جمعتنا القرابة *الجزء الثاني* (أنت قدري)

Partie 102

لحقت لعشية ، مروان وإيلصا اللي كانو داخلين شابكين يديهم فبعض والفرحة باينة من عينيهم ، سلمو عليهم وطلعو لبيوتهم يبدلو ويغسلو وهبطو ..

مدة تجمعو كامل على الطابلة تاع الماكلة تعشاو ممبعد خرجو لبرا للجنان ساهرين ، زمان مسهروش فيه ، وكان ل sujet الأساسي هو عرس مروان وإيلصا وكل مجموعة على واش تهدر ، نروحو عند إيلصا ولورين وميرال

ميرال: خيرتي la robe blanche
إيلصا: إيه .. بصح مستورة بزاف .. عجبتني وحدة مفتوحة فالصدر وشوية فالضهر .. قالي والله ماراكي خارجة بيها قدامهم
ميرال: جايحة نتي ديتيه معاك يخير .. كون سنيتي هاداك النهار وصادفتيه ميهدرش
إيلصا: ميهدرش ؟ .. يدخل عليا تما
لورين: اهيه واللي خيرتيها كيفاش جاية ؟
إيلصا: نورمال .. sûr taille ومن تحت عريضة شوية وكتافها معريين شوية .. قالي زيديلها كاش حاجة .. بصح والله ماتزادت
لورين: تبان شابة
إيلصا: هيا شابة .. بصح ماشي كيما لوخرة .. اه ياليام نهار كنت براسي وواحد مايسالني واش نلبس وواش لالا
ميرال: شغل ضربوكم على يدكم باش تتزوجو .. ياك نتوما حبيتو .. هاا اتحملو
إيلصا: لي يسمع يقول نتي مراحش تتزوجي ، خزرت فيها وتنهدت بعمق مخبية غصتها ، لورين فهمتها وحاولت تبدل الموضوع
لورين: اهيه .. وواش باقيلك تشري ؟
إيلصا: حوايج ياختشيي باش نزهي راجلي ، خبطتها لورين بخفة ليدها
لورين: متحشميش اه
إيلصا: ياختي راجلي حلالي .. لازم نتهلا فيه
ميرال: اعع حكايات المخطوبات والمتزوجات انا مقدرتلهمش .. نوض خير ، ناضت مخليتهم طالعة لبيتها وهوما يضحكو عليها ، ولورين عينيها دارو مع أديم لي بعد شوية يتكيف ، كانت تشوفو غير هيا وإيلصا خاطر جاو مقابلين ، بقات تشوف معاه ، وهبطت راسها شوية وطلعتو باش تنوض تروح عندو وهيا تلمحها رايحة بجيهتو سابقتها ، بقات تشوف معاهم مصغرة عينيها وإيلصا دورت راسها وين كانت تشوف عينيها خرجو ولورين هزت روحها وراحت لعندهم

كانت ماشية بجيهتهم بخطوات تقال وعينيها عليهم ، بقات واقفة وراهم مربعة يديها وهوما ماشي حاسين عليها

.....
لمار: لوقتاش راح تبقا غام روحك هكاا ؟ .. خمم فعمرك شوية
أديم: لمار مكيش فاهمتني ومراحش تفهميني .. وخلينا من هاد السوجي هادي حاجة تخصني وانا نديسيدي d'accord ، تنهدت وحكت رقبتها
لمار: متقبلتش حبي ليك بصح على الأقل اتقبل نصيحتي .. راح ضر روحك وضرها معاك
أديم: واش عرفك ؟ .. قادر نتزوج بيها ويتبدل كلش ، زيرت على يدها بقلقة
لمار: مراحش نزيد ندخل روحي فيك ، جات دايرة راجعة لداخل وهيا تقابلها تخزر فيهم ، شهقت
لمار: مدموازيل لورين راكي هنا ؟ ، دار على اسمها بخفة وشاف معاها بوجه مرعوب
أديم: لورين ؟ ، دورت عينيها ليه
لورين: اممم ، عوجت فمها .. راني نشوف فيكم وليتو قراب بزااف لالا ؟ .. ورجعت تفرغلها قلبك وتنصحك
أديم: اصبري نفهمك ، قاطعتو
لورين: ماشي قلتلي l'amitié fille garçon ça n'existe pas ، اشارت بعينيها ليها .. ولا تبدلت معاكم الآية ، هزت يدها لتحت فمها بتساؤل .. اه ولا كاينة حاجة بخلاف l'amitié !
لمار: مدموازيل متفهميش غالط .. هووا .. هواا كان حكالي وحد لحاجة وانا نصحتو كاي انسان ، عقدت حواجبها
لورين: علاش شكون نتي باش يحكيلك ؟ .. ولا باش تنصحيه ؟ .. يماه ! .. ختو .. خطيبتو ! .. le bsychologue ديالو ؟
لمار: سمحيلي مدموازيل الا قلقتك مشي قصدي ، هزت روحها وراحت ولورين بقات تخزر فالشط حتى تسمعلها صوتو
أديم: لورين ميروحش تخمامك بعيد .. مكان والو ، قاطعتو
لورين: عمبالك راني راقدة على ودنيا ؟ .. عمبالك منيش نشوف ! ..  هه غلطان .. كلام ماما وميرال عليك علابالي بلي كامل صحيح ؟ .. بصح أنا كنت نصدرلك فيهم باش كي نطلق من يدك مانندمش عليك ومانندمش على واش راح ندير ، قدم عندها وهدر بصوت هادىء ويديه داخل جيوبو
أديم: علاش واش راح ديري ؟ ، طبطبت على كتفو
لورين: ممبعد وتعرف مشي دوك ، جات ماشية وهو يعاود يجبدها حتى تلاقاو عينيهم
أديم: راكي تخممي تحبسي معايا ؟ .. وكي تحبسي ! .. راح تنسايني ؟؟
لورين: نمحيك كي لي عمرها ماكانت بيناتنا حاجة ، هدرتها بوحد النبرة واثقة خلاتو يشوف معاها يحوس يتأكد ادا صح هادي لورين اللي تحبو !
أديم: مستحييل ! .. ادا كنتي صح تحبيني .. مراحش تقدري تنسايني بساهل ، ضحكت ودورت عينيها للجمب وعاودت رجعتهم تشوف فعينيه
لورين: كي نعيفك ونعيف فعايلك .. كون تنطبق السماء على اللرض مراحش ترجع كيما كنت ، جبدت يدها منو وخلاتو ومشات وهو دور راسو للجهة لوخرة يتنهد