جمعتنا القرابة *الجزء الثاني* (أنت قدري)

Partie 24

كان يهدر فتلفونو مع رجالو اللي وصاهم يحكمو هادوك اللي دخلو للدار ، غلق عليهم وراح لعندها ، بقا واقف ويشوف معاها حالتها كيفاش ، بقا بخمم زعما قادرة تكون كاينة صداقة بين الطفل وطفلة هكاا ولا راهي تخبي وكاين حاجة بيناتهم ، بقا يتساءل ، حتى قطعلو تفكيرو صوت التلفون ، شافو لقاه صهيب ، غمض عينيه تاع ماشي وقتو وزيد واش راح نقولو 
آرام: وي بابا
صهيب: وين راك آرام ماجيت لا نتا لا لونار ، سكت وبقا يخمم وقرر يحكيلو
آرام: شوف رانا فالسبيطار بصح ماتخلعهم ما والو ، حنا رانا ملاح برك هاداك مروان l'amie تاع لونار نصاب
صهيب: وشن ؟ نصاب ! كيفاش نصاب ! ، ووين راكم ؟
آرام: رانا ف***** بصح متقولهمش ارواح وحدك انا نفهمك واش كاين
صهيب: اوكي ربع ساعة نكون تما ، غلق عليه وبقا يخمم ، هادا البداية واحد راهو فالموت يتسما ممبعد واش يصرا ، تنهد

بعد ربع ساعة ، وصل صهيب وطلع عندهم بعد ماسقسا فال reception ، شاف معاها اللي قاعدة وحاكمة حوايجو وتبكي
صهيب: آرام ، دارو ليه وهو راح عندها ، حضنها يهدي فيها ، وهياا زادت فالبكاا والنواح كي شافتو
صهيب: اششش لونار ، حبسي البكاا وقوي روحك ، خزر مع آرام بمعنى واش كاين ، غمض عينيه بمعنى مبعد نفهمك ، بقاو يستناو وصهيب يسكت فيها حتى حسها ترخفت ، شاف معاها لقاها رقدت ، شافها آرام راح هزها منعندو ومديها لاي غرفة كاينة تماا ، حطها وخرج، وقف صهيب
صهيب: كيفاش حتى نصاب الولد هادا ؟
آرام: منين رايح نبدا دوك اناا
صهيب: يضهرلي عندك ماراح تحكي امشي قدامي لتحت للقهوة ، هبطو لتحت ، دومونداو القهوة وبدا آرام يحكيلو وهو غير يعقد فحواجبو ، ختم كلامو
آرام: وهاك تشوف راح الراجل فالغلاط
صهيب: ومكونتوش ناويين تقولو كامل ياك ؟ حنا آخر من يعلم كبرتو وليتو تتصرفو وحدكم معندكم ني اهل يخافو عليكم ني والو
آرام: ماشي وقت الهدرة هادي دوك ، وزيد انا معنديش سمانة ماللي عرفت يعني تقدر تقول ماراكش آخر من يعلم
صهيب: وواش دوك كيفاش راح دير معاه ؟ راه بدا فالفيلمات التاعو هادا شحال وهو يدير فالسيناريوات التاعو ودوك بدا فالتطبيق
آرام: معلاباليش بصح هادوك اللي دخلو راني حكمتهم راح نسيي نعرف منعندهم وين راهو
صهيب: ايه واقيلا نتا في بالك تسقسي وهوما يجاوبو ياك ، تتقعد بيا آرام
آرام: الا منطقوش بالملاحة ينطقو بالقباحة
صهيب: ربحت وليت عندي كلوشار اناا مربيه يدي الناس و يضربهم ، حقاا تاع الخطرة اللي فاتت كي ضربت هادوك الرجال اللي تبلاو لونار راني حاسبهالك الا عمبالك راني راقد على ودنيا وماراحش نعرف بلي نتا وزيد معاها هادي والثالثة ونتفاهمو ديك الساع مليح انا وياك يا وليدي العزيز ، قدم عندو آرام
آرام: مفهمتش حاجة هوما كي تبلاوها وقريب ماماتت وهادو دخلو لدارها باش يقتلوها كون ماكانش هاد الراجل رانا نخممو واش من صلاة ندفنوها فيها جاتك عادي بصح انا كي نردهالهم ولانحوس نعرف اللي بعتهم وين باش نخلفهالو رجعت كلوشار ؟
صهيب: آرام الغلطة ماتتردش بغلطة كيفها ، قاطعو
آرام: لالا تترد وتترد دوبلي عليها ، كون رديتوها كي الناس هاداك الوقت كون تهنينا كامل منو و ميخليش الطفلة تعيش مفرقة بين والديها ومتبعدش عليهم ممبعد carrément ، وزير على سنيه ، وميجيش يقتلها ، والله أعلم ممبعد واش ناوي يزيد يدير ، يمالا نردها كي نردها عندي الحق ، انا مندناش بصح اللي يدنا يخلص ، ونتا تحب توقف معايا اللهم بارك متوقفش معايا انا قادر على شقايا ، ناض وخلاه ، وصهيب حط راسو بين يديه علابالو بيه ميرجعش اللور