جمعتنا القرابة *الجزء الثاني* (أنت قدري)

Partie 38

فالصباح داخل صرب ووجدان وفطوم ، راحو le salle à manger ، شافوهم وقفو ، صهيب خزر ففطوم
صهيب: صباح الخير
فطوم: صباح النور ، هدر زاكو مع صرب
زاكو: كيفاش راه ؟ ، تنهد صرب
صرب: نيفو تكسر هو والفك تاعو
وجدان: آرام وين ؟
كامي: خرج من البارح مكانش ، شافت وجدان مع ماريا
وجدان: شوفو انا نعرف آرام مليح راهو تربا قدام عينيا وعلابالي مراحش يضرب بنادم بلا سبة ، بصح ماشي هكاك راهو فلقلو نيفو كامل حتى رجع ميقدرش يتنفس ، قاطعتها ماريا
ماريا: كيما قلتي مدامك تعرفيه ماراحش يضرب واحد بلا سبة راح تفهمي بلي مدام ضربو هكاك السبة كبيرة ، طلعت وجدان حاجبها متعجبة
وجدان: علاش واش كاين
آزار: وليد خوك سمعو آرام يهدر على لونار هدرة عيانة  ، فطوم شافت معاها ووجدان سكتت
صرب: مفهمتش كيفاش هدرة عيانة ؟
مروان: كان يطعن فالشرف تاعها كي محبتش تخرج تسهر معاه
فطوم: وليد الحرام ، شافت مع وجدان ... قولتلك الحكاية ماشي بيناتهم ، خاطر كون كانت بيناتهم آرام قادر يسمح من حقو فوجهي انا نعرفو
وجدان: معلاباليش يما مجاتش فبالي كامل يهدر على بنت الدار هكا ، اصلا واش وصلو ليها ؟
آزار: باش تدخل بنادم لدارك ودير فيه لامان مع اللخر يخرجلك بخرجة هكاا يعني آرام كي مقتلوش راه مليح

كانت تسمع فيهم وبقات مشوكية يعني آرام ضربو علاجالها وصرالو هكا بسبابها ، هزت روحها وخرجت ، طلعت فطونوبيلتها وعيطتلو لقات تيليفونو مزال مغلوق ، عيطت لمروان وهيا تديماري

لونار: الو مروان متمرgش بلي راك تهدر معايا
مروان: ايه صحا مخلوف وشراك لاباس ؟
لونار: جاوبني بايه ولا لالا
مروان: ايه راني خارج
لونار: تلاقيت آرام لبارح
مروان: ايه فلعشية نشاله ، هز روحو زعما نايض يهدر برا ... راني بعدت عليهم ... علاش راكي تعيطي وين راكي ؟
لونار: راني رايحة عند آرام ! علابالك وين راهو ؟
مروان: ايه راهو فدارو
لونار: بسبابي آرام ضرب هاداك ياك ؟
مروان: ايه
لونار: وعلاش دار هكا !
مروان: راكي رايحة عندو وسقسيه ، غلق عليها وهيا غمضت عينيها وديمارات لعندو لدارو ، اما مروان فرجع وهو يتبسم

كانت تصوني تصوني ، بصح واحد مفتح الباب
لونار: زعما راح يخدم ؟ اففف مشكيتش كي يتغشش ميحب يشوف حتى واحد اصلا ، يمال انا علاش جيت انا ! ، كانت راجعة حتى سمعت لباب تفتحت
شافتو واقف مغوبش بالنعاس شعرو مشعشع ، لابس شورط وملفوق ماشي لابس ، حاكم الباب ويشوف معاها عاقد حواجبو ، بلعت ريقها ، وبقات ترمش ، هدر بصوتو الخشين مخلط بالنعاس
آرام: واش جابك ، شافت معاه
لونار: ك كي مهزيتش عليا البارح تحيرت عليك قلت نجي نشوك كيفاش راك ونروح ، دخل وخلاها فالباب ، وهيا بقات تخمم ادا تدخل ولا لالا ، ممبعد طلت بالشوية لقاتو فالكوزينة يحط الماء باش يشرب ... احم اني رايحة لمهم راك مليح علابالي كي تكون مقلق تحب تقعد وحدك
آرام: شكون قالك راني مقلق !
لونار: يعني من لي صرا لبارح باينة تكون مقلق ، كان يوجد فالقهوة فالماشين ، وهدر
آرام: ادخلي ادخلي واغلقي الباب وراك ، راحت غلقت الباب ، وقدمت عندو ، كان فاصلهم حيط صغير مفتوح على الكوزينة ، بقات تشوف معاه وهو ضايرلها بالظهر ، حتى دار شافها غايسة
آرام: غرقولك لبوابر ، شافت معاه وعضت شاربها ، وهو هبط راسو يخلط فقهوتو
لونار: آرام
آرام: اممم
لونار: ضربت احمد كي سمعتو يهدر عليا ياك ؟ ، طلع راسو ليها وبقا ساكت ... جاوبني !
آرام: واش يهم ؟
لونار: ايه يهمني خاطر بسبابي كنت قادر تباصي ، دمعو عينيها ، تنهد وكان يهدر بهدوء عكس الغش اللي داخلو
آرام: ماشي نتي السبة لونار هو دخل لدار الناس دايرينلو القدر و تعدا على حرمتها وقاعد يهدر على بنتهم بالباطل ويسخف عليها كي الحيوان ، بقات ساكتة
لونار: سمحلي ، قرب عندها وهيا مهبطة راسها
آرام: لونار الغلطة ماشي غلطتك ، هو ميسواش وماشي راجل دراري صغير فعقلو يخمم بالعضو الذكري تاعو وانا بنادم عندو الحرمة قبل من كلش وعلاجالها نموت خصوصا للناس لعزيزة عليا ، طلعت راسها معاه ، وتقابلو عينيهم ، مدة وهوما يشوفو مع بعض ، حتى فاقت مع عمرها وبعدت عليه
لونار: مراحش ترجع للدار ليوم ؟
آرام: لالا حتى يبرد اللي فراسي
لونار: علابالي بلي راك حاب تقعد مع راسك علابيها ترددت فاللول نجي وكنت رايحة
آرام: هيا صح ، بصح نتي وصلتي حتا لهنا محبيتش نردك نزيد نرجع نضرب الناس و نزعكهم من فوق ، تبسمت
لونار: مراحش تروح تخدم ليوم ؟
آرام: لالا ، احم ، فطوم مقالت والو ؟
لونار: سمعتها مقبيل تقول لوجدان كان علابالي لحكاية ماشي بيناتهم خاطر كون جات بيناتهم آرام يسمح من حقو فوجهي ، طلع راسو وهبطو بمعنى ايه ، ارتاح نسبيا كي قاتلو هكا
آرام: فطوم عزيزة عندي حتى كي ضربتو مخممت فحتى واحد كيفاش يفهم ولا يخمم كيما خممت فيها هيا وصح كون جات بيناتنا انا وياه نسمح من روحي غير علاجالها هيا malgré انا من النوع اللي تغلط معاه تخلص
لونار: مام هيا تحبك بزاف والله حتى اكثر من احفادها الحقانيين ، تبسم ، وشاف مع الساعة
آرام: مادامك جيتي ديريلنا الغداء فيدك
لونار: واش راك حاب تاكل
آرام: مثوم
لونار: اوكي ، عندك الدوزان باش نطيب
آرام: لالا كاين غير الماكلة الواجدة ، بصح اني خارج نشري الدخان قوليلي واش تسحقي نجيب معايا ، طلع لبيتو لفوق لبس التريكو وهز مفاتحو وهبط
لونار: اني بعتلك ميساج فيه واش نحتاج ، طلع راسو وهبطو بمعنى ايه وخرج ، وهيا راحت قعدت فالصالون تستنا فيه فرحانة ، علاش ؟ معلابالهاش ! زعما كي راهي معاه ؟