جمعتنا القرابة *الجزء الثاني* (أنت قدري)

Partie 15

صباح جديد وأحداث جديدة ، ناضت غسلت وبدلت وفطرت وخارجة تلاقاتو عند الباب ، شافت فيه وكملت ماشية وهو وراها ، لحقو للأصنصير طلعو ، غير تغلق الباب صونا تلفونو ، هز
نسرين: الو عمري توحشتك
آرام: امم مام انا توحشتك ، لونار بقات متعجبة بصح مابينتش ، أما نسرين فماتت بالفرحة
نسرين: وين راك قالولي خرجت لبرا الدزاير عندك خدمة
آرام: ايه منطولش ونولي 
نسرين: انشاء الله حبيبي اتهلالي فروحك وارجع بالسلامة
آرام: مام انتي اتهلاي فروحك باي 👋🏻 ، غلق وبقا ساكت ، اما هيا فكلاها الفضول بقات ساكتة بصح محملتهاش
لونار: احمم راهي تسقسي عليك حبيبتك واقيلا مخبرتهاش كي جاي
آرام: خطيبتي ، خزرت فيه
لونار: اه خطبت مليح لعقوبة للزواج انشاء الله
آرام: إنشاء الله ، تفتح الأصنصير وهي خرجت وخلاتو وهو بقا متبعها حتى غابت ، راحت ركبت طونوبيلتها مقلقة ، وصلت ماتشوفش الطريق من الزعاف ، لحقتها السوكريثار (تينا)
تينا: مدموازال آرام عندك اجتماع دوك مع اللي راح تديري معاهم صفقة تاع الديفيلي الجااي فالجزائر
لونار: اني جاية
تينا: حاضر
لمت الملف تاع الخدمة وراحت ، غير دخلت لقات التحية وقعدت فبلاصتها ، مع طلعت راسها باش تشوفهم تلقاه مقابلها فالكرسي عاطيها ابتسامة ، حبس بيها الوقت لمدة حتى فاقت على صوت المساعد تاعها ، شافت مع المساعد وزادت شافت معاه ، دارلها براسو تاع واش (لونار بهمس للمساعد)
لونار: هادا واش يدير هناا !
المساعد: هاذا مدير الشركة اللي راح نتعاقدو معاها فالجزائر
لونار: ومالقيتو غير هوا
المساعد: هيا احسن الشركات وزاد مد عرض مليح يوالمنا ونتي تعرفي خدمتنا
لونار: ايه خلاص خلاص ، حمحمت ، وبدات تهدر ، مرحبا بيكم مرة وحد أخرى نقدرو نبداو فالإجتماع ، بداو وهوما يتناقشو كأنو ماكاين والو لأنو عندهم مبدأ فالخدمة مايدخلو حتى مشاكل شخصية
كمل الإجتماع وكل واحد تفرق بقات غير هيا وياه راس راس
آرام: يمالا راكي ناوية ترجعي للدزاير
لونار: ايه
آرام: ترجعي ترجعي ولا
لونار: حاجة متخصكش
آرام: هكذا ، راحت وخلاتو وهو يخمم

..........
فاتو اليامات ولحق نهار الجمعة ، ناضت فغرضها غسلت وراحت تشوف واش تاكل ، حتى صونا باب دارها ، راحت تفتح لقاتو هو قلبت عينيها
لونار: يا فتاح يا رزاق غيرالخير ، جبدلها صاشي من وراه
آرام: حبيت ناكل طعام (كسكس)
لونار: واش قالولك هنا ريسطرورون
آرام: ديريه ودوموندي واش تحبي ، خزرت خزرت وشدت الشكارة عليه ودخلت وخلاتو ، لحقها وغلق الباب حطت الدوزان وبدات تخدم فسكات وهو يشوف معاها
لونار: اذا كملت التفراج ارواح اجبدلي هاديك القدرة اللي لفوق ، راح لعندها
آرام: وين ؟
لونار: لهيك ، دارتلو اشارة بيدها ، جبدها وقدمهالها ، وجا رايح
آرام: وين هارب اقعد هنا الحاجة اللي نقولك مدهالي مدهالي ، قعد قدامها وهو ساكت ويشوف فيها كيفاش تخدم ، بقات تخدم وتخمم كيفاش قادر يكون عندو هاد الشخصيات كامل ، حتى تفكرت هدرت ماريا
✨ماريا: شوفي آرام وليدي ونعرفو كون تمشي معاه بالملاحة يمدلك عينيه وسورثو كي ماتعانديهش صح ساعات كي يتقلق يزيد عليها فالهدرة بصح قلبو حنين ونزيدلك ههه اذا حب حاجة يولي كي
الدراري صغار اللي تقوليلو عليها يديرها وهادي الحاجة واحد ميعرفها بخلافي خاطر تربيت يدي✨
كانت شاردة وتخدم حتى جرحت يدها
لونار: آه ، غير سمع صوتها راح جاري عندها ، شاف يدها يسيل بالدم ، حكم يدها وداه يغسلو
آرام: وين راهي la boite pharmacie تاعك
لونار: راهي لهيك فالدخلة فالخزانة الصغيرة ، راح جابها وقعد قدامها وبدا يحطلها فالدواء وغطاه ، رد كلش لبلاصتو وراح قعد قدامها
آرام: مفهمتش كيفاش متشوفيش ولا مخك كان فجيهة خلاف
لونار: نروح نكمل
آرام: اقعدي شبعت الغدا اللي فيه الطرايح مكان لاه
لونار: بركاا متزيد عليها اللي يشوفك دوك مايقول نتا اللي كنت تحلل مقبيل ، شاف معاها وهي راحت تكمل
بعد مدة كانت كملت وجدت الطابلة وحطت كلش ، راحت تعيطلو لقاتو راقد ، بدات تنوض فيه والو ، قربت عندو
لونار: آرام آرام نوض لغدا راه واجد ، بدا يفتح فعينيه بالعرض البطيء وهيا تاهت فيه ، ممبعد نفضت الافكار اللي جاوها وسبقتو قعدت شويا ولحق بيها ، بداو ياكلو فالسكات ، كانت تاكل شارت عينها ليه لقاتو ياكل ويستبن مسح الطبسيي
لونار: نزيدلك !
آرام: ايه شوياا ، راحت زادتلو وحطتلو
لونار: عجبك !
آرام: اممم كيما حبيتو
لونار: بصحتك
آرام: اونفان ديكوڤرينا حاجة فيك تصلح
لونار: اممم ، كملو كلاو ممبعد دار ليها
آرام: اهيه يا لالة واش هو الطلب تاعك علابالي بلي مدرتيهش فباطل
لونار: زعما كون نطلب منك اي حاجة ديرها !
آرام: مادامني قتلك اطلبي واش تحبي راني متحمل مسؤولية كلامي
لونار: هممم ، ماشي ليوم نأجلوه لنهار نحتاجك
آرام: خلاص كيما تحبي ، انا نروح نصلي
لونار: الله يقبل ، راح وهيا دوست الحالة وراحت تقيل (خذات قيلولة) ، وهكذا فات نهار

.........
نسرعو شويا احداث ، بعد هاداك النهار مازادوش تلاقاو غير خطرة فالخدمة وخلاص
مبقاش بزاف وتهبط للدزاير لأنو عندها خدمة كبيرة تما راح تقعد 6 أشهر ، وراهي محتارة مقلقة خايفة ، كانت راح تڤاري طونوبيلتها ، حطت راسها على الڤولون عيانة مهدودة ، حتى سمعت حس فزجاج طونوبيلتها طلعت راسها شافتو الدم جمد فيها ، دارلها بيدو تاع افتحيه ، فتحتو وبقات تشوف معاه
فراس: سمعت بلي عندك ديفيلي فالدزاير ، دارتلو براسها تاع ايه
فراس: اممم ونشاله متكونيش نسيتي الاتفاق اللي بيناتنا ، دارتلو براسها تاع لالا
فراس: امليح ومتنسايش بلي انا معايا اللي يخلف وعدو يخلصها غالية ، بقات تشوف معاه مليح كيفاش سيطر على حياتها وعايشة تحت التهديد ، راح وخلاها وهيا تنهدت وجات هابطة لقاتو فوجها
لونار: بسم الله الرحمان الرحيم نتا منين تخرجلي
آرام: وشبيه وجهك ، وبقا مركز معاها
لونار: لالا والو
آرام: راكي سور وجهك راهو صفرر
لونار: عيانة شوياا برك
آرام: اطلعي مالا تريحي اصلا راكي عييتي هاد ليامات ، بقات تشوف معاه حايرة ، طلعو مع بعض
آرام: انا ليوم راح نرجع للدزاير ، شافت معاه
لونار: طريق السلامة ، حبس الأصنصور هيا دخلت لدارها وهو كيف كيف

Hi hada lpartie tae lyoum ani mrida c pour ça nktb wnryh nchalh yaejbkom athlawli bach ntcouraga wnkml byby nhabkoum ❤️❤️