جمعتنا القرابة *الجزء الثاني* (أنت قدري)

Partie 117

يوم الجمعة :
فشومبرتها قاعدة ترطب فلحمها لابسة robe de chambre خفيفة عند الفخاذ فالأزرق الفاتح ، وخلخال ذهبي خفيف فرجلها اليسار ، شعرها مشمخ ملوي بسربيثة ، وقفطانها الجوهرة فالأبيض مطروز بالذهبي مع حزام تاعو ذهبي معلق قدامها ، صندالتها فالذهبي واكسسواراتها تاع الذهب مع الپوشاث موجدين فوق الفراش ، نحات السربيثة حطتها فجمب وجبدت الدايسون تنشف شعرها وتخدمو محبت تجيب ني حفافة ني غيرها ديسيدات تماكيي وتمشط وحدها ، سلكت شعرها مليح ممبعد جبدت مكياجها بدات تماكيي مكياج خفيف وفنفس الوقت تاع مناسبة ويواتيها ...

لتحت كانت وجدان طير هنا ولهيه واقفة عند راس كل وحدة من اللي يديرو فالميناج للطيابة ، فرحانة وقلبها مهنيها على بنتها لكبيرة راح تتخطب لراجل يوالمها ويحبها
كان الصالون موجد على الشعرة حاولو ميكتروش من الپريستيش لأنهم ناس بسطاء باش ميبانوش زواخين عليهم (نفس الشي داروه فخطبة ميرال) ، وحبو تكون الخطبة جزائرية 100% بعاداتنا ، دارو برك زاوية خفيفة باش يلبسو لخواتم فيها زوج كراسة مشبحين (هادوك لي يجيو transparent راهم tendance هاد الخطرة) ومتوطتهم طابلة صغيرة وقدامها وحدة عالية شوية باش يحطو فيها الكيك ويقطعوه من اللور ضواوي مزينين القعدة
كان محطوط فوق الطابلة وسط الصالون شباح مع صنيات صغار ذهبيين فيهم تمر محشي مشبح و des miniardise و chocolat prestige كتقديم للضيوف ، وفالجمب شوية طوابل يتمونطاو (تحب تكبرهم وتصغرهم ويتجرو) معمرين بالطباصة و les services تاع الجو والحليب والتيرموزات الله الله فالذهبي وزوج جرارات فجمبهم معمرين بالحلوة من كل نوع (الجرارة نسيت اسمها المهم هاديك اللي تجي شغل سنيوات فوق بعض لاسقين يحطو فيها الحلوة وتتجر) وجدو كلش باش كي يلحق وقت القهوة يجيو يقدموهم برك
حبطت فطوم تمشي وتعكز هازة المبخرة فيدها تبخر فالدار الريحة تشعل ، خرجت وجدان من الكوزينة بعد ماوصاتهم كيفاش يحطو ويسربيو
وجدان: يما ريحي .. خلي كاش وحدة من لبنات تبخر
فطوم: لالا خليني هاد النهار مبروك .. حفيدتي لبكيرة راح تتخطب .. المهم نشير يدي فحاجة
وجدان: كملي الصالون وحبسي بزاف عليك الدار كبيرة
فطوم: دبري على عمرك .. حقا عيطتي لماريا ولوخرين .. واش قالتلك ؟
وجدان: راح يجيو قبل الظهر النساء والرجال حتى يصليو الجمعة
فطوم: وكامي ، تشنفت
وجدان: منسحقهاش
فطوم: تسحقك جاهنامة بيك بمثالك .. تبقاو هكدا متتهادروش حياتكم طول
وجدان: ميهمنيش .. ويرحم والديك متفسديليش النهار تاع ليوم بسيرتها .. هيا غلطانة ونزيد نهدر معاها نعرضها لخطبة بنتي اللي وليدها لعب بيها .. خليني يما يرحم باباك ، راحت طلعت فالدروج وفطوم بقات تسب فيها
فطوم: يحرق بو اللي سعاك وجابك ياللفعة ..

فدار مصعب كانو يوجدو فعمرهم رانية ويماها ومفيدة ومعاهم عمة مصعب الوحيدة نعيمة ووليدها جاو من غير أنفال لي محبتش تروح صابت السبة مريضة غالقة على روحها فالشومبرة ، واش جابو للعروسة كادوات وكلش كانو موجدين بالطبع محطوطين فوق الطابلة
حبط مصعب شعرو مشمخ من الدوش هاز صلاية على كتفو رايح للجامع وموراه حسام وفاتح وليد عمتهم ، خرجت عندهم مفيدة كي سمعت حسهم
مفيدة: متبطاوش غير تكملو ارواحو للدار تتغداو وبدلو تمتم .. باش منطولوش على الناس
مصعب: وقت مارحنا رحنا .. ساعة ساعتين ماكسيموم ونرجعو
مفيدة: لالا عيب قالو القهوة والعشاء
مصعب: العشاء ؟ .. عرس هادا ! .. ياك غير فاتحة وتلباس الخواتم ، هزت يديها
مفيدة: يماها قالت ، تنفس مليح وخرج
صوراية: وشبيه تقلق وقيلة معجبوش الحال يخسر نسابو فعشاء .. ياك عندهم دراهم النار متاكلهمش ، خزرت فيها مفيدة تاع غمي
حسام: خالتي الله يبارك لازم يحطوك كونطابل تحسبيلهم ، خرج متبع خوه ولحق وراه فاتح
مفيدة: ياختي عندك وحد الهدير
صوراية: مكذبتش ياك .. بصح ولادك للزوج راهم مشدودين من ودنيهم كلمة هك ميحملوهاش عليهم ، قلبت عينيها
مفيدة: بدلي الحديث خير منتخاسرو انا وياك ، جات رانية عندهم
رانية: كيفاش جيت ، شافو فيها كانت لابسة روبة مزيرة مع الصدر وعريضة من الكرش لتحت سامپل توصل لتحت الركبة فلكحل مع بالرين كحلة شعرها لمتو كوتشيڤال ومكياج قد عمرها جات كيوت
مفيدة: الله يبارك عليك پوپية
رانية: يعيشك خالتو
صوراية: ختك برات شوية
رانية: والو مابيها .. راهي راقدة (عارفين كامل من غير حسام وعمتو ووليدها بلي مشي مريضة غير دارتها سبة)
مفيدة: نوض نلبس هاداك هوا باش كي يجيو يلقاونا واجدين هوما خفاف تمتم يكملو حنا اللي شغلنا معطل ، شافت لختها .. نوضي نتي تاني
صوراية: انا خفيفة نرمي عليا حيجابي برك
مفيدة: رايحة للمارشي بالحيجاب هاداك .. البسي عبايتي الدوزيام ادا معندكش
صوراية: لالا مخصنيش نتقل روحي ياك غير فاتحة كيما قال وليدك .. منا للعرس يرحمها ربي ، تقلقت مفيدة وكانت راح تهدر سبقتلها رانية
رانية: انا دوك نجيبهالها تلبسها خالتي ، راحت مخليتهم ، وهيا شافت فيماها .. دوكا متحشموش حابين تفسدولها فرحتها بالسيف ؟ وحدة تندب لداخل ونتي هنا اقمعي فيهم بلواحد اوو .. عيب شوية احترمو على الأقل الخير والدار لي معيشينكم فيها
صوراية: افرحي نتي معاهم بزاف .. ديجا علابالي راهي جاتك على السطاش تستشفاي فختك
رانية: حسبي الله ونعم الوكيل فيك ماما من نهارك عندك غير طفلة وحدة هيا انفال .. متحبيش عليها وتتمناي تنحيها مني وتمديهالها .. بصح ربي راهو يشوف ، خرجت دموعها يحبطو مورالها كامل فسدتولها كون مالحشمة تبطل كامل متروحش ...