Special Crime Investigation Journal Of Mystery Book 2 - Completed

Love Murder 28- ထာဝရနုပျိုခြင်း

Unicode

ရွှီထျန်း၏ မျက်နှာဖုံး ကျွတ်သွားသည့်အခါ ဟိုးအရင်က တွေ့ခဲ့ရသည့် ရွှီထျန်းအတိုင်း သူတို့မြင်လိုက်ရသည်။ အသက်၃၀​ကျော်ပင် ရှိသေးပြီး လော့ထျန်အငယ်နှင့်ပင် တူသေး၏။ သန်သန်မာမာ ထောင်ထောင်မောင်းမောင်းနှင့်ပင်။

ပိုင်ယွိထန်က ကျန်ကျောက်ကို လှမ်းကြည့်သည်။
" မင်း ခုနက ကျန်းရင်းကို ခေါ်လိုက်တာလား"

" အင်း"
ကျန်ကျောက်က ဖုန်းကို ပြန်သိမ်း၍ ရွှီထျန်းကို မေးလိုက်သည်။
" ကျန်းရင်းက သူကိုယ်တိုင် လက်စားချေမယ်လို့ပြောလိုက်တာ... ခင်ဗျားအတွက်ပေါ့ ဟုတ်လား"

ရွှီထျန်းက ကျန်ကျောက်ကို တစ်ချက်ကြည့်၍ မေးသည်။
" မင်းတို့က ရဲတွေလား"
ပြောနေရင်းနှင့် လက်ထဲမှ ချိန်းကြိုးများကို ဆွဲဖြုတ်ကာ သံလှောင်အိမ်ဖွင့်၍ အပြင်ထွက်လာသည်။
" မြောင်မြောင် ဘယ်မှာလဲ"

ကျန်ကျောက်က မျက်ခုံးပင့်ကြည့်၏။
" ကျန်းရင်းက တကယ်ပဲ ကျန်းမြောင်မြောင်လား"

ရွှီထျန်း ခေါင်းညိတ်သည်။

" သူ ဘယ်ရောက်နေလဲတော့ ကျွန်တော်လဲ မသိဘူး... ဒါပေမဲ့ လုံခြုံတဲ့ နေရာမှာ ရှိမှာပါ... ခင်ဗျားရဲ့ သမီးလေးကိုလဲ ကျောက်ကျွယ်က ကောင်းကောင်းစောင့်ရှောက်ထားပါတယ်"
ကျန်ကျောက် ပြန်ဖြေတော့မှ ရွှီထျန်းလဲ သက်ပြင်းတစ်ချက်ချသည်။

ထို့နောက် ကျန်ကျောက်က ထပ်မေးသည်။
" ခင်ဗျား ကျွန်တော်တို့နဲ့ ခဏလိုက်ခဲ့ပါလား"

ရွှီထျန်းက သူတို့နှစ်ယောက်ကို ကြည့်ကာ ခေါင်းညိတ်ရင်း ပြန်ဖြေသည်။
" ​အင်းလေ.. မြောင်မြောင်က မင်းတို့နဲ့ အတူနေဖို့ ပြောသွားတယ်"

ကျန်ကျောက်နှင့် ပိုင်ယွိထန်တို့က လူတချို့ခေါ်ကာ ရွှီထျန်းကို ပြန်ပို့ပေးရန် စီစဉ်သည်။ ထို့နောက် သူတို့အားလုံး အတူတကွ ရဲစခန်းသို့ ပြန်လာကြ၏။

လော့ထျန်နှင့် ရွှီထျန်းတို့က ပိုင်ယွိထန် ကျန်ကျောက်တို့ကားထဲ ထိုင်နေကြသည်။ သူတို့အားလုံး ရွှီထျန်းကို ကြည့်ရင်း အသက်ကြီးမလာသည်ကို အံ့ဩနေကြ၏။