جمعتنا القرابة *الجزء الثاني* (أنت قدري)

Partie 77

لحقو الطونوبيلات للدار ، تستفو كل وحدة فالپاركينچ ، وهوما كل واحد وين تفرق
طلع لبيتو راح يبدل باش يخرج ، دخل للدريسينچ ، نحا تريكوه وراح يجبد واحد جديد ، وهو يشوف التريكو اللي كان لابسو داك النهار اللي عاونتو فيه لمار ، تبسم وهزو مقدمو لنيفو يشم ريحتها مغمض عينيه ، دقيقة وهو يفتح عينيه متفكر الطفلة اللي مدتلو الماء نهار الجنازة وشم فيها هاد الريحة بصح مكانش مركز ، بقا يدور فعينيه يخمم
أديم: زعما تكون هيا ! ... مستحيل ... كاين الف وحدة تقدر تكون تحط من هاد le parfum ! ، بقا يدور ... وكون كانت هيا ؟ واش راح يكون جابها للفيرمة ، طلع حاجبو ... زعما جات تخدم ! ، فتح القجر تاع la table de nuit وجبد l'ordonnance عاود قرا اسمها lamar ***** ... لازم نلقاك يا لمار ، تعاودت ترسمت ابتسامة على وجهو بصح تمتم تكاكا مع روحو ورما التريكو و l'ordonnance من يدو ... وانا علاش راني نخمم فيها دوك واش داني ! ... ايه باش نردلها خيرها حق ما عاونتني هادا مكان ، راح هز حوايجو ودخل للدوش ، طلق عليه الماء وبقا يخمم ، خرج من الدوش لاف سربيتة عليه ، راح بدل ، وجا خارج ، شاف التريكو و l'ordonnance هزهم وردهم لبلاصتهم
أديم: لازم نحافضو عليهم حتى نلقاو مولاتهم

خرج هابط هو يقابلها فالدروج طالعة ، حبس غير شافها وهيا غير لحقت عندو هبطت راسها وكملت
أديم: واش ماناش نبانو ، طلعت راسها ليه ، متفكرة وحد اللقطة صرات معاه نفسها بكري ، تبسمت .. بريتي شوية ؟
لورين: ايه راني مليحة
أديم: خممتي فواش قلتلك !
لورين: أديم ما.. ، قاطعها
أديم: ادا باش تقولي لالا ولا من هاداك الكلام غير مانسمعش خير .. اصلا لعشية راح نهدر مع بابا 
لورين: بصح
أديم: ماعندك ماتقولي .. حبيتك تخممي .. بصح الهدرة مع باباك ، هبط وخلاها بقات تشوف معاه ، متكذبش راهي فرحانة من داخل بصح كي تتفكر يماها وواش قالتلها مورالها يطيح

كان ماشي ويسوق لحق feu rouge 🚦 حبس قدامها ، كانو الناس يقطعو فالطريق ، ومن بينهم كانت الطفلة اللي شافها نهار الموت ، بقا يتبع فيها بعينيه وزاد رجع بيه التخمام والفضول لمولات التريكو
أديم: خلاص لازم نعرفها شكون هيا .. منبقاش اللي نشم ريحتها نقول هيا ... نفوت هاد اليامات ونتقعدولك يا لمار ، ديمارا الطونوبيل رايح لشغلو ...

طالع من لبحر كان يطفي فالنار اللي فيه ، تلاقاتو كامي وهيا خارجة من الكوزينة
كامي: مروان رحت تعوم .. مزال بارد الحال .. راح تمرض وليدي
مروان: نوو .. موالف نعوم فالشتاء
كامي: ياخااه .. روح وليدي .. اغسل وارواح نقولهم يوجدولك تيزانة تشربها .. نسبقو المرض
مروان: لالا ميشقاش خالتي .. ميصرالي والو
كامي: معليش اللي خاف سلم واش خاسر ياك كاس وتشربو ، تبسم محرك راسو بايه ، وجا طالع يتمتم
مروان: كون تقعدي هكاا تتهلاي فيا انا نسيبك مشي خير .. ماقاعدة تابعتلي فهاداك السلوچي ، عوج صوتو يقلد فيها .. اشرف هايل .. اشرف
طلع لبيتو دوش وبدل لبس شورت دجين hoodie بيض خفيف وهبط عندها ، لقاها تستنا فيه والطاس فيدها ، خزر معاه وعقد حواجبو
مروان: هادا يداوي الدار كامل ، تبسمت
كامي: اشرب وسكت ، بدا يجغم منو وهيا تشوف معاه ، حرك الكاس فيدو
مروان: خالتي ادا عندك كاش هدرة قوليها ، خزر معاها
كامي: تعجبني كي تفهمني .. احمم واش رايك فاشرف ، هو سمع اسمو وهو حط الكاس نايض ، وقفت معاه ... اويلي وشبيك
مروان: جبتيني لهنا وشربتيتي التيزانة باش تهدريلي على هاد اشرف .. مفهمتش علاش اسمو هكا خاطر ما شريف مايشرف
كامي: خلاص اهدن وليدي .. كنت حابة ندي رايك بصح معليش ، عبست وجهها وقعدت ، بقا يشوف معاها وقعد مسلم أمرو لله
مروان: واش حبيتي تسقسي ، شافت معاه
كامي: واش رايك فيه ! يعني واش رايك فيه مع إيلصا .. خاطر نتوما كنتو قراب ، تقعد وربع يديه
مروان: واش رايي فيه .. يصلح بصح مع إيلصا مايصلحش ، طلعت حاجبها
كامي: شكون قالك ؟ هيا ! ، حرك راسو بلا واشار بصبعو ليه
مروان: انا .. نتي سقسيتيني على رايي وانا جاوبتك ، بقات تخزر معاه معوجة فمها ، وهو ناض خارج
مروان: ياحبيبي عندي وحد النسيبة تقول للوعارة اقعدي واتفرجي .. الله يعينك يا مروان هادا واش عطا الله