جمعتنا القرابة *الجزء الثاني* (أنت قدري)

Partie 32/33

فطابلة العشاء
متجمعين كامل يتعشاو ماعدا الغائبين وآرام ، شويا هكدا دخل عليهم متوخر
آرام: السلام عليكم
كامل: وعليكم السلام
ماريا: طولت آرام ولبارح ماجيتش !
آرام: عندي خدمة شارفة برك هاد اليامات
صهيب: سمعت الإجتماع فات بالبيان تاع لبارح
آرام: نلعبو ولا
صهيب: خلصت دوك ؟
آرام: لالا مزالي واحد غدوة مع شركة صينية علاجال وحد les pièces وخلاصت الخدمة لكبيرة تبقا غير déchargement برك
راسم: الحمدلله ، والله يا بني غير نحيت علينا عبئ كبير تاع الخدمة الله يعاونك
آرام: بلا مزيتي عمي ،
زاكو: خص الهامل اللي عندي يكمل قرايتو وسgدو معاك غير نتا اللي تقدرلو باش يعاونك راه بزاف عليك
آرام: يرحمها ربي غير يكمل هاد العام وساهل ، شاف مع بلايصهم فارغين ونطق ، عيطتولهم !
مروان: ايه وصلو مع ال 11 هكاك رتحو وخرجو شوية لعشية ودوك راهم f l'hôtel ، اومألو آرام براسو تاع ايه
ماريا: والله منكذب عليكم بصح بلاصتهم بانت srtt لبنات
كامي: شتي اني حايرة غدوة من غدوة كي يتزوجو وكل وحدة تروح لدارها كيفاش نديرو انا عن نفسي منصبرش
زاكو: هادي هيا سنة الحياة تحبي ولا تكرهي
ماريا: الطفلة دارها الحقاني هو دار راجلها يعني مروحة مروحة ليه الا اذا مكتبش ربي بصح انا عن نفسي راهم كي بناتي غير راحو فمرة مع بعض محملتش وقلبي ضرني
وجدان: صح نضل عgاب لورين على الطوايش تاعها ولسانها بصح والله ليوم تأكدت بلي بلا بيها سامطة وهيا محلية الدار ، شاف معاها صرب
آزار: ايه وواش نقول انا كي راحت ربع سنين ومعلابالي بوالو عليها على الأقل ادا تزوجت تكون فدار راجلها نعرف وين حطيتها ونروح نشوفها مرة مرة
كامي: مراهيش تخمم ترجع !
آزار: معلاباليش مهدرناش فهاد السوجي كامل ، شافت مع مروان ، ونتا مروان مقالتلكش ادا خممت تبقا هنا ولا ؟ ، شاف معاها ودور راسو بلالا
مروان: مجبدناش هاد الموضوع كامل
راسم: معندها وين تروح هادي هيا بلادها تبقا فيها خير قدامنا ومع عايلتها
صهيب: متقدرش تهدر هكا راسم وهيا بنات حياتها كامل تماك تسما تجيها صعيبة ، نتوما متفورصيوش عليها خليوها هيا تاخد القرار اللي يساعدها
راسم: إنشاءالله خير و t'éssayez tstabilisé روحها وخدمتها هنا ، كان يسمع فيهم آرام وساكت محبش يدخل والحديث يدور فراسو يعني معندهمش مشكل ترجع للندن وكون تقرر مراحش يعارضوها ، معجبوش الكلام ، هز روحو وطالع لبيتو
ماريا: وين مكليتش كامل
آرام: شبعت يما ، وطلع لبيتو

دخل دوش وراح تكسل حاس روحو مهدود من العيا وزادلو العيا تاع هاد السوجي لأنو ميقدرش يكذب وينكر أنو مراهيش عاجباتو وفي طريق انو يحبها ولا يمكن حبها وهو مزال محصلها فالإعجاب ، بصح ماراح يكون والو بيناتهم الا ادا كانت حاجة رسمية والعائلة كامل تعرف وتوافق ووالديها يكونو راضيين لأنو راهي بنت عمو وبنت عمتو فنفس الوقت وميقدرش يدير حاجة يكسر بيها ثقة العائلة هادا اللي كان يخليه يتفادا يتقرب منها بزاف ، ومن جهة اخرى حاب يزيد يتعرف عليها اكثر باش يقدرو يتفاهمو خاطر عقليتها بالنسبة ليه غربية اكثر ماراهي جزائرية وهاد الشيء ميساعدوش لأنو مهما زها وشاف تقعد عندو هاديك الصفات اللي عند كل جزائري غائر على عرضو ، هادو كوم وهم انو ترجع للندن كوم تاني وخصوصا انو والديها معندهومش اعتراض قادرين يقبلو هادا اللي زاد عليه لأنو ماعندو حتى حق عليها ولا مع والديها يقدر يواجههم ويعارض رجعتها بأي حق ماهو خوها ماهو راجلها ، تنهد من قوة الأفكار اللي كانو فراسو واللي من طبعو ميبينهمش للناس ويبان هادىء على عكس الداخل ، حتى غلبتو عينو ورقد