جمعتنا القرابة *الجزء الثاني* (أنت قدري)

Partie 87

تفتحت پورطاي كبيرة ، والطونوبيل داخلة فطريق مدي لقصر فلوسط محاوطها شجر 🌴 من اليمين وعلى اليسار جنان تاع الورد ، فمها كان مفتوح وهيا تشوف فالقصر اللي داخلين ليه ، وهو يدو على الڤولان ويد شادلها بيها ومرة مرة يدور يشوف مع تعابير وجهها ويتبسم ، حتى حبس وچارا وهيا دارت عندو
إيلصا: هادي دارك ، حرك راسو بلا
مروان: دارنا أنا ونتي ، تبسمت
إيلصا: تهبلل
مروان: مزال راح تزيد تعجبك من داخل ، تبسمت وهبطت تستناه وهو راح عندها مدلها يدو ومشاو طالعين للدروج تاع الڤيلا ، تفتحت الباب وقابلتهم المدبرة تاع الدار
فايزة: مرحبا بيك موسيو مروان .. مرحبا بيك مدام اا
مروان: إيلصا ، تبسمت
فايزة: مرحبا مدام إيلصا ، تبسمتلها إيلصا ومشاو طالعين ، لحقو للايطاج الفوقاني ( آخر إيطاج شاد تقريبا بيتو كاملة ) ، دارت عندو
إيلصا: وين راهي بيتي ؟
مروان: هنا
إيلصا: كاين باب وحدة لالا ! ، فتح الباب ودخل جارها وراه ، دارت براسها على البيت اللي كانت كبيرة بزاف وغالب عليها اللون الأسود وفوسطها كاين سرير وفجنابو des tables de nuits فالأسود ، وقدامها فالجمب على اليمين طيراصة كبيرة طل على الجهة الخلفية فيها جعلولة شابة وزوج كراسة وطابلة وپيسين صغيرة ، و من الجمب لوخر كاين باب تاع الدوش والثوالاث و مقابل السرير حيط مقسوم كاين الدريسينچ وقدامو تيليڤيزيون صغيرة ومقابلها فوثاي ، وكاين باب وحدوخرة مغلوقة ، خزرت خزرت وكشرت حواجبها
إيلصا: ادا راك عازم نباتو للزوج هنا كيف كيف غير انساا ، تبسم بخبث وشدها بيد من خصرها ويد جوزها على وجهها
مروان: وعلاش لالا .. الفراش يرقدو فيه امة ، حوست تبعد منو وهو مزير عليها
إيلصا: لالا مجاياش مروان .. مبيناتنا والو .. خليني نشوف بيت لتحت .. الدار راهي كبيرة ، جا يهدر قاطعتو الساعة كي صونات ، شاف معاها لقاه فضيل يعيط ، قلب عينيه وهز وهو مزال حاكمها
مروان: انعم
فضيل: سي مروان بقاتلك ساعة على الإجتماع .. باش يكون فعلمك .. والعملاء راهم فالطريق
مروان: دوك نجي ، ما جاا يرد كان كوپا .. اهيه وين كنا .. قلتيلي ترقدي لتحت .. مكفاكش ليتساع هادا كامل
إيلصا: لالا بصحح ، جبدها ماشي بيها جيهة الباب اللي مغلوقة واشارلها تاع افتحيها ، خزرت فيه وبدلت عينيها للباب وفتحتها ، قابلتها بيت مسبوغة بالأزرق الفاتح اللون اللي تحبو وسرير فالأبيض وفيه ريدوات دايرين بيه فالأبيض و des tables de nuits بويض وفالجمب فوثاي صغير وطابلة وباب تاع الدوش ودريسينچ صغيرة ، دارت عندو فرحانة
إيلصا: هادي ليا ؟ ، حرك راسو بايه ، دخلت وهو وراها حاط يدو فالجيوب ويشوف معاها .. ياي تهبل .. بصح علاش خيرت بيتي تفتح علي بيتك ومنقدرش نخرج بلا مانجوز عليك ، طلع كتافو
مروان: كيفي .. باش تبقاي قدامي ، دورت راسها منو وبقات تتحرك فالبيت وتشوف فيها حتى تولهت لباب وحدوخرة وراحت بجيهتها ، كانت فالجمب كامل متبانش حتى تدخل للبيت ، فتحتها وهوما يقابلوها دروج يهبطو لتحت ، شافت فيه
إيلصا: هاد البيت تهبط ديراكت لتحت ؟ ، حرك راسو بايه
مروان: ياك عرفتي وين راح ترقدي دوك .. انا نروح عندي اجتماع ونتي ريحي ياك
إيلصا: d'accord .. الله يعاونك ، قرب باسها من راسها وغلق الباب عليها وراح للدريسينچ بدل وهبط ، لقا فايزة لتحت
مروان: ردي بالك عليها .. دوكا راح تريح .. ساعتين ونوضيها تاكل ، دار ليها .. ياك عندك le programme تاعها تاع الماكلة ، حركتلو راسها بايه .. ادا حبت دور فالدار دوريها وديها جيهة la ferme خاطر تحب الحصونة
فايزة: حاضر مسيو مروان .. كون هاني
مروان: ادا كاش حاجة عيطي ، تبسمتلو
فايزة: حاضر ، خرج راح ركب طونوبيلتو وهيا دارت تهمس .. الناس اللي عندها الزهر ..