فوحد البلاصة كانت جاية كيشغل صالة على برا بصح مفتوحة من فوق ومخدومة باسمنت صفر تبان من العصر القديم مزينة بشموع فالأصفر وورود حمرين فالدخلة كاين اللي فالڤيزان وكاين اللي منثورين مع tapis rouge وشاشة كبيرة جاية كيشغل مراية وهيا عبارة عن كاميرا تتصور فيها وتخرجلك la photo ديالك ، غير تدخل تلقا مقابلك الديكور تاع العرسان وفيه معلقة پلاكة فيها أسماواتهم إيلصا♾️مروان تشعل بالضوء وفالجمب جهة كان الديجي يپلاصي فدوزانو وقدامو شغل مسرح صغير للمغنيين اللي جابوهم (راضية منال) ومقابل الديكور طوابل دائريين كبار موزعين محطوطين فوقهم من نفس الشموع والورد فڤاز زجاجي ومعاهم هرم تاع les dates fourré فلوسط وكيسان عاليين تاع le jus والماء مع قريع زجاجين فيهم jus وقرعة تاع زجاج ماء إيفري وقدامهم كيسان صغار تاع الحليب والقهوة و des termos تاع لحليب والقهوة وطباصا صغار فيهم ورقة مكتوب فيه le menu ، وزوج طباصا عاليين فالشط فيهم 3 أنواع تاع الحلوة مع الحليب (تشاراك المسكر ، sablés prectige ، قنيدلات)
لداخل فلجهة لمغلوقة وين كاين les sanitaires وبيت تبدال إيلصا وزوج بيوت وحدوخرين وحدة لناس الدار يبدلو فيها ووحدة خلاوها للضياف لي يحب يبدل وصالون صغير مفتوح على البيوت وكوزينة وخزن محطوط فيه الشيء تاع العرس ، كانو قاعدين كامي وآزار فالصالون وفطوم يوجدو فالسنيوة باش يستقبلو لعرسان فيها تمر محشي وحليب وقشيقشة باش ترمي من وراها ، كامي لابسة كاراكو مناسب لعمرها فالغوز والأبيض مطروز خفيف فالذهبي مع صباط ذهبي ولابسة ذهبها مع مكياج موالم وكواف خفيفة لامة شعرها ، وآزار لابسة قفطان تاني مناسب لعمرها فال le vers pistache مع ذهب تاعها (سخاب ..) ولامة شعرها كواف خفيفة ومكياج مناسب وطالون خفيف ، كانو تحفة حتى وانهم كبرو بقاو محافضين على أناقتهم وجمالهم ، اما فطوم فلابسة قفطان على قد عمرها فال blanc cassé مع بالغين وخيمارها وعكازتها ومكحلة عينيها
لحبو زوج طونوبيلات هوما اللولين بحكم الولاد طولو فالكورطاج شوية ، هبطت ماريا اللولة كانت لابسة robe kabyle شابة ولامة شعرها فالجمب مع اكسسوارات فضيين ومكياج خفيف ولحقت بيها وجدان اللي كانت لابسة بلوزة وهرانية فالأزرق الغامق وشعرها مطلوق مع مكياج خفيف وپوشاط فيدها ..
دخلو شافو الحالة عجبتهم بزاف ومشاو عندهم لداخل
ماريا: الديكور تحفة
كامي: هيا خيرتو وبقات توصي ديرو هكدا وديرو هكدا
وجدان: عندها الحق عرسها ، دورت راسها تشوف
كامي: زاكو مجاش
ماريا: اسكتي برك دار حالة بلبكا وبقا تما محملش يجي
كامي: كان علابالي .. اصلا من اللي قال مروان لعرس على سمانة وهو ماشي فحوالو
فطوم: ورجاجيلكم نتوما وين ؟ .. لايزيدو يقعدو فالدار ويخليو الضياف وحدهم
وجدان: راحو لعندو .. يجيبوه ويجيو ، مابيد هوما يحكيو سمعو صوت لكلاصون بدا يقرب وقفو خارجين باش يستقبلوهم وصوت لغنا تطلق والبارود بدا يطيخ فالسماء مع المحارق وصوت les moto اللي مزلزل الدنيا مع الزرنة ، شوية ولحقو كامل وتجمعو الطونوبيلات فالدخلة كل طونوبيل يتسمع منها صوت غنية متشبهش للوخرة وصوت الزغاريت والحالة مخلطة مهولين ، هبطو لعرسان بعد مافتحلها مروان لباب وعاونها تخرج ، مشاو باتجاه فطوم للباب اللي كانت هازة هاديك السنيوة تستقبلهم بيها مع كامي ولوخرين ، كان فجمب مروان آيلا ولونار وفجمب إيلصا ميرال ولورين وحاوطوهم من اللور الناس والفوطوچراف تصور والتيليفونات يصورو ، حضنتهم فطوم وهوما متبسمين
فطوم: على سلامتكم ، هزت حبة من التمر وكلت إيلصا وزادت وكلت مروان منها وهزت كاس لحليب شربتهم ، واشارت لإيلصا ترمي القشيقشة من وراها ، وهيا دارت واش قالتلها والزغاريت دايرا حالة ، بعدولهم من الطريق باش يدخلو ومروان شادلها فيدها مدخلها ، وتبعوهم العايلة داخلين وين كانو جاو شوية معاريض ، اما فطوم فحكمت ميرال تشربها من الكاس اللي شربو منو باش تتخطب من بعدهم وخلاتها تجوزو وبقات تحوس على الولاد اللي راحو يچاريو طونوبيلاتهم ..
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
