာ ကြည့်စမ်းပါဦး တခြားမိန်းကလေးတွေက ပန်းပင်တို့ သစ်ရွက်တို့ သဘောကျတာ သူကျတော့ သက်ရှိတွေကို စိတ်ဝင်စားပုံမရဘူး"

မာဟန်က ခေါင်းခါ၍ မာရှင်းကို မေးလိုက်သည်။
" မင်း အရင်ရောက်တာမလား.. အခြေအနေ ဘယ်လိုရှိလဲ"

" အင်း"
မာရှင်းက မျက်နှာပြန်တည်၍ သက်သေပစ္စည်းထည့်ထားသော အိတ်ကို ကျန်ကျောက်နှင့် ပိုင်ယွိထန်ကို လှမ်းပေးသည်။
" ဒါက အခင်းဖြစ်တဲ့နေရာမှာ တွေ့တာ .. သေဆုံးသူက အသက်သုံးဆယ်ဝန်းကျင် အမျိုးသား.. နှလုံးတည့်တည့်က သေနတ်ဒဏ်ရာနဲ့ သေနေတာ .. အနီးကပ်အပစ်ခံရတဲ့ပုံနဲ့ သေဆုံးချိန်က နှစ်နာရီအတွင်းပဲရှိသေးတယ်"

ကျန်ကျောက်က သက်သေပစ္စည်းကို ယူ၍ ပိုင်ယွိထန်ကို ကြည့်သည်။ ပိုင်ယွိထန်လဲ နှုတ်ခမ်းနီရာကတ်ကြောင့် ​မျက်မှောင်ကြုံ့၏။

" အလောင်းကို ဘယ်သူစတွေ့တာလဲ"
ပိုင်ယွိထန်က မေးလိုက်သည်။

" ဟိုမှာ"
မာရှင်းက အပြာရောင်ပိုးသားစကတ်လေးဝတ်ထားသည့် မိန်းကလေးငယ်လေးကို မေးဆတ်ပြသည်။
" အဲ့ဒီ့ကလေးမလေးပဲ"