بدات تخلاص السهرة وكل واحد تفرق يروح لدارو وهوما يودعو فيهم بقاو غير حبيبات من la famille
لونار: انا عيييت مقدرتش بهاد الطالون ، نحاتو
آزار: لورين ردي الطالون متبهدليناش الناس راهي تشوف
لونار: شكون راه يشوف ، راهم راحو وهادو يعرفونا ونعرفوهم ، كامي كانت تشوف مع الصالة ودور راسها
كامي: انا ولادي الهمال وين راهم
زاكو: إيلصا عيات قاتلي اني رايحة للدار ، ولوخر من وكتاش يشاورني
كامي: مفهمتش انا هادو الولاد غير هوما يعياو ولا كيفاش ، حنا من الصباح واقفين هنا مقولناش عيينا
آزار: شتي يوقفو دقيقة ويسرسبو يغطو راسهم فكاش پلاصة وحنا نبقاو حاصلين وحدنا
آرام: راكم تظلمو فيا
وجدان: حاشا والله مافيك الضوء غير نتا
لورين: هكاا طاطا صحيتي انا ني زيادة هنا
وجدان: لا حاشة بصح آرام كان واقف منو مننا وكان فالدار يوجد روحو وواقف على الخدامين كل دقيقة يعيط
كامي: صح نقص علينا شوية الصباح الخدمة ، شافت فطوم مع وجدان
فطوم: ونتي بنتك وين راهي ، بعتها تجيبلي الدواء مهبطتش ممبعد طلعت ملقيتهاش لفوق
وجدان: منها من ولاد كامي طڤت للدار ، بالاك راحت هيا وإيلصا ، خزر صهيب فماريا
صهيب: ينيس راح تاني ؟
ماريا: إيه راحو كامل ، بقينا غير حنا ، شافت ماريا مع آرام اللي حتى هوا كان حاط راسو على الفوثاي مكاليه ويماصي فجبهتو
ماريا: آرام ادي لونار وروحو راكم عيانين ، حنا نزيدو شوية ونلحقو بيكم
آرام: معليش نستناوكم ونروحو كيف كيف
صهيب: لالا الولاد كامل راحو ، روحو حتى نتوما حنى ندبرو راسنا هنا
آرام: كيما تحبو ، شاف مع لونار ، هيا امشي ، هزت طالونها وماشية قبلو ، حتى حبسهم صوت فطوم
فطوم: اصبرو استناوني نروح معاكم
آرام: هيااا فطوم سربي اني عيان ، زربت فطوم وراحت سبقت لونار قعدت لقدام ، وآرام ضحك
فطوم: احم انا نرتاح غير القدام ، روحي اللور ، ركبت لونار اللور بلا حتى كلمة همها توصل للدار ترقد برك ، وآرام ركب وديماراو رايحين
وصلت للدار طلعت جارية لبيتها ، فتحت لباب عليها ، لقاتها خارجة من الدوش لابسة پيجامتها ، حمرة من لبكا وباينة حالتها حالة ، غير شافتها طاح معاها قلبها ، راحت جارية حكمتها
إيلصا: لورين وشبيكي ؟ كاش ما صرا ! ، شافت معاها بخزرة باهتة .... لورين اهدري متخلعينيش جيتي مع أديم كاش ما دارلك ! ، هيا سمعت اسمو وهيا عينيها حمارو وطبعتها
لورين: بعدي عليا اخطيني نتي السبة فواش صرا ليوم ، بقات تشوف معاها مصدومة كيفاش طاخت فيها .... بسبابك ليوم تفضحت .... كنتي تقوليلي منحبوش ، ماشي هاكا ! ، هاني بينتلو بلي نحبو وخليتو يدير واش يحب ويقرب مني ، واش صرا ؟ شافني ينيس معاه فالفراش ، اه شافني وليد عمك فوحد اللقطة متسواش ، حكمت فمها إيلصا مخلوعة ، شتي نتي وتخلعتي وين راهي انا ، حوست تحكمها وهيا بعدت عليها
إيلصا: لورين واش راكي تخلطي واش دخل السوجي تاعنا فهادي ، أنا قلتلك مشكيتش راكي تحبيه خاطر حسيتك ماشي متقبلة الوضعية تاعو كي تتزوجو هاداماكن ، بصح أنا مقلتلكش سلميلو روحك وشبيكي هبلتي !
لورين: اسكتي متحاوليش تبرري لعمرك
إيلصا: منيش نبرر ، راني نقولك انا مدخلني نتي حبيتي تبيني الحب تاعك هكاك هاديك حاجتك اتحملي مسؤولية الغلطة تاعك ، صح منرضاهالكش وخويا مراحش يسلك مني خاطر هاد الخدمة ماشي تاع الرجال ، بصح الغلطة منكم للزوج لورين
لورين: بيان سور هوا خوك وتدافعي عليه كيما كنتي تضربي عليه مقبيل ، انا امنتك نتي كي قلتيلي راهو sérieux معاك قلت متغضرينيش بصح لالا ، يعطيك الصحة ، الله يجيبهالك فماقريب نشاله وانا نشوف ، فتحت عينيها من قوة الصدمة
إيلصا: هادا كامل يخرج منك !
لورين: متلعبيهاش مضلومة ونتي لفعة ، كي صرات جاية تلعبيها عليا ، ضحكت إيلصا من الفقصة
إيلصا: دوكا الغلطة تاعك وتاعو حبيتو تحصلوها فيا معليش ، انا صح ضمنت فيه خاطر مادام قالك هكاك معناها ناويك صح ، بصح هادي انا منجيش نتحكملو فالغريزة تاعو كون عينك نتي تحبسيه ومتخليهش يقدم ليك ، لالا نتي عجبك الحال يمالا تستاهلي
لورين: برااا براااا عليا منشوفش وجهك
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
