جاء نهار جديد :
بعد مارجعو للدار فلعشية تاع غدامنداك
ناضو الكل متوترين وواحد ماراح لشغلو .. داو كامل إجازات باش يوقفو مع آيلا .. هبطت لتحت لابسة پيجامتها الحريرية ومن فوق بينوار حريري طويل جاي مع الپيجامة ، لقات مليكة واقفة على طابلة الفطور
مليكة: صباح الخير مدام
ماريا: صباح النور ، واشراكي ؟
مليكة: الحمدلله
ماريا: وبنت ختك كيفاش راهي ؟ .. تنهدت
مليكة: والله مانكذب عليك حالتها متعجبش كامل وشحال من مرة تسيي تقتل روحها كون منلحقهاش .. خبطت قلبها
ماريا: اويلي وخليتيها وحدها منيتك ؟
مليكة: راهي جات وحدة عمتها من كندا راهي قاعدة معاها و قالت اذا حبت راح تديها معاها
ماريا: ايه مليح تما بالاك تبدل الجو .. تكمل قرايتها .. خير من هاديك الحومة ياختي تزيدها غمة على غمة
مليكة: والله وهدرت الناس وخلي برك
ماريا: شتي .. معليش ربي حنين وكريم وراح يفرج عليها نشاله
مليكة: نشاله .. وسمحيلي محضرتش لعرس موسيو آرام ومدام لونار ، قاطعتها
ماريا: بووه هاداك ماخص نلوم عليك نتي ، شافت مع الفطور ... يعني والله واحد ماعندو الشهية باش يفطر
مليكة: ايه ليوم دير مادموازال آيلا العملية ياك ؟
ماريا: لالا ليوم يدخلوها للكلينيك باش يوجدوها معنويا وغدوة نشاله ديرها .. ربي يستر وتسلك على خير هاداماكان
مليكة: ربي يخرجها سالمة
ماريا: آمين .. تعرفي قلبي راهو يتعصر عليها تقوشي بنتي تاع الصح .. منكذبش نهار شفتها حبيتها ربي عالم شحال ..
مليكة: صح والله الطفلة مشاء الله تبان من وجهها وتدخل للخاطر
ماريا: معليش كملو وجدو الطابلة .. على الأقل هيا تاكل زوج لقمات
مليكة: حاضر
راحت ماريا للصالون قعدت حاكمة راسها ومليكة كملت توجاد ، بداو يهبطو بالواحد ويقعدو قدامها .. دخلت كامي هيا اللخرة فالنساء
كامي: صباح الخير عليكم ، شافت مع ماريا .. مبدلتيش !
ماريا: علاش كاين شي خاطر للتبدال ؟
آزار: علابالنا يدينا مكصرين مقادرين نديرو والو والخاطر مكانش بصح على الأقل منبينوش قدامها
فطوم: صح ادا حنا هكدا الطفلة كيفاش مالا .. نوضي استهدي بالله بدلي واهبطي تفطري معاها كيشغل عادي .. على الأقل تروح بمعنويات طالعين ، شافت معاهم وطلعت لبيتها ، لقات صهيب يلبس فصباطو
ماريا: صباح الخير ، دخلت للدريسينچ وهو بقا يشوف معاها عارفها مقلقة ، لحق بيها ، كانت واقفة مقابلة لحوايج تشوف معاهم وتايهة ، حضنها من اللور وهيا دورت راسها ليه
صهيب: لحنينة ديالي .. متقلقيش راح تفوت على خير وتبرا وترجع خير ملول نشاله
ماريا: نشاله ياربي ، والله الطفلة صغيرة جاية للدنيا وتغبنت بزاف حرام تروح هكاك ضيعة .. دورها عندو وشدلها وجهها
صهيب: هادا قضاء وقدر ومنقدروش ندخلو فيه .. حنا نفيدوها بالدعاء وخلاص ، مسحلها دمعتها اللي هبطت .. يالله وجدي روحك يكونو تلمو كامل يفطرو باش على الأقل نطلعولها شوية معنويات ، حركت راسها بايه وراحت تجبد واش تلبس وهو خرج لبس ساعتو وحط پارفانو ، كملت خرجت عندو حكمها من خصرها وهبطو ..
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
