جمعتنا القرابة *الجزء الثاني* (أنت قدري)

Partie 40

وصلو للدار ودخلو لقاوهم يستناو فيهم على أحر من الجمر ، ماريا جرات حضنت آرام وعينيها مليانين دموع خوف عليه وهو بادلها الحضن ، يهدن فيها
آرام: يما علاش راكي تقلقي فروحك هكدا ، بعدت عليه
ماريا: راك كبدتي كيفاش منتقلقش عليك
ماريا: سترك ربي قريب توخدت فيك
آرام: خلاص يما راني هنا معاك دوك
ماريا: متزيدش تبعد عليا منحملش عليكم ماشي قدامي
آرام: هههه خلاص نولي منتقلعش منهنا بصح ممبعد متجيش تقوليلي طير وكرهت منك ، خبطتو لكتفو ، قدمت عندو آزار
آزار: خلعتنا عليك آرام
آرام: لازم باش نشوفكم ادا تحبوني ولا لالا
كامي: هههه وكيفاش بانتك ؟
آرام: يعني ، كاين شي وحدين برك كون صابو منخرجش كاش 5 سنين يتهناو مني ، شاف مع باباه ، وصهيب قلب عينيه
ماريا: الله يسامحك هو اكثر واحد تخلع فينا عليك
آرام: الحب الممنوع دايرو راجلك معايا ميحبش يعترفلي
صهيب: دوك نوض ليك نوريلك الحب تاع بصح ، راح قعد وهو يضحك قدام ينيس اللي ضربلو على رجلو (تاع على سلامتك) ، ولورين حضنتو من الجمب
دخلت عليهم لونار مخلوعة وراحت عندو
لونار: راك مليح ، تبسم
آرام: اممم مليح مليح ، قربها عندو ولورين بعدت ، جبدها قعدها قدامو وشعشعلها شعرها ... خفتي عليا ... شافت معاه وزادت شافت معاهم لقاتهم يشوفو معاها ، طلعت حمرة ، ضربتو ليدو ... اطلقني شنشفتني ، بعد يديه
آرام: ايا اجري طيبيلي الرشتة
لونار: تزيد تتشرط
آرام: هادي هيا نتي حبيتي تلعبي ، دخلت فطوم فلوسط بيناتهم
فطوم: اقعد لرض قالك طيبلو الرشتة شغل راك جاي من الحج ، شدها من حنكها
آرام: فطوم يا فطوم مادابيك كون قعدت تما
فطوم: كون شدوك سمانة ولا مليحة ، نتا نص نهار مكملتوش كي الناس
آرام: صحاا دوك نروح نزيد نضرب كاش واحد آخر ، خبطتو فطوم لكرشو وينيس نطق
ينيس: يديك ياكلوك متحملش
زاكو: انا والله تامنوني راهي خادمتلي نعرف واش السبة اللي خلاتو يسحب الشكوى
صهيب: مام انا حرت
آرام: راح يبان ، بقات تشوف معاهم ومهبطة راسها

لونار: بابا ، شاف معاها ... الصباح جا عندي احمد ، دار عندها آرام
راسم: علاش جا ؟ واش قالك
لونار: قالي كون متتزوجيش بيا نشكي بآرام
آرام: اهيه ؟
لونار: ايا انا... ، قاطعتها
آزار: ماتقوليليش نتي السبة باش خرج آرام ! ، هبلتي لونار حبيتي ضيعي حياتك !
راسم: لونار علاش مجيتيش قولتيلنا بلي جا قالك هكا لوقتاش راح تقعدي تخبي علينا ! وتديري واش يقولك راسك ! حنا زيادة ؟ ، مسح على وجهو ووقف رايح جاي
زاكو: لونار علابالك واش درتي غطيتي پروبلام بپروبلام وحدوخر
صرب: تحسب راكم فالأفلام تمثلو ، ساهل الزواج ، بقات تشوف معاهم مخلاوهاش تكمل تهدر كامل ، كل واحد يعاتب فيها من جيه ويمد فرايو ، شافت ليه لقاتو ساكت ويخرج النار من نيفو من قوة ماكان مقلق ، جات راح تنطق وهو يجبدها مخرجها قدامهم ، وماريا تعيط
ماريا: آرام وين راك مدي الطفلة آراااام

خرج مكركرها موراه حتى وصلو لآخر الدار جيهت stationnement ، حبس وخبطها مع الطونوبيل وحصرها بيديه من الشط وبقا يشوف معاها مقلق
آرام: راني نغلي ومنيش حاب نغلط معاك ، قولتلك انا خرجيني ؟ جيت شكيتلك ! معلابالكش بلي نقبل ننحبس حياتي كامل ومنشوفكش مع واحد بخلافي ، عيط وخبط يدو فالطونوبيل ... لونار علاش درتي هكااا ؟؟
لونار: مفهمتش واش درت علاش مراكوش تخلوني نهدر ، تنفس وخزر معاها راح يخلطها
آرام: متهبلينيش ، علاش قبلتي تتزوجي باحمد مريضة فراسك نتي ؟ فهميني واش عندك هنا ، ضربها لراسها ، بعدتلو يدو
لونار: شكون قالك بلي قبلت بيه ؟ ، سكت وبقا يشوف معاها مطلع حاجبو ، تنهدت وهدرت ... علاش تفهمو كيما تحبو ؟ ، مخليتونيش même pas نهدر ونكمل كلامي
آرام: يمالا علاش خرجني ؟
لونار: وانا وين عمبالي روح سقسيه ، انا جا لعندي الصباح وورالي certificat تاع الضرب وقالي تتزوجي بيا ولا ندخلو للحبس وانا قوتلو دير اللي تقدر عليه ، راح مزعف ، وصح موراها سمعت بلي شكا بيك وانا غير سمعت متت بالخلعة ، بقيت نخمم ، قلت يعني مكانش يهدر برك ، وصح تما كنت راح نعيطلو ونقبل غير باش تخرج نتا بصح ماجيت نعيط ، دخل عندي مروان وقالي بلي راح يخرجوك ، ايا بطلت ، بقا ساكت وكلامها يدور فودنو
آرام: يتسما ماقبلتيش ؟ ، دارتلو براسها تاع لالا
لونار: واصلا كونت راح نقبل وموراها نحبسو مستحيل نقدر نقعد معاه ، علاخاطر كاين بنادم واحد راهو هنا ، حطت يدها على قلبها ، وهو اللي راح نكمل معاه حياتي ، تبسم فالجمب وجاوبها
آرام: شكون هو ؟
لونار: اممم يمكن هو اللي دومونداني للزواج بطريقة bizzar وكان يستنا فيا نخمم ونجاوبو ، قدم لوجها
آرام: همم وواش هو الجواب تاعك ؟
لونار: كنت راح نقبل وبطلت ، طلع حاجبو
آرام: وعلاش بطلتي !
لونار: خاطر يظل يعيط عليا ويكيركرني
آرام: بالاك نتي اللي راكي تخليه يعيط عليك
لونار: بصح دوكا مدرت والو عيطت عليا هكاك
آرام: دوكاا بصح موالفة ديري
لونار: معليه ملازمش تعيط عليا ولا تكركرني حسباتلك طفلة صغيرة
آرام: نسيي ، ودوكا واش درنا فيها !
لونار: فواش ؟
آرام: فالزواج
لونار: مزالني نخمم ، الخطابة بزاف وكاين اللي يساعدوني كتر منك غير نقول ايه برك
آرام: والله ! ، طلعت راسها وهبطتو بمعنى ايه ، ضحك وخزر مع عينيها سواسوة وهدر بصوت فيه بحة دوبتها ... وزعما هادا ، اشار لقلبها يساعدوه هوما ولا انا ؟
لونار: اممم منعرف سقسيه يجاوبك ، قدم لودنها ويديه يلعبو على شعرها
آرام: اعرفي بلي كون منديكش انا واحد مراح يديك غير كونك هانية نتي تاعي لونار ، تبسمت وقلبها رعش من كلمت نتي تاعي
لونار: امم هكداا ! ، بصح كون تقعد تديرلي هكا انا راح نهرب منك ، كون حنين على الأقل شوية معايا ادا حابني نولي صح مرتك ، غمزها وشدها من يدها راجع بيها لداخل
آرام: سيي نتي تخرجي آرام الحنين
لونار: وكيفاش ؟
آرام: هاديك عندك شوفي نتي
لونار: مقدرتش نفهمك آرام كل مرة تخرجلي بخرجة جديدة ، تبانلي عقليتك صعيبة ، حبس ودار ليها
آرام: انا ماشي صعيب ، انا عندي حدود باينين ملازمش تتعدايهم كونك راح تكوني مرتي وخلاص
لونار: وواش هوما ؟ اعطيني مثال
آرام: اللبسة
لونار: مزالك انا والفت نلبس هكا
آرام: وراح توالفي تلبسي مستور واذا كتب ربي مع الوقت تديري حجاب
لونار: إنشاء الله ، وواش تاني ؟
آرام: تديري حدود مع الرجال يعني هاديك الدصارة تنحيها تاع آمي وكي خويا
لونار: راك تهدر على مروان بصح هو صح راه كيما خويا
آرام: خوك اللي راهو معاك فال carnet de famille ونتي معندكش تسما هو ماشي خوك ، يعني الدصارة نقصيها سوا معاه سوا مع غيرو فهمتي
لونار: ايه وواش تاني ؟
آرام: العمر طويل وراح تعرفي بزاف حوايج ، غمزها وكمل ماشي بيها