بعد أسبوع
ماصرات حتى أحداث مهمة بخلاف آرام رجع كل يوم عندها فالدار ساعات يبات عندها ، ولا يجي عندها يتعشا ويسهر ويروح ، بالنسبة للكاميرات بقا موسوس منهم حتى حبسهم رجعو ميخدموش مابيد يصيب فرصة ويبدلهم ، اما هياا فكانت من الخدمة للدار
بصح بعد هاد الأسبوع راح يكونو أحداث 🔥
ناضت كالعادة خدات دوش و دارت روتينها اليومي ، خدمت شعرها و لبست وهبطت تفطر ، كانت قاعدة فبلاصتها تشرب فحليبها و تستنا فيه يجي يفطر معاها ، عندو سمانة مجاش ، وحتى من الخدمة ماولاتش تتلاقا بيه كامل يا يخرج قبلها يا ميجيش ، وحتى كي تعيطلو ميردش ، بقات محيرة عليه ماشي موالف يغيب هكدا ، سمعت الباب يصوني اللي فيقها من سهوتها ، بقات تستنا فيه يدخل متبسمة ، غير حست بيه قرب ناضت
لونار: مروان ، شافتو داخل هاز حاجبو
آرام: آرام ، خزرت فيه وتبسمت
لونار: حسبتك مروان خاطر غير هواا لي موالف يجيني وقت الفطور
آرام: وعلاش ماجاش ؟
لونار: معلاباليش عندو سمانة غايب ، حتى من الخدمة مانيش نتلاقا بيه ، ماشي موالف يدير هكاا ، خزر فيهاا مليح
آرام: بيناتكم كاش حاجة ؟ ، خزرت فيه تاع منيتك
لونار: بووه مروان خويا اللي معنديش
آرام: شخصيتو كيفاش ؟
لونار: هوا جاي طوايشي يحب يضحك يتمهبل من طبعو ، بصح كي يتقلق اهرب ومتدورش قدامك يرون الدنيا ، ميحبش علياا عمرو واحد تبلاني قتلو بالضرب قريب ما مات فيدو وكي نهدر معاه يقولي خلطلي فالحرمة ، يفهمني ، كي نتقلق يسايسني ، يعني نحمد ربي كي كاين انسان هكاا فحياتي
آرام: وكيفاش تعرفتي عليه ؟
لونار: اممم عادي حط السيڤي تاعو ، قبلتو اياا كان خفيف فالخدمة و intelligent كان اي حاجة تجيني صعيبة هوا يلقالها حل ايا رديتو assistant تاعي والنائب على الأعمال تاعي كي نغيب وتقربنا من بعض كي ولينا دايمن كيف كيف
آرام: وعايلتو كيفاش ، وعلاش مفتحش بيزنس وحدو كي قلتي شاطر و intelligent
لونار: شوف هو اصلا يتيم الأب و يماه عاودت الزواج وخلاتو هو وختو قدي فالعمر ، تسما كان ديجا يقرا ويخدم وقت واحد باش يصرف على ختو تاني ، يعني على قد الحال ، بصح قالي مع الوقت نشاله بالاك يفتح مشروع
آرام: مليح ، دزيري هواا ؟
لونار: ايه باباه دزيري ويماه المانية
آرام: جامي جا للدزاير ولا ؟
لونار: قالي كي كان كبير جامي ، خطرة برك كان صغير معا باباه قبل مايموت ربي يرحمو بصح مايشفاش كامل و الخطرة اللي كان يوجدلي فالدار والشركة يعني قبل مانجي انا بشهرين هكاك وهاد المرة برك
آرام: فاميلتو هناا مكانش ؟
لونار: الله أعلم جامي سقسيتو ، خزرت فيه ، اصبر اصبر قتلتني بالأسئلة عليه ، علاش ؟
آرام: لالا والو برك حبيت نعرف هاد البنادم اللي النهار كامل وهو معاك وقراب هكاا ، ادا مليح ولا
لونار: لالا متخافش مروان من الأقلية تاع الناس اللي لقيتهم يصلحو فحياتي
آرام: مليح ، ايه يا لالة كشما عندك اليوم ؟
لونار: لالا نروح نشوفهوم واش دايرين فيهاا برك مادام مروان مكانش
آرام: يتسما ماشي لازم تروحي
لونار: يعني علاش ؟
آرام: حبيت نخرجو نديك لواحد البلاصة راح تحبيها بزاف ، خزرت فيه باستغراب
لونار: انا ونتا ؟ نخرجو ! الله اكبر ، قرب تشو نقيسلك السخانة ، قربت مست جبهتو ومست جبهتها ، مهيش طالعة ، ضحك عليها
آرام: روحي تبدلي باش نخرجو
لونار: اني مبدلة
آرام: هكاا تخرجي ؟ ومعايا اناا هه مريضة نتي !
لونار: وشبيا ؟
آرام: هادي لبسة يخرجو بيها الناس ؟
لونار: شوف متبدانيش يا تديني هكداا يا نروح نقابل خدمتي
آرام: لوناااااار
لونار: وشن ؟
آرام: يالله منعاودش الهدرة ، خوفها كي بدل نبرة صوتو ، ناضت راحت تبدل وهياا مغزلة
لونار: حتى كي يحب يخدم حاجة مليحة لازم يسمطها
اما هوا فتنهد مستغفر من راسها اليابس ، بقات تقلب فالحوايج اللي اغلبيتها كيما اللي راهي لابسة حتى جبدت سروال دجين وتريكو ، هكداا👇🏻
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
