جمعتنا القرابة *الجزء الثاني* (أنت قدري)

Partie 115

قاعدين فالصالون يستقهواو (قهوة العصر) مجموعين (النساء) ، دخلت عليهم هيا ومروان
إيلصا: مساء الخير
كامي: مساء النور ، ناضت سلمت عليها .. واشراكي بنتي .. مليحة ؟
إيلصا: بخير ونتوما
ماريا: والله الحمدلله ، جازت عليهم بالوحدة سلمت عليهم وقعدت ، اما مروان اكتفى يهز يدو كتحية وخلاص
مروان: مكان حتى واحد هنا
ماريا: لالا .. ينيس هادا وين خرج مع آيلا وآرام او خدام
مروان: يمال حتى انا نروح لعشية نشاله
إيلصا: وين راك رايح ، وقف يسچم فسروالو
مروان: خارج
إيلصا: علاش اقعد هنا ياك معندك حتى شغل
مروان: نبقا هنا معاكم قاعد فلوسط نسمع فحكي النساء
آزار: خليه عندو الحق واش يبقا يسمع فمحاجيتنا .. راصو يطرطق ههه ، خرج مروان وخلاهم
ماريا: حقى قوليلي رحتي عند دار عمك صرب ، حركت راسها بايه
إيلصا: تلاقيتهم كامل .. وكان قلبي فالشط خايفة يكونو زعفانين مني بصح العكس فرحو بيا كيشغل مكان والو
آزار: بوووه ونتي واش مدخلك
إيلصا: منعرف .. المهم فوتت نهار هايل چصرت مع ماني حتى شبعت هيا وطاطا وجدان وفلعشية جاو لبنات مكانش علابالهم بلي رحت عندهم .. تفششت عليهم حتى شبعت ممبعد روحت عييت
ماريا: مليح شكون كيفك .. حتى انا في خاطري نزورهم كاش نهار توحشت الچصرة معاهم
إيلصا: نشاله غير روحي والله ماتسخايش بيهم .. المهم انا عندي surprise حبيت نقولهالكم ، تحمست كامي
كامي: واش كاين .. ههه ؟
إيلصا: لبارح عرفت .. بليك .. راني enceinte ، كامي وقفت وشدت على فمها وعينيها دمعو
كامي: صح ؟ ، حركتلها راسها بايه ، وقفت راحت عندها حضنتها وطاحو معاها دموعها ، شحال كانت مستنية هاد النهار بفارغ الصبر وتعرف بلي قريب يولي عندها حفيد ولا حفيدة كيما ماريا وآزار ، بعدت عليها شوية ... متأمنيش شحال راني فرحانة .. حسيت بنفس الإحسان نهار كنت enceinte بيك نتي وخوك ، هزت يدها تمسحلها فدموعها
إيلصا: راكي تبكي ماما .. ياوخدي
ماريا: هههه والله مام انا تفكرت نهار كانت تقولنا يما حسينة الله يرحمها .. ماعز من الكبدة غير ابن الكبدة .. كنا منفهموش حتى لحقنا ليها باش عرفناها ، كلاطات كامي تبكي بالجهد خصوصا كي فكرتها فيماها اللي كانت عندها إيلصا عزيزة ومتشوقة تشوف ولادها
إيلصا: ماما خلاص .. ياحاااي .. راح تبكيني معاك ، شافو إيلصا بداو يدمعو عينيها وخافو تتقلق
آزار: دموع الفرحة .. دموع الفرحة ههه .. كلشي مبروك بنتي ربي يكملهولكم على خير نشاله ، خزرت فيها وبقات شادة فيماها
إيلصا: آمين merci طاطا
ماريا: ياعمري بناتي كبرو وراح يرجعو des mamans .. ارواحي عندي اروااحي ، ناضت قعدت قدامها وهيا جبدتها باستها من حنكها .. ربي يتمملك حملك على خير وتولديه بالصحة ولهنا نشاله
إيلصا: نشاله ياربي .. اووه تمنيت كون كانت ماني دوكا هنا باش نخبرها .. لبارح مخلاتنيش طاطا وجدان نقولها
كامي: علاش عرفتي عندهم ؟؟
إيلصا: ايه .. وهيا جوزتلي لقاتني enceinte .. وقاتلي خبري يماك قبل ومبعد قولي لوخرين .. المهم يماك لازم تعرف هيا اللولة بعد راجلك ، خزرو فكامي كانت تستعمل تمسح دموعها فعينيها متفادية تسمع كلامهم زعما
آزار: معليش ممبعد وقوليلها راح تفرح بيك بزاف ، قاطعتهم مليكة جايبة تيليفون ماريا كان يصوني ، شدتو عليها وهزت
ماريا: الوو .. وي ينيس
ينيس: يماا اجري آيلا راح تولد .. ياربي ، رايح جاي ، وقفت
ماريا: صح .. بلعقل متتقلقش وليدي .. اني جاية نجيب كابتها ونجي ، قاطعهم صوت آيلا
آيلا: ااااااا .. يا يمااا اجرو لياا .. يانييييس .. مااااا ماريااا
ينيس: ازربي يما راهي تعيط باسمك
ماريا: جاية .. جاية ، غلقت عليه وراحت طالعة جارية مفرفشة وتعيط .. آيلا حا تولد آيلا حا تولد .. وهوما وقفو ولحقو بيها وبداو يقاقيو من الخلعة كي الجاج ...