جمعتنا القرابة *الجزء الثاني* (أنت قدري)

Partie 05

راسم وآزار: وشنو ؟؟
آرام: (فقلبو) واش راهم يديرو هادو كيف كيف ، قاطعو راسم
راسم: واش وشبيها واش صراا ؟؟
آرام: معلاباليش هادا وين عيطلي صحبي يخدم فلاپوليس قالي راهي فسبيطار كداا واني فالطريق رايح
راسم: اني جاي مسافة الطريق ونكون عندك ، غلق عليه وكان رايح
آزار: انا تاني راح نجي معاك
راسم: امشي
لحق آرام l'hôpital سقسا f la réception قالولو راهي f les urgences 🚨 راح يديرولها عملية ، لازم برك يوقع على وحد الورق وقع عليهم وبقا يستنا بعد نص ساعة شاف آزار وراسم داخلين
راسم: واش وش قالولك كيفاش راهي ؟
آرام: راهي فغرفة العمليات هادا وين سنييت على الورق باش دخلوها ، راح راسم يسقسي لاپوليس وهيا قعدت تدعي
آزار: يا ربي بنتي تخرج سالمة يارب 🤲🏻 الشي اللي كنت خايفة منو هادا شحال صرا ، كان واقف en face ليها مربع يديه ويشوف معاها ويسمع ، بعد ساعتين خلاصت العملية وخرج الطبيب خبرهم بلي جازت مليحة (خاطيني الطب) وخرجوها لغرفة بصح مايقدر حتى واحد يشوفها الا بعد 24 ساعة
كان راجع للدار صونا تيليفونو
آرام: وي سمير واش درت فيها
سمير: رانا حكمناهم كانو ثلث دراري وعلى الأغلب كيشافوها طفلة ووحدها فنص الليل تبعوها
آرام: اممم متنساش ربيهم مليح
سمير: عليا
كمل طريقو للڤيلا طلع لبيتو رما روحو فوق لفراش بقا يخمم حتى داتو عينو ورقد ، فالصباح ناض غسل وبدل وهبط يفطر ، حس انو مافيبالهمش واش صرا لانهم هاديين كالعادة ، اصلا باباه مكانش هو وزاكو راحو صباح بكري ، حتى سمع لورين هابطة وتعيط عرف راح يبداوه بالأسئلة ناض
لورين: ماماا
وجدان: وشبيكي تعيطي
لورين: لونار راهي فسبيطار دارت لبارح accident بالطونوبيل
كامل: وشنو ؟ ، دارو لآرام اللي لقاوه راح
كامي: official علابالو علابيها زلق هرب باش منسقيوهش
ماريا: ووين راهي دوكا وكيفاش راهي ؟
لورين: منعرفش آمي تاعي قالي بلي شفت صاحب باباك فسبيطار وفهم من le réception بلي آرام دارت accident
ينيس: انا ني رايح نشوف
أديم: انا نجي معاك
الباقي: حنا تاني
أديم: وين وين هادا hôpital ماشي salle des fêtes راح نروحو انا وهو ممبعد كي نفهمو وكلش تروحو
لورين: انا راح نروح سوا ديتوني ولا مديتونيش نتوما ، قلب عينيه مغزل منها
ماريا: وانا تاني راح نروح
أديم: بديناا
ينيس: خلاص امشي معانا نتي (للورين) ونتي طاطا والباقي ممبعد ، راحو ركبو فالطونوبيل وديماراو لسبيطار ، غير وصلو هبطو direct سقساو وين راهي وراحو عندهم ، لقاو آزار حالتها حالة من لبكاا وراسم ماشي اقل منها قاعد قدامها راحو عندهم ، آزار غير شافت ماريا ناضت حضنتها وطرطقت تبكي ، لورين غير شافتها هيا تاني بدات تبكي ، لولاد راحو سلمو على راسم وسقساوه على حالتها قالهم راهي مليحة ، دار أديم ليهم لقاهم مازال يبكو
أديم: (بهمس لينيس) النسا هادو شحال يموتو على النواح
ينيس: فكل محضر يبكو منفهمش منين يجيبوهم ، وبقاو يشوفو معاهم

راحت تشري الما سمعت واحد يعيطلها
سعد: لورين ، دارت شافتو لآمي تاعها اللي قالها بلي لونار راهي فسبيطار
لورين: آه سعد مازلت هنا
سعد: ايه دوك نخرج طيحة خفيفا برك
لورين: على سلامتك والله نسيت مقلتهالكش منين تخلعت عليها
سعد: معليش المهم هيا راهي مليحة دوك
لورين: لالا الحمدلله رانا نستناو نشوفوها ونروحو ، كملت تحكي معاه ، وهاداك الوقت أديم كان لاحق يشوفها وين راهي غير لمحها واقفة مع واحد عينيه برقو من لغزول ، راح ليها وجبدها من يدها بلافورص
لورين: آيي يدي واش راك دير
أديم: نتي اللي واش راكي ديري ماشي كنتي راح تجيبي الماا واش موقفك مع هادا ، شاف معاه سعد
سعد: هادا اللي راك تهدر عليه يقرا معاها وهو اللي خبرها بلي فاميلتك اي فصبيطار
أديم: ايه معليش صحاا قوادة تقدر تروح دوك ماعندنا منديرو بيك
سعد: اياا باي لورين نتلاقاو ممبعد
لورين: إنشاء الله ، نفضت يدو وراحت ، لحق بيها وزاد حكمها
أديم: اسمعي لالة ماشي اللي يجي تهدري معاه فهمتي المرة لجايا نكسرلك رجليك
لورين: همم مالا متزيدش تهدر معايا
أديم: وشن ؟
لورين: واش مفهمتش قوتلك متزيدش تهدر معايا
أديم: خير إنشاء الله واش درتلك !
لورين: پيسك نتا تاني من هادوك اللي جا نهدر معاه ولا نسيت بليك ماتقربلي مانقربلك ؟
أديم: اكي منيتك تهدري فهاد الهدرة وتقارني فيا بهاداك ؟
لورين: وعلاش لالا ؟
أديم: لالا خلاص والو نروح خير psq اني بديت نتنارڤا وقريب نكصرلك فمك ، راح يغلي وهيا واقفة وتعوجلو
لورين: نكسرلك فمك سايبة قالولك ، وراحت وراه مدتلهم الما ، حتى جا عندهم الطبيب خبرهم بلي يقدرو يشوفوها بصح بلا مايقلقوها ومايطولوش ، دخلو عندها لقاوها تتبسملهم
راسم: الحمدلله على سلامتك بنتي
لونار: الله يسلمك پاپا
آزار: كيفاش راكي حاسة روحك
لونار: اني مليحاا برك شويا سطر فيدي ورجلي هادا ماكان
ماريا: ربي سترك والله هكدا ولا كتر
لورين: ياربي خلعتيني عليك ، ارواحي لهناا وراحت حضنتها
لونار: ماتخافيش انا قطة بسبع رواح 🤣 ، ضحكو عليها كامل
آزار: ماتتبدليش حتى ونتي بهادي الحالة وتضحكي
لونار: واش حبيتيني نبكي ياك مكتبة هكدا ولا كتر
ينيس: ايه والله صح
لونار: حقاا كيفاش راهي ماني
أديم: راهي خرجت مقبيل آرام داها
لونار: ايه مليح ، كملو يحكو معاها ممبعد ودعوها وراحو بقات معاها غير يماها وباباها