جمعتنا القرابة *الجزء الثاني* (أنت قدري)

Partie 106

دخلت طونوبيل صرب للپاركينچ تاع الدار ، شعلو معاها الضواوي اللي كانو طافيين ، الحالة كالم ، بما انو ميجيوش ليها حتى الخدم ، هبطو وبقاو يشوفو مع الحالة ، توحشوها فنفس لوقت تمناو كون السبة باش رجعو لهاد الدار كانت احسن ، قدم صرب فتح لباب وطلع الكونتور تاع التريسيتي وهما دخلو وراه ، كان كلش مغلف بقماشات بويض والحالة مغبرة ، بكري كان يوصي خدم يجيو ينقيوها مرة على مرة بصح فلعيمان اللخرين ابوندوناها ، دارت بعينيها على الحالة مكمشة ملامحها
وجدان: كيفاش راح نباتو هنا والحالة مسخة هاكا .. تبانلي نروحو لكاش اوتال ليوم حتى لغدوة يجيو ينقيوها ونرجعو ، شاف معاها صرب بالشط تاع عينو ومشا نحا وحد لقماش بيض من فوق لفوثاي وقعد حط رجل على رجل
صرب: خالتي ارواحي تقعدي خليهم يسچمو الحالة
ميرال: وشنوو ! .. مستحيل ، ربعت يديها وهيا تدور فعينيها
وجدان: راك منيتك صرب ، خزر فيها بالزعاف
صرب: كي تفريتو تجيو مشاورتونيش .. انا لحقت وراكم كي الداندو .. ماعندي حتى كلمة .. مالا سچمو الحالة ولا باتو واقفين ، جبد تيليفونو من الجيب وفطوم راحت جمبو قعدت بالسكات عارفتو مقلق وحتا وجدان ضربت الطم أما لورين فحطت كابتها مع الدخلة وشمرت التريكو ساكتة وتنحي فلقماش راح تبدا تنفط
لورين: ماما نسچمو الصالون شوية باش نرقدو فيه حتى لغدوة يرحمها ربي ، حركتلها راسها بايه وراحت تحوس على بيدون ونشاف وفروطوار باش تمسح لرض وخلات لورين تنفظ فالفوثاي ، اما ميرال فبقات واقفة وغير تبلچ فعينيها ، خايفة تزيد تهدر كلمة ويصرفقها صرب بلغش ..

فتح باب الدار ودخل عيان من اللي خرج من العرس وهو على شط البحر يرد فالنفس حسو تقطع عليه ، خصوصا كي سبو أديم على يماه وكان لازم يتحكم فروحو وهكاك وخلاه يخرج اسوء مافيه وضربو ، بصح بالو كان مشغول كتر على لورين واش صرا معاها وادا حبست لبكا ، كان حاب يعييطلها وبقا متردد ، قاطع شرودو صوتها اللي كان جاي من الصالون
مفيدة: مصعب جيت ، مشا لعندها طل عليها حط يدو مكاليه مع الحيط
مصعب: مرقدتيش !
مفيدة: بقيت نستنا فيك .. مجانيش النعاس ، مشا لعندها قعد قدامها على الفوثاي طالق روحو كامل وراسو مرجعو اللور .. كيفاش جاز العرس ، شاف معاها
مصعب: نورمال عرس وخلاص .. برك جاي ميكس ، عوج فمو
مفيدة: ولالة بنت سيدي كيفاش جات ، طلع عينو فيها وتبسم فالشط هاز يدو يماصي فراسو .. روح جيبلي الماء زهر نديرلك مساج
مصعب: تعملي مزية بصح بلا بيه
مفيدة: بيه خير باش يبرا راسك .. يالله ، ناض نحا لڤيسثا رماها فوق الفوثاي وراح للكوزينة حل الفريجيدار وجاب الماء زهر وراح حط راسو فحجرها وهيا بدات تجوزلو على راسو وتماصي منين راهو يوجعو وهو مغمض عينيه مستحليها
مصعب: يديك تقول فيهم الدواء
مفيدة: مافيهم ني دواء ني عمار بوالزور .. نعرف وين كاين الصطر برك .. كيما علابالي دوك بلي الصطر راهو هنا ، حطت يدها على قلبو .. وهو خلاه يطلع لهنا ، حطت يدها على راسو ، وهو فتح عينيه وشاف معاها .. قولي لالة بنت سيدي راهي دايرة فيك هاد الحالة كامل ياك ، تنهد
مصعب: مدايرها فيا حد ، غمض عينيه من جديد
مفيدة: اممم .. امنتك
مصعب: يماا
مفيدة: اممم
مصعب: توحشتي مهدي ؟ ، حبست المساج وبقات تايهة وهو عارفها بلي غير كي تفكرتو ومفهمش اصلا علاش جبدو دوك ، حتا فسياق الموضوع ومكان مدخلو
مفيدة: كون نقدر نمد لباقي من عمري كامل غير نشوفو ساعة قدامي نشبع منو ونحي الشوق
مصعب: زعما راهو عايش مليح ؟ .. مخصو والو !
مفيدة: معرفتش مصعب معرفتش ، شدت وجهها تبكي وهو تقعد وشاف لعندها
مصعب: خلاص يما سمحيلي مشي قصدي نبكيك ، جبدها عندو غارسها فصدرو العريض وهيا تبكي وهو قلبو يتقطع عليها ، حتى بالشوية هدات وجبدت روحها عليه
مفيدة: مهدي جمرتو تبقا شاعلة فقلبي حتى نديها معايا للقبر
مصعب: يما خلاص متقوليش هكدا .. ربي يطول فعمرك وتتلاقايه وتشوفي ولادو نشاله ، شافت معاه معوجة فمها تمسح فدموعها
مفيدة: نشوف ولادك نتا اللي معايا ويرحمها الرحمن
مصعب: بدينا ! .. حتى فوسط الدموع ومتحبسيش المتالبة .. نروح نرقد خير ، ناض هز الڤاسث ديالو وجا طالع
مفيدة: لالة بنت سيدي مجاتش ودايرة فيك هكا كي تجي كيفاش ، لحق للباب ودار عندها
مصعب: اللي تعجبني ديري عليها الطاپاج ومبعد قوليلي متزوجتش
مفيدة: سماح ايه .. هادي لالا .. معندو مخصها .. بصح اصبر راك ستعرفت بلي تعجبك ، مشا مخليها يهدر بالصوت فالكولوار
مصعب: خلاص دوك تقعد تهدر عليها عام
مفيدة: والله حتى نطقك من جنابك .. ولا منتسماش مفيدة ، بقات تضحك وهزت عمرها رايحة لبيتها ، غلقت الباب وراها وقعدت على الفراش ، فتحت القجر اللي كان قدامها وجبدت منها فوطو قديمة فيها بيبي صغير هازو راجل فيدو وقاعد يشوف معاه ويتبسم ومدورو لولد صغير واقف يشوف مع البيبي حتى هوا ويتبسم ، شدت فمها وطاحو دموعها
مفيدة: من نهار رحت وخليتني وانا نتعدب رجعت انا الراجل تاع الدار .. انا وقفت على ولادي نخدم برا ولداخل .. بقيت وحدي بلا سند نتكا عليه .. صعابت عليا لحيات بلا بيك .. صعابت بزااف .. وزدت ترزيت فوليدي .. عشت لعداب زوج مرات .. واحد داتهولي لموت وواحد داتهولي لحياة .. على الأقل نتا علابالي وين راك .. عند ربي ورحمتو مكانش ماخير منها .. هوا اللي مادريتو لا حي لا ميت .. لا فين عاش .. لا راهو مليح ، مسحت دموعها .. علابالك بلي وليدك لكبير من نهار وصل 16سنة مخلانيش زدت خرجت نخدم برا .. الله يخليهولي بيه بقيت دايرة الكوراج ما كون مشيت فالطريق ، تنهدت وبقات ساكتة تسترجع فذكرياتها .. نخليك تبات في راحة الله ، ردت la photo لبلاصتها وتكات مغمضة عينيها على أمل يجيها النعاس ...