جمعتنا القرابة *الجزء الثاني* (أنت قدري)

Parte 14

هابطة جارية لتحت ، حبسها
أديم: بلعقل قريب طيحي واش كاين
لورين: بععد خليني نجوز ، بعدلها ، دخلت عليهم فالصالون كانت تماك آزار وكامي برك ، وهو تبعا يشوف واش صراا ، راحت شعلت التلفزيون
كامي: واش كاين لورين ؟
لورين: لونار شفتها ليوم فالديفيلي و..... ، ماجات تكمل سمعو صوتها فالتلفزيون تهدر دارو كامل يشوفو ، آزار اللي مشوكية ومخلوعة وكامل les sentiments تخلطولها ، غلبوها دموعها ،
كامي: هادي صح آزار !
لورين: ايه هيا اصلا غير شفت الڤيديو حوست على الكونط أنستا تاعها ولقيتها هياا
آزار: ووين راهي دوك ! ليوم نروح عندها خلاص بزاف على قلبي عييت وانا نستنا فيها ترجع
دخل راسم وصهيب فهاداك الوقت سمعو بكاها راسم راح يجري غير دخل شافها هكاك
راسم: واش كاين !
اديم: شفنا لونار فالتلفزيون وعمتي ناضت تبكي
شاف مع التلفزيون لقاها تهدر فندوة صحفية بقاا مشوكي بنتو اللي يعرفها بدات حياتها ولا علبالها والناس كامل تعرفها غير هوما ، فشلو رجليه وبقا يشوف مقدرش يصبر مرتو لانو حالتو يمكن اكثر منها ، راحت عندها لورين
لورين: خلاص طاطا المهم عرفتو وين راهي دوك وبلي راهي مليحة
آزار: ربع سنين وانا محروقة عليها ياربي
كامي: خلاص هاكي لقيتيها احمدي ربي ، بقات تبكي وهوما يحاولو يسكتوها اما راسم مازال مشوكي باقي غير يشوف بعينيه وساكت حاس فمو مربوط ، كان يشوف معاهم من بعيد شفتو حالتهم ، طلع لبيتو وعيطلها
.
.
صهيب: الله يجيب الخير وخلاص

..........
كان راح يتغلق الأصنصير حتى حست برجل تحطت وعاود تفتح شافت شكون وهنا بقات مصدومة 😳 ، هو غير شاف وجها ضحك فالجمب
آرام: من وجهك فهمت بلي ماشي مرحب بيا
لونار: واش جابك ! وكيفاش عرفت بلي راني هناا ! ، ااااا شفت العرض !؟
آرام: بانتلك فارغ شغل باش نقعد نتفرج فالعرض تاعك ؟
لونار: يمالا كيفاش عرفت !
آرام: كان علابالي من اللول بلي راكي f Londres ووين كنتي ساكنة
لونار: وش.ن ! ، قرب عندها
آرام: إيه ومعامن كنتي دوري وواش كنتي ديري ووقتاش تدخلي للدار ووقتاش تخرجي وواش ديري فالنهار
لونار: راك حاط عليا العسة
آرام: تقدري تقولي
لونار: بصح كيفاش وانا
آرام: معايا مكانش كيفاش !
لونار: وواش جيت دير هنا ؟
آرام: جيت عندك مشكل !
لونار: لالا معنديش كون تبقا بعيد علياا
آرام: ماشكيتش مازال راح نزيدو نتشاوفو ، تفتحت باب الأصنصور وهبط ، شافت معاه خارج ، دار ليها
آرام: واش متخرجيش ! ، شافت معاه وزادت شافت مع النميرو تاع الإيطاج لقاتو وين تسكن
لونار: ماتقوليش جاي معايا ! ، أسمع داري صغيرة روح شوف كاش اوتال
آرام: دارك فيها زوج بيوت و صالون يعني كاين بيت زيادة ! نسيتي ديجا حق نهار ديتك لداري لازم تعوضيني ، طلعت حاجبها وسبقتو فتحت باب دارها ودخلت بقا واقف ويشوف معاها حاط يديه فجيوبو
لونار: مضنيتش حشمت خاطر نتا متحشمش ، يمالا علاش واقف تماا
آرام: فيبالك زعما راح نبقا معاك صح ، خزرت فيه وضيقت عينيها ، جبد مفتاح 🔑 من جيبو ووراهولها
آرام: راني وليت جارك ، راح يفتح باب دارو وهيا بقات حابسة مدة من بعد راحت غلقت الباب وقعدت تخمم ، نفضت الأفكار اللي فراسها وراحت تحممت وبدلت ودارت لعشاء ، راحت للصالون بالطبسي فيدها شعلت التلفزيون ، شافتهم يهدرو عليها تبسمت بصح تمتم تمحات التبسيمة غير تفكرت بلي والديها راح يشوفو الخبر وحالتهم حالة والأذى اللي دارتهولهم تنهدت وبدلت القناة وبدات تاكل حتى صونا الباب
لونار: ياربي شكون هادا ! ، راحت فتحت لقاتو هو قلبت عينيها وكانت راح تغلق الباب ، سبقها دزها ودخل
لونار: وين وين قالولك salle des fêtes داخل بلا عرضة ، مقيمهاش ودخل راح ديراكت للصالون قعد ، غلقت الباب وتبعتو وقفت عند راسو وربعت يديها كان هز طبسيها وناض ياكل
لونار: واش جابك ! ، شاف مع الطبسي ودارلها بعينيه للماكلة
لونار: متعرفش دير livraison
آرام: يابنعمي مي مشحاحة نتي ، ديجا نورمالون تخلصيلي عشا حق الديفيلي ، قعدت فالفوثاي وحطت يديها بين راسها
لونار: ياربي باش بليتني ، خزر معاها وعاود هبطهم وكمل ياكل ، كمل الطبسي حطو فوق الطابلة
آرام: ضهرتي تعرفي طيبي ولا تعلمتي ، خزرت فيه
لونار: كنت نسلك وزدت تعلمت شويا عندك مشكل
آرام: بيان سور المعيشة وحدك تعلمك كلش
لونار: اممم ودوكا كليت شبعت تقدر تروح تخليني نرقد
آرام: راكي تحاوزي فيا ؟
لونار: ايه
آرام: خسارة عليك وانا جيت نحكي معاك هادا شحال متلاقيناش ، طلعت حاجبها وربعت رجليها ويديها وقدت
لونار: كاش ما بقا مايتحكا معاك ، ديجا كي راني نشوف فوجهك دوك راك مليح
آرام: اممم نحب نفهم هربتي على هاد السبة ! ، وبقا مركز معاها
لونار: نهرب بسباتك نتا ! هه امنت روحك
آرام: يمالا علاجال من هربتي ، بقا يشوف معاها وهي ساكتة وتخزر فيه ، وتروها خزراتو ، بدلت عينيها تشوف لبعيد
آرام: نسقسيك برك ! ، شافتو بدل نبرتو وولا يهدر srx ، ردتلو براسها تاع اهدر
آرام: هاد السنين كامل ماتوحشتي ني يماك ني باباك ني حتى واحد حتى من صاحبتك ! وماخممتيش تسقسي عليهم ؟
لونار:.......
آرام: علابلكي بالحالة تاع والديك نهار رحتي كيفاش كانت ! متهناوش نهار ودايما فرحتهم ناقصة ، شدت روبتها بيدها 🤜
كمل يهدر ، لهاد الدرجة قلبك قاسح ! واش السبة اللي خلاتك هكذا تبعدي على الناس اللي يحبوك خاطر نتي مشكيتش تحبيهم ، خزرت معاه والدموع محجرين فعينيها
لونار: مازال فمك مسمام وتهدر بلا ماتعرف وتجرح الناس بلا معلابالك وميهمك فحتى واحد ، حتى وتكون غالط متعرفش تطلب السماح واش هاد العقلية ، وزايد جاي تحاسبني ، ديجا ب اما وجه راك تقابل مفهمتش ! ، بقا يخزر معاها
لونار: تقدر تغلق الباب من وراك ، راحت لبيتها وخلاتو ، وهو زاد وراها شويا وخرج ، سمعت الباب كي تغلقت ، تفلقت تبكي 😭 كي تفكرت والديها ، وزاد كلامو اللي حط الملح على الجرح ، بقات تبكي تبكي حتى نشفو دموعها ورقدت
أما هو فبقا مكسل والهدرة تاع ✨حتى وتكون غالط متعرفش تطلب السماح ✨ تتعاود فراسو ، حتى غلبو النعاس ورقد

............

Hii girls nchalh tkono bkhir ntmna yaedjbkom lpartie tae lyoum je ss twlt psq kont mchghola dsl mtnsawch tvotiw w taboniwni wtcomentiw bach nkml et merci ♥️