كانت خارجة من le coure رايحة تركب طونوبيلتها ترجع للدار ، اما أشرف فحوست عليه ملقاتوش عرفتو يتهرب منها فمهتمتش لانو راح يجي يجي النهار اللي يتلاقاو فيه
كان داخل وهو يطلع راسو يشوفها جاية مقابلتو ، هبط راسو وكان رايح يبدل الطريق حتى يحبسو صوتها
إيلصا: أشرف ، حبس وبقا ضاير مغمض عينيه .. قدمت عندو وراحت قابلتو .. نقدرو نهدرو إدا ماعندك حتى مشكل ! ، تنهد وحرك راسو بايه ، مشات قبلو وهو متبعها رايحين يقعدو بوحد الكراسا وين الپاركينچ
بقاو ساكتين مدة ومكانو يتسمعو غير تنهيداتو هوا ، نطقت كاسرة الصمت
إيلصا: منيش راح نلومك كي مجيتش ولا .. كل واحد وقراراتو واختياراتو في الحياة .. ونحترم قرارك .. يمكن بانتلك تسرعت .. مايهمنيش .. بصح علاش البارح بدات .. منكدبش عليك ونقولك غاضتني الهدة .. بصح معجبنيش نشوف الخيبة فوجه ماما اللي كانت فرحانة بيك .. نفسد خطبة خويا وأعز بنادمة عندي .. الحالة فالدار تتقلب من الفرحة للحسرة .. يعني مكنت خاسر والو كون قلت منقبل بلي مراحش تجي .. نقسملك غير بفرح وسرور ، بقا ساكت ويحك فيدو بحشمة
أشرف: مكانش قصدي نديرها بيك .. ولاخليني نقول مكونتش كامل ناوي مانجيش .. للدقيقة اللخرة وأنا موجد روحي فرحان مع يما وبابا وعايلتي ، شافت معاه مطلعة حاجب .. بصح صرات حاجة خلاتني نخير يازواجي بيك ياتعب بابا وجدودي
إيلصا: مفهمتش ؟ ، خزر لبعيد وهدر
أشرف: أنا عايلتي كيما كامل العايلات توارثت الأملاك جيل ورا جيل من جدي لبابا .. وأنا من الأحفاد اللي كان عليا مسؤولية نتحمل الأملاك بعد بابا .. وملازمش نريسكي بخدمة تاع سنين وعمر
إيلصا: لحد الساعة ماني فاهمة والو من كلامك .. واش دخل هاد الشيء فالخطبة كي مجيتش
أشرف: مروان ، خزر معاها وهيا طلعت حواجبها للزوج ودارت عندو .. عيطلي قبل بساعة باش نتلاقاو .. أنا قلت كاش حاجة تخصك ولا .. بصح لالا كان يهدد فيا يانحبس معاك .. يا يكشف وحد السندات تاع صفقات وهمية كان دايرهم عمي ورا ضهر بابا ويقدرو يدخلوه للحبس ويتأدى بابا وتدمر عايلتي وورث جدادي ، حطت يدها على فمها مدهوشة .. كنت شاك بلي عندو اعجاب من جيهتك خاطر كان غير هو نحسو ماشي مرحب بيا فهاداك الدار .. بصح مش لدرجة يخرب فصوالح هكا ويهددني بيهم
إيلصا: علابالك اني مشوكية .. سمحلي بزاف .. تبهدلت قدام عايلتي وزيد كنت .. ، سكتت وشدت شعرها .. معلاباليش واش نقولك والله .. كنت عارفة بلي مهما يصرا مستحيل دير هدة عيانة هكا ... بصح مضنيتش تكون هادي هيا السبة ، شاف معاها
أشرف: نتي مكان مدخلك إيلصا .. بصح حبيت نمدلك conseil تحبي تتقبليها تحبي لالا .. من واحد حبك صح وتمنا يكمل حياتو معاك ، بقات تسمعلو لانو عارفة صح بلي انسان مستحيل يآذيها ويرضالها غير الخير .. مروان يحبك باين فيه وعلابالي نتي تاني تحبيه .. لا علينا بصح حبو ليك متملك وراح يآديك بزاف .. لانو باش توصل لدرجة تخمم دخل راجل كبير للحبس ونتا علابالك بلي خاطاه و تفسد خدمة أجيال من وقت الإستقلال .. فهادا يبينلك بلي marche arrière مكصرة ويقدر يدير أي حاجة
إيلصا: كان من قبل قالي بلي متخليش الجانب التاني من شخصيتي يبان وهادا اللي مخوفني ، تنهدت ... بصح حبي ليه غالب .. قد ماحاولت نبعد .. ومهما دار مقدرتش نمحيه من قلبي
أشرف: قلبك خيرو .. والقلب واحد ميقدر يتحكم فيه .. نشاله يكون إنسان يستاهلك ومتندميش عليه برك .. والأهم ميآديكش كيما يآدي اللي دايرين بيك ، هبطت راسها
إيلصا: سمحلي أشرف علابالي آذيتك بزاف .. سوا ستغليتك سوا تعرضت للتهديد فسبابي .. نشاله تلقا الإنسانة اللي تستاهلك فحياتك
أشرف: نشاله .. وطلبيلي السماح من خالتي .. خاطر كانت أكثر بنادم تحبني من قلبها فهاداك الدار ، هبطت راسها وطلعتو بايه .. مالا انا نخليك ، تبسمتلو
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
