Special Crime Investigation Journal Of Mystery Book 2 - Completed

Love Murder 19- မြေအောက်ခန်း

Unicode

ပိုင်ယွိထန်က လက်ရော ခြေရော မြန်ဆန်သွက်လက်သူဖြစ်သလို အလုပ်လုပ်ရာတွင် ခိုကပ်တတ်သူမဟုတ်။ ထို့ကြောင့် ပင်လယ်စာ ချိစ်ပါစတာနှင့် ဖုတ်ထားသော ပီဇာအကြီးတစ်ချပ်... ပင်လယ်စာဟင်းရယ်နှင့် ကလေးများအတွက် စတော်ဘယ်ရီဆွန်းဒေးနှစ်ခွက်ကိုပါ လုပ်နေသည်။ သို့သော် အပြင်မှ ကျောက်ကျွယ်တွေ့တော့ လှမ်းအော်သည်။
" အာ.. ငါလဲ အဲ့ဒါစားချင်တယ်.. စတော်ဘယ်ရီများများလေး ထည့်နော်"

သူတို့အားလုံး ကျောက်ကျွယ်ကို မနိုင်သည့်ပုံစံနှင့် ကြည့်ကြသည်။ ပိုင်ယွိထန်က ကျန်ကျောက်ကိုကြည့်တော့ ကျန်ကျောက်အာရုံက တခြားကို ရောက်နေပုံရ၏။ ထို့ကြောင့် ပိုင်ယွိထန်လဲ စတော်ဘယ်ရီဆွန်းဒေးနှစ်ခု ထပ်လုပ်သည်။ တစ်ခုက ကျောက်ကျွယ်အတွက် တစ်ခုက ကျန်ကျောက်အတွက် ဖြစ်သည်။ ပထမတော့ ပိုင်ချီအတွက်ပါ လုပ်ရန်ပြင်နေသော်လဲ ပိုင်ချီက သူ့ကို ချောကလက်ပူတင်းလေးပဲ လုပ်ပေးပါလားဟု တောင်းဆိုလာလေ၏။

ကျောက်ကျွယ်က ကျန်ကျောက်ငယ်ငယ်လေးထဲက စတော်ဘယ်ရီဆွန်းဒေးကြိုက်တတ်သည်ကို သိချင်မှသိလိမ့်မည်။ ပိုင်ယွိထန်က ရေခဲမုန့်အပြည့်ထည့်ထားသော ဖန်ခွက်ထဲတွင် စတော်ဘယ်ရီသီးလေးများကို ဇွန်းနှင့် ဖြည်းဖြည်းချင်း ခပ်ထည့်နေ၏။ ပိုင်ယွိထန်က အစကတော့ ကျောက်ကျွယ်ဟာသလုပ်မည်စိုး၍ ကျန်ကျောက်အတွက် မလုပ်ပေးခြင်းဖြစ်သည်။ အခု ကျောက်ကျွယ်လဲ စားမည်ဆိုတော့ ကျန်ကျောက်အတွက်ပါ လုပ်လိုက်တော့သည်။

ဟင်းအကုန်ကျက်သွားတော့ ပိုင်ချီနှင့် လော့ထျန်က ကလေးနှစ်ယောက်ကိုခေါ်ကာ လက်ဆေးခိုင်းသည်။ အိမ်ထိန်းနှင့် အိမ်စေများကလဲ ပိုင်ယွိထန်ကို ကူညီ၍ စားပွဲဝိုင်း ပြင်ဆင်ပေးကြသည်။ အိမ်ထိန်းကြီးက ဟင်းကို ရိုရိုသေသေ မြည်းကြည့်ပြီးနောက် တအံ့တဩ ချီးကျူးစကားပြောသည်။
" ဟင်းချက်လက်ရာ တကယ်ကောင်းတာပဲဗျ"

ပိုင်ယွိထန်က သူ့ကိုပြုံးပြရင်း ပြောလိုက်သည်။
" ကျွန်တော် အများကြီးချက်ထားပါတယ်.. အတူစားရအောင်လေ"

အိမ်ထိန်းကြီးက သူ့ကို ရိုရိုသေသေ ဦးညွှတ်ကာ ငြင်းဆန်လိုက်သည်။
" တွေးပေးတဲ့အတွက်နဲ့တင် ကျေးဇူးတင်ပါတယ်"