Special Crime Investigation Journal Of Mystery Book 2 - Completed

Love Murder 07 - Art Gallery

Unicode

နေ့လည်ပိုင်းတွင် ကျန်ကျောက် ပိုင်ယွိထန် လော့ထျန်နှင့် ပိုင်ချီတို့ Sမြို့တော်၏ အနုပညာပြတိုက်ကို ရောက်လာကြသည်။

S မြို့တော်တွင် အနုပညာပြတိုက် ၃ခုရှိသည်။ တစ်ခုက နိုင်ငံတကာပြတိုက်ဖြစ်ကာ နောက်တစ်ခုက နိုင်ငံတော်ပြတိုက်ဖြစ်၏။ ထိုနှစ်ခုကို S မြို့တော်က ပိုင်ဆိုင်ခြင်းဖြစ်ပြီး နှစ်စဥ်နှစ်တိုင်း အမျိုးအမည်များပြားသည့် အဆင့်အတန်းမြင့် အနုပညာပြပွဲ လုပ်လေ့ရှိသည်။ တတိယတစ်ခုက အနုပညာများကို စုဆောင်းထားသည့် ပြတိုက်ဖြစ်၏။ ကျန်ကျောက်တို့ လာခဲ့သည်မှာ ထိုနေရာဖြစ်သည်။ အစိုးရပိုင်မဟုတ်ပဲ သီးသန့်ပိုင်ဆိုင်မှုတစ်ခုဖြစ်သည့်အတွက် သီးသန့်အနုပညာစုဆောင်းသူများအတွက် တစ်ပတ်တစ်ခါ လေလံပွဲများကို ကျင်းပခဲ့သည်။

သို့သော် S မြို့တော်မှာ အနုပညာအငွေ့အသက်တို့ ပြည့်ဝနေသည့် မြို့တစ်မြို့ဖြစ်ကာ ရှေးဟောင်းကျောက်စိမ်းဆိုင်များ ပန်းချီအရောင်းဆိုင်များ နေရာတိုင်းတွင်ရှိသည်။ တရုတ်ရော အနောက်တိုင်းအငွေ့အသက်ပါ လွှမ်းနေသည့် အနုပညာလက်ရာမျိုးစုံကို လွယ်လင့်တကူ ရရှိနိုင်သည်။

ဆိုင်အသေးလေးများ စုဖွင့်ထားသည့် အနုပညာလမ်းဆိုသည်က ရှိသေးသည်။ ထိုနေရာတွင် ရှေးဟောင်းအနုပညာရှင်တွေရော သူတို့ဖန်တီးထားသည့် အံ့သြစရာ အနုပညာလက်ရာများကို ပြသလေ့ရှိသည်။ S မြို့ထဲကိုပင် ထွက်ခဲသည့် လော့ထျန်မှာ ခပ်လှမ်းလှမ်းမှ ပျားပန်းခတ်အောင် လှုပ်ရှားနေသည့် လူအုပ်ကြီးကိုမြင်တော့ ​အံ့သြနေသည်။
" ဒီနေရာက တော်တော်ကောင်းတာပဲ.. နောက်မှ ယန်ယန်လေးကိုခေါ်ပြီး လာလည်ရမယ်.. သူက အခုတလော ပန်းချီဆွဲတာ ဝါသနာပါနေတာ"

" ဟုတ်လား"
ပိုင်ချီက စိတ်ဝင်တစား ဝင်မေးလိုက်သည်။
" ယန်ယန်က ပန်းချီဆွဲတာ ကြိုက်တာလား"

" အင်း"
လော့ထျန်က ခေါင်းညိတ်ကာ ပိုက်ဆံအိတ်ဖွင့်၍ ပိုင်ချီကိုပြသည်။

ပိုက်ဆံအိတ်ထဲမှ ပုံမှာ လော့ထျန်နှင့် ယန်ယန်တို့ အတူရိုက်ထားခြင်းဖြစ်၏။ ယန်ယန်လေးမှာ လက်ထဲတွင် ဘောင်သွင်းထားသည့် ပန်းချီကားတစ်ချပ်ကို ကိုင်ထားသည်။ ပန်းချီပညာကို သေချာမသိသော်လဲ အရောင်တွဲစပ်ထားပုံက လိုက်ဖက်ညီကာ ကြည့်ကောင်း၏။