جمعتنا القرابة *الجزء الثاني* (أنت قدري)

Partie 108

....
جابولهم الماكلة وبداو ياكلو فهدوء ، حتى تحنحن من جديد
حسام: ميرال
ميرال: اممم
حسام: بينك وبين مصعب كاينة كاش حاجة ، طلعت عينها فيه ومسحت فمها
ميرال: مفهمتش ؟ .. حاجة كيما واش ؟
حسام: شوفي نتي كيفاش راهي تبانلك علاقتك بيه وجاوبيني .. خاطر راكو تبانو مقربين بزاف .. surtout نهار صراتلك هاديك لحكاية .. كنتي متخلي حتى واحد يقرب منك من الرجال غير باباك وهوا ، تنهدت وحطت لفرشيطة
ميرال: كنت نعتابرو صديق مقرب دايرة فيه الأمان ، تقعد وكشر ملامحو
حسام: مي علاش هوا بالذات ؟
ميرال: معلاباليش .. بصح هو أكثر بنادم بعد پاپا حسيتو صادق معايا .. عمرو ماحسسني بلي شفقان عليا .. فهاداك الوقت اللي صح كنت نشفّْ واي واحد يعرف بلي .. ، بلعت غصتها .. كنت ر.. راح نتعرض للإغتصاب يتعاطف معايا .. حتى من أفراد عايلتي .. وأنا أكثر شعور نكرهو هو بنادم يحطني فمقام وين يحسبني مسكينة ويشفق عليا ، تنهد
حسام: وأنا واش كنت نحسسك ؟
ميرال: صراحة كنت نحسك خايف عليا وبزااف .. بصح كان رهابي من الرجال يخليني نصدك
حسام: اممم وراح تبقاي تصديني ؟ .. علاخاطر أنا منقدرش نزيد نستحمل نشوفك مع مصعب وأنا لالا ، دورت راسها تهرب فعينيها منو .. علابالي راكي عارفة بلي عاجبتيني بصح راكي ديري روحك جايحة .. فلول قلت صح من الصدمة بصح كي شفت علاقتك بمصعب حسيت بلي معينكش فيا برك علابيها راكي تتفادايني
ميرال: راح نفهملك حاجة حسام .. مصعب راني نشوفو كيما خويا لكبير اللي رتحتلو لا أكثر ولا أقل .. وهو تاني راه يعامل فيا على هاد الأساس .. ونتا كنت نشوف فيك الإعجاب من جيهتي ومحبيتش نفتحلك العين وأنا أصلا مزلت متخطيتش هاديك الصدمة ، هبط راسو وشبك يديه
حسام: فهمتك .. ودوكا تخطيتيها ولا مزال ؟
ميرال: معلاباليش والله .. اي راجل يكون قدامي نحس روحي mal alaise
حسام: دوكا راكي mal alaise ! ، حركت راسها ب لا .. يعني ؟ ، غطات وجهها بيديها
ميرال: نحس بالأمان عادي بصح كي نشوف نظرات الإعجاب من جيهتك نحب نخلي مسافة ، تنهد
حسام: شوفي ميرال راح نجيبهالك من اللخر انا ماعندي لا ادي لا جيب لا هاداك لعب الدّر خاطر كبرنا عليه .. انا عرضتك ليوم باش نحط النقاط على الحروف يانكمل ونغرق فالشي اللي راني نحس بيه من جيهتك يا نجبد روحي خير قبل مايفوت الفوت ، ضحك فالجمب معوج راسو .. هادا إلى ماطفرتش وصايي غرقنا ، شاف معاها بجدية ماشي معتادة عليها .. انا ولد يتيم من نهار عرف صلاحو وهو عايش فلميتم مايعرف لا باباه لا يماه .. لا أصلو لا فصلو .. تحرم من بزاف حوايج من بينهم الحنان .. كي لحقت 18 سنة خرجوني منو .. وزدت كي خرجت لبراا واجهت الشارع وحدي .. تعذبت بزاف .. بت بالشّر (الجوع) .. بت برّا .. بسيف باش صبت خدمة .. وليت نخدم زوج خدمات وحدة الصباح ولوخرة فالليل ونحوس نوافقهم مع الجامعة .. موراها تعرفت على أديم اللي كان من أقلية الحاجات المليحة صراو فحياتي من بعد ماعرفتو تبدلو بزاف حوايج .. ولا عندي صديق وأخ ولدتهولي الدنيا .. تهنيت من الوحدة اللي كنت عايش فيها .. رجع عندي هدف نخدم علاجالو .. وبسبابو هوا رجعت عندي عايلة واللي هيا نتوما .. وفوسط هاديك العايلة لقيتك نتي .. معلاباليش علاش ولا كيفاش تعجبت بيك .. رغم الفارق العمري اللي بيناتنا ورغم شخصياتنا المتباعدين .. بصح حاجة فيك جذبتني .. ومن هاد الشيء كامل اللي حبيت نوصلهولك انو حياتي راهي من الأسوء للأحسن .. malgré حوست على عايلتي بصح مالقيت حتى أثرر .. معليش يمكن معنديش صح عايلة .. بصح راني حاب نبني عائلة معاك نتي ، شافت فيه مصدومة .. عارفة بلي معجب بيها بصح مشي لهاد الدرجة .. ضنتو اعجاب عادي وخلاص ... نتحمل طوايشك وقباحتك .. نجيب معاك ولاد .. حاب نعوض واش تحرمت منو معاك نتي
ميرال: حسام اا معارفاش واش نقولك .. صدمتني وو.. ، لكلام تلفلها .. انا منيش نخمم كامل فهاد الحاجة لا معاك لا مع غيرك .. مزلت صغيرة وقدامي مستقبل طويل .. والزواج راح يربطني .. لولاد تاني ، حكت رقبتها بتوتر
حسام: إدا على المستقبل نقدرو نبنيوه كيف كيف .. حتى أنا مزال موصلتش لواش راني حاب وأهمهم نتي .. اما الزواج راح يربطك .. علاش حياتك راح تعيشيها كيما فدار باباك كيما معايا والو مراح يتبدل .. لولاد فغرضك ومن حقك تقرري وقتاش تجيبيهم ، غطات وجهها بيديها
ميرال: دخلتني في حيط .. مكنتش معولة عليها كامل ، غير شافها كيفاش رياجات ندم لي قالها دوكا وحس انها مشي مهتمة بيه وملقات كيفاش ترفضو
حسام: مراح نسيف عليك مانكسرلك راسك .. أنا قلتلك غير خممي مع روحك مليح وجاوبيني .. وكيما يكون ردك اني متقبلو ، تبسملها ، شافت فيه مصغرة عينيها كيفاش تقلب حالو حتى وكان ميبينش من طريقة كلامو فهمت ، جات تنطق قاطعها .. انا نروح نخلص ونتي الحقيني ، ناض مخليها وهيا هزت صاكها ومشات تابعتو ، ركبو فالطونوبيل وديماراو فالسكات وهيا مرة مرة تشوف عندو تلقى ملامحو هادئين عكس النار اللي داخلو ...