جمعتنا القرابة *الجزء الثاني* (أنت قدري)

Partie 06

فاتو يومين ولونار حالتها ماتعجبش كامل موسوسين منها ، كانت راقدة فبيتها حتى تفتحت الباب طلعت راسها شافتو هو داخل
لونار: كاين آداب قبل ماتدخل لازم تطبطب الباب
آرام: اممم علابيها سمعتي كي طبطبتلك ، طلعت حاجبها
لونار: واش جابك ؟
آرام: هاداك البنادم اللي دخل عندك نهار كنتي وسقسيتك قوتيلي غلط ، شكون هو ؟
لونار: مانعرفوش ، ودورت راسها للجهة لوخرة
آرام: امممم متأكدة ، دارتلو براسها تاع ايه بلا ماتدور ليه
آرام: زعما ميكونش اسمو فراس ؟ ، دارت ليه مخلوعة ، تبسم فالشط كان عارف بلي هو
آرام: واش قالك باينة ماجاش يوصل عليك
لونار: كيفاش عرفتو ؟
آرام: ماشي وقت كيفاش عرفت ، أنا نعرف كلش ، واش قالك ولا نقولك تاني واش قالك !!
لونار: معلاباليش ياربي ، وبدات تخبط فراسها وتبكي ، قرب عندها قعد مقابلها ونحالها يديها حكمهم ، تقابلت عينها مع عينو
آرام: قالك بلي نتي السبة فباباك ويماك باش بعدو على بعض ؟ ، ردتلو براسها تاع ايه
آرام: ونتي سقسيتيهم ؟
لونار: سقسيت غير ماما قاتلي ضاربنا برك
آرام: وباباك !
لونار: جامي جبدنا هاد السوجي كان دايما يحط اللوم على روحو هو السبة تسما مكونتش نحب نزيد عليه
آرام: تسما نفهم بلي الهدرة اللي قالهالك باباك خاطاه
لونار: مفهمتش
آرام: يعني كون جا باباك علابالو بلي نتي هيا السبة ولا ماراحش يحط اللوم على روحو
لونار: يتسما حب يقول ماما هياا ، ردلها براسو تاع ايه ، ناضت من لفراش خارجة ، حكمها دورها عندو
آرام: وين !
لونار: راح نفهم منها كلش
آرام: ماتتسرعيش
لونار: اطلقني نعرف ندبر راسي ، نحاتلو يدو منها وهبطت تحوس على يماها

دخلت للصالون لقات وجدان وماريا قاعدين
لونار: ماما مشفتوهاش
وجدان: راهي لبرا مع كامي يشربو فالقهوة ، خرجت لعندها ،
لونار: ماما عندي هدرة معاك
آزار: اهدري بنتي
لونار: ماشي هنا وحدنا
آزار: اهدري هادي عمتك وزيد كامي منخبي عليها والو ، خزرت معاها شويا
لونار: علاش تفارقتي نتي وپاپا ؟ ، تلبكت من السؤال ومالقات كيفاه ترد
آزار: لونار بنتي واش هاد la question جامي سقسيتيني واش خداك دوك
لونار: ايه justement هادا شحال معرفتش علاش ومحبيتش ندخل بصح دوك لازم نعرف
آزار: ماشي دوك بنتي ومبعد
لونار: لالا دوك بزااف عييت من نهار عرفت صلاحي باش نلقا والديا للزوج معايا كان كل واحد فجيهة خبيت الغصة فقلبي وقلت معليش وهادا قرارهم ونحترمو مكونتش نحب نزيد عليك بصح دوكا خلاص ......
فجهة خلاف كان داخل مع صهيب يحكيو سمع لونار تعيط ، راح جاري عندها يشوف ، لقاها تداوس مع يماها الدم طلعلو للراس
راسم: لوناااار ، سكتت على عياطو
راسم: واش هاد قلة التربية كيفاش تهدري مع يماك هكااا ، ناضت آزار وقفت فوجهو
آزار: لالا والو راهي تهدر برك
راسم: وتهدر بالعياط !
لونار: هه تلميتو يمال دوك نقدر نهدر ، خزرو فيها كامل ، كان واقف فالباب تاع الصالون اللي تخرج للبالكون ويشوف معاها
لونار: ماشي خليتيه علاجالي ماشي انا السبة قولي ؟ ، خزرت فيها آزار ودارت يدها على فمها
راسم: واش راكي تخلطي نتي تع الصح مشي مربية انا نعاودهالك ، هز يدو كان راح يضربها ، حكمهالو صهيب ودارلو براسو تاع لالا ، هنا آزار طاحت قاعدة فالفوثاي حكمتها الدوخة وكامي تهدي فيها ، أما لونار فعينيها تحجرو بالدموع ، راحت عندها ماريا تحاول تهدي فيها
لونار: نتا حاسب روحك أب ؟ ، من نهار تفارقتو جامي حوست عليا  كون منجيش انا من الصيف للصيف تسلم عليا النهار اللول ممبعد نولي عادي كيشغل ماكانش ، جامي حسيت بحنان الأب عندك كنت نحس روحي دايما كي شغل بنت كاش واحد براني مشي بنتك  ونقول بالاك انا السبة ففراقكم وتاع الصح ظهرت انا هيا السبة عمرك محبيتني پاپا 😭، ونتي (مع يماها) كي عاد علاباللك بلي كنت زيادة فحياتكم علاه متخيريش زواجك آه علاش خيرتيني أناا فپلاصتو ، باش نعيش زيادة ولا باش تتأكدي بلي يحبك ؟ ، تعرفو حاجة كون ندري نكون أم ولا نتزوج براجل كيما نتا نقعد طول حياتي هكاا خير ، ونزيدلكم حاجة اني رحت من طريقكم انساو بلي عندكم بنت وسمها لونار ، راحت وخلاتهم ، كانت راح تلحقها آزار بصح كامي مخلاتهاش
كامي: خليها راح تزيدي تعقدي الحالة كتر ، ماجات تكمل هدرتها معاها كان خطفها من يدها (راسم خطف آزار من يدها) وداها لبيت وغلق الباب
راسم: واش راهي تقول ؟ كيفاش هياا السبة ! فهميني خاطر راني على اعصابي وتعرفيني كي نتقلق ، هبطت راسها وطاحو دموعها
آزار: فرااس
راسم: واش دخل فراس دوك
آزار: بعد ماتزوجنا وكذا كان يعيطلي numéro privé نهز بصح ميردش ساعات برك يضحك ويغلق ممبعد نهار ولدت لونار وبدات تكبر وليت منين نروح نحس ببنادم يتبع فياا ، حتى وحد النهار خطفني بيا بيهااا
راسم: وشن ؟ فرااس !! وانا وين كنت
آزار: فاللول كل ماكنت نجي نقولك تتعكس ممبعد ولا يهددني كون نقولك يدير حاجة فيك حتى كان يبعتلي les photos ورجال قراب منين نتا وموجهين سلاح عليك
راسم: كنتي قادرة تجي تقوليلي نسيوو نفروها بلعقل
آزار: كنت خايفة وحدي زاد كي خطفني وهددني بلونار مقدرتش
راسم: كيفاه مقدرتيش آه هادي بنتي مام أناا تحسبي غير نتي راح تحميها هه تسما انا زيادة فحياتك وحياتها ولا كيفاش ؟ لالا والله هادي غير مليحة
آزار: 15سنة كاملة وانا نتعدب ماقدرت نشكي همي ماقدرت نرجع هادا كامل علاش علاجالك نتا يرحم باباك ماتزيدنيش ، وكانت خارجة
راسم: حياتك كامل تهربي وتخدمي الخدمة وتحصلي فياا ماشي جديدة
آزار: العبىء اللي كان على ظهري يعلم بيه غير ربي شكون يحب يخرب دارو ؟ ويخلي ولادو محرومين من الأب آه كنت كل ليل نبكي ونشكي فهمي لربي كنت كل مرة نخاف تصرالك حاجة ليك ولا ليها ، ربي عالم واش جوزت ، وطاخت تبكي بالشهقة ، محملش راح لعندها حضنها
راسم: خلاص خلاص سمحيلي علابالي مشي ساهل اللي فات عليك انا تان تعذبت
آزار: قد منتعذبو ماشي كيما لونار هي اللي عاشت مفرقة وكانت متبينش وتخبي لداخل
راسم: معلاباليش مكنتش نحس بلي راني نعاملها هكاك بصح منكذبش كي كنت نشوفها نشوفك تسما كنت نهرب منها وغلطت بزااف
آزار: غلطنا للزوج كنا متأثرين كي تفارقنا ونسيناها
راسم: صح والله نشاله تسمحلنا
آزار: منعرف
راسم: تطول بصح فاللول وفاللخر حنا والديها ، كانو يحكيو حتى دق الباب عليهم راح فتحو راسم لانو كان مغلوق بالمفتاح ، لقاه آرام
آرام: نقدر ندخل پيسك عندي هدرة معاكم للزوج
راسم: تفضل ، راسم راح قعد جمب آزار وآرام مقابلهم
راسم: تفصل آرام وليدي واش كاين
آرام: تعرفو واحد اسمو فراس ؟ ، خزرو فبعض (ملاحظة: آرام يعرف فراس وجاب عليه اصلو وفصلو وعلابالو بواش صرا فالماضي تان يدير روحو برك معلابالوش)
راسم: ايه كيفاش منعرفوهش هو اللي دار فينا الباطل بكري ومازال يزيد يدير حتى هو بسبابو تفارقنا
آرام: ايه علابالي پيسك نهار جا شاف لونار فسبيطار وكي سقسيتها شكون محبتش تقول حتى شفت الكاميرا سمعت واش قالها
آزار: ياربي لحق ليها ياربي
راسم: تسما دار دار وراح عندها ، نقتلو بيديا انا
آرام: المهم دوك واش راه يحوس من عندها
راسم: باينا حاب يخلف تارو فبنتي مي على جنازتي ولا منتسماش ، هكذا شويا سمعو صوت عياط وهدير خرجو لقاو لونار تهدر مع كامي ووجدان وماريا حاكمينها باش متخرجش وفيدها كابة
آزار: لونار بنتي وين ؟ ، مخزرنش فيها
لونار: بعدو خلوني نفوت خلاص ماراحش نزيد نقعد دقيقة معاهم فهاد الدار
راسم: واش راكي تهدري اركحي بنتي مشي هكاا
لونار: دوكاا وليت بنتك ومقبيل كي كنت راح تضربني نسيت بلي راح تضرب بنتك لالا ، خرجت ومخليتهم ، آزار طاحت فاللرض راسم كان لاحقها حكمو آرام
آرام: خليني انا ندبر راسي ، كانت تمشي لقات يد حكمتها فاللول فرحت حتا شافتو آرام ، دارت تشوف مع باباها لقاتو يسكت فيماها ، نحات يدها منو وكانت ماشية ، زاد جبدها
آرام: وين !
لونار: واش دخلك نتا
آرام: تعاودي كلمة واش دخلك نكسرلك فمك ، امشي قدامي وكركرها لطونوبيلتو ، تنهدت من عروش قلبها ، راح ركب بعد ماحط فاليزتها لقاها حاطة راسها ومغمظة عينيها ، ديمارا ساكت ، بعد مدة
لونار: راح نروح عند صحبتي اديني عندها
آرام:......
لونار: راني نهدر معاك
آرام: مكانش مروحة ني صحبتك ني والو
لونار: علاش هكاا حبيت نريح افهموو
آرام:.....
سكت ماحبش يردلها ، كمل يسوق وهي مغمضة عينيها ، حتى حبس الطونوبيل ، فتحت عينيها لقات روحها فوسط الغابة قدام فيلا صغيرة دايرين بيها الشجر وقدامها پيسين صغيرة ، من عينيها عرف بلي عجبتها ، هبط وخلاها تلحق دخل للداخل وهي تبعتو ، شافتها من داخل عجبتها اكثر غالب عليها اللون الأسود مع الخشب
لونار: دارك هادي
آرام: اممم
طلعت لفوق خيرت بيت عجبتها ورقدت ديراكت ، اما هو راح لبيتو كمل شغلو بعد مدة خدا دوش وهبط ملقاش حسها كامل طلع يحوس عليها من بيت لبيت حتى لقاها راقدة ، غلق الباب وخرج هبط لتحت راح لعند le garde فالباب
آرام: راني خارج ردو بالكم وماتخلوهاش تخرج من الباب الكبيرة مفهوم
حاضر :Le garde
خرج راح يتعشى مع صحابو وهي فالليل جابتها الفطنة ،
لونار: اففف خمرت يا جدك ، ناضت غسلت وهي تتلوا هنا ولهيه تقوشي سكرانة ممبعد هبطت لتحت ، لقات زوج بنات يجيو شويا اكبر منها يخدمو فالكوزينة تعرفت عليهم وحكات معاهم ممبعد تعشات وطلعت لبيتها

Heyy ya hilwiin sorry 3labali twlt bshh kont mrida wlh  doka hmdlh snn mtnsawch taboniwni w tvotiw w htitlkom anst taei f lbio tae lprofil aboniwni merci 💕