فطنو لبنات لعشية كامل (مع العصر) ، على صوت آزار اللي كانت تنوضهم ، غسلو وهبطو لتحت لقاو غير النساء ، صهيب وزاكو وراسم وصرب كانو فالبيرو يهدرو وآرام راقد وأديم وينيس براا والولاد الصغار فالقراية
لونار وآيلا: مساء الخير
كامل: مساء النور
ماريا: لبنات رانا حطينا قهوة العصر نوضو تاكلو علابالنا من الصباح ماطاح والو ففمكم ، ناضو لبنات بسيف ، كانو قاعدين ويشوفو مع الماكلة ، آيلا غير حالة عينيها لانو نص الشيء اللي فوق الطابلة متعرفوش
آيلا: وشنو هادا ؟ ، اشارت لطبسي قدامها
لونار: مسمن يجي كيما المحاجب برك وهو فارغ
آيلا: وهادا !
لونار: بغرير ، علابالي بلي خاصني نورريلك بزاف حوايج فالدزاير بصح ماشي وقتها كامل
آيلا: ايه اصلا زعما كنت جاية السمانة الجاية باش تعرفوني بهادي الدزاير بصح الله غالب
لونار: راح نوريوهالك شبر بشبر يبرا مروان وتتسڤم شويا الحالة من المشكل اللي حكيتلك ويرحمها ربي ، تبسمت معاها آيلا ، كملت تهدر ، دوكا كولي ملازمش تراطي البنة ، قدمتلها الطبسي ، وبداو ياكلو
آيلا: علابالك كون جا هنا مروان كون مسح الدنيا يموت على هاد الشيء وانا منعرفلوش الحاجة الوحيدة اللي كنت نديرهالو هيا المحاجب خاطر علمتيهوملي خطرة
لونار: علابالك من نهار جينا لهنا كل صباح يجي يفطر عندي
آيلا: يفطن برك ونزوجو بوحدة منا تعمرلو كرشو ونروح
لونار: ههههه انشاء الله
فاتت لعشية والبنات يسييو ينسيو رواحهم مع العايلة ، وهوما تعرفو على آيلا اللي عجبتهم بزااف ، هابط فالدروج بعد ماشبع النعاس ، دخل لعندهم ومسا عليهم ، وقعد
آرام: يما بابا وين
ماريا: مصبح وهوما فهاداك البيرو، بداو يتلمو فالصالون بالواحد ، حتى لحق وقت لعشا وناضو ، دارت آيلا عند لونار
آيلا: ايه حقاا شكون هاداك اللي كان معانا فصبيطار
لونار: هاداك اللي نهار حكيتلك وقوتلك كاين پروبلام بيناتنا
آيلا: ااه تصالحتو دوك
لونار: ايه ، بداو يتعشاو ولبنات نقبو شويا وناضو
فات نهار وجا نهار جديد ، البنات ناضو مقلقين باش يروحو يشوفوه ، هبطو لتحت لقاوهم راح يفطرو
لونار: ماما حنا نروحو ديراكت
آزار: اقعدو تفطرو بنتي ومبعد يوصلكم كاش واحد من الولاد ، جا ينيس وقعد
ينيس: لونار افطرو وانا راح نوصلكم آرام عندو شغل وقالي منخليكمش تروحو وحدكم ، تنهدت لونار وقعدت ومعاها آيلا اللي كانت تستنا بفارغ الصبر ينوض ، شافتو طول ، نطقت بينها وبين روحها
آيلا: شحال تقيل ، دارت ليها لونار بعد ماسمعوها غالبا كامل بما فيه هو
لونار: آيلا راكي تخممي بالصوت ، خزرت فيها وشافت معاهم لقاتهم يتبسمولها وهو ولا علابالو طلعت حمراا ، مسح يديه وناض ، وهوما ناضو معاه خارجين ، مسافة الطريق كانو وصلو هبطو جاريين لعندو ، لقاو الطبيب خارج من عندو ، غير شافهم تبسملهم
الطبيب: صباح الخير
هوما: صباح النور
آيلا: دكتور كيفاش راهو دوك ؟ ، خزر فيها
الطبيب: راهو يتحسن والحمدلله برك اليوم يبقا هناا باش نزيدو نتأكدو 💯 وغدوة نشاله يخرج لغرفة عادي
لونار: الحمدلله ميرسي دوكتور
آيلا: نقدر نشوفو ؟
الطبيب: ايه ، هدر مع الفرملية باش تديها تلبس وتدخل عندو وراح ، دارت لونار عند ينيس
لونار: ينيس تقدر تروح حنا راح نقعدو هنا حتى للعشية ونجيو
ينيس: اوكي وكاش حاجة عيطيلي ، راح ينيس وهيا بقات الطل عليهم وتشوف كيفاش تهدر معاه ، تبسمت
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
