جمعتنا القرابة *الجزء الثاني* (أنت قدري)

Partie 36

صباح جديد:
ناض كل واحد هبط يفطر باش يروح لشغلو ، كانو ملمومين وياكلو فالسكات ، حتى كسرتو فطوم
فطوم: ليوم راح يجيو عندنا ضياف
صهيب: مرحبا بيهم ، بصح شكون ؟
فطوم: مهدي ومرتو ووليدو أحمد
وجدان: صح ماما مهدي جاي !
فطوم: ايه من نهار راحو لكندا فهاديك مازادوش جاو للدزاير كون منروحش انا عندهم ، ايا هاد العام ديسيداو يجيو هوما كي محبيتش نروح فالأنيڤارسار تاع أحمد بصح كي مانيش فالدار قالو يجيو لهنا منها يشوفوني ويشوفو وجدان ويروحو
آزار: على سلامتهم ، شحال فعمرو وليدهم دوك ، ياك تزوجو قبلي بشوية ! تسما يقدر يكون قد لونار
فطوم: الله واعلم كبير على لونار بشي الشهور برك
كامي: الله يبارك
وجدان: اتخايلو من عرسي مزدتش شفتو ، يادرا كيفاش ولا ووليدو كيفاش داير
لورين: ماما انا منعرفش خالو مهدي كيفاش داير كامل ادا نتي تحوسي على وليدو
وجدان: راهو جاي وتشوفيهم للزوج
لورين: خلي نتعرفو على هاد le cousin ، خزر فيها أديم مطلع حاجب ، أما آرام ولونار وإيلصا فمهتموش بشكون جاي اصلا لانهم متعودين على كل خطرة يجيهم عبد جديد ، مسحت لونار فمها وناضت
لونار: بصحتكم ، دارت عند آيلا ، راح نجي ممبعد باش نتغداو كيف كيف
آيلا: اوكي ، الله يعاونكم
لونار: آمين
راحت ومعاها مروان بعد ما ناض هو تاني ، موراهم بداو يتفرقو بالواحد

طلعت لبيتها حاسة الدوخة بدات تزيدلها ، تكات فالفراش بشوية بشوية بدات تنقصلها حتى راحت ، بقات تشوف مع السقف وهي تخمم ، قاطعها صوت التلفون ، شافتو وهزت

آيلا: آلو دوكتور
الممرضة: مادموازال آيلا انا الممرضة تاع موسيو آمين راكي بخير ؟ (الكلام بالإنچليزية)
آيلا: نعم بخير
الممرضة: عيطتلك باش نخبرك بلي الرونديڤو الثاني تاعك راهو فاتك
آيلا: علابالي ، مقدرتش نجي لول بارح بصح اني جاية غدوة ، شوفيلي اقرب رونديڤو يعيشك
الممرضة: حاضر ، نشوف ونعيطلك ، غلقت عليها ورمات التلفون ، غمضت عينيها معنكشة حتى رقدت

بعد مدة صونا تيليفونها فيقها من نعاسها ، هزت

آيلا: الو وي وقتاش الرونديڤو !
لونار: على 12:00 وقتاش ، شافت مع التلفون وعضت شاربها
آيلا: آه ، ايه دخت بالنعاس
لونار: نوضي كاش واحد ينوض من النعاس باش يزيد يرقد وجدي روحك تشو دوك نجوز عليك
آيلا: حاضر يا معلم حاضر ههههه ، قطعت عليها وتنفست ، ناضت راحت تلبس

وصلت قدام الدار وبقات تستنا فيها حتى هبطت عندها ، شافت معاها وجهها اصفر وباينة عيانة ، ركبت
آيلا: سلام
لونار: سلام ، وشبيه وجهك
آيلا: وشبيه ؟ ، هبطت المراية تشوف روحها
لونار: اصفر
آيلا: اه والو عيانة ، وشويا stress برك كي راح نرجع ونخلي مروان اكي تعرفي
ديمارات وهي تهدر وتشوف مع الطريق
لونار: اممم تخافي على مروان وهو اللي قدو ام بولادهم وزيد قاعد معانا ، خافي على روحك نتي اللي وحدك تما
آيلا: صح ، شافت معاها لونار ، كملت تهدر ، ونتي مناوياش ترجعي على هاد الحساب
لونار: والله منكذب عليك بصح والفت ، جايتني صعيبة تاع نخمم فهاد الموضوع خاطر عقلي يقولي كملي الديفيلي وارجعي تما بديتي كلش وقلبي يقولي لا اقعدي هنا خيرلك مع عايلتك الحياة قصيرة وراح تندمي
آيلا: يعني قلبك راهو يقولك اقعدي هنا غير علاجال والديك ماشي علاجال حاجة وحدوخرة ، خزرت فيها
لونار: كيما واش زعما ؟
آيلا: آرام مثلا
لونار: واش دخلو ؟
آيلا: شوفي لونار متكذبي عليا منكذب عليك منهار جيت لهنا راني نشوف كيفاش تخزري فيه ، كي يكون يحكي معاك كيفاش تسيهي فيه ، منيش مكلخة ولا عمية باش منشوفش ومنفهمش خزراتك ليه ، تنهدت وشافت معاها
لونار: صح غير نتي اللي تفهميني ، ايه نحبو وراني غير نزيد نتعلق بيه ، بصح طريقنا مسدود انا وياه
آيلا: علاش !
لونار: اولا حنا فاميلية وهو من النوع اللي ميقربش لعايلتو فأمور الزواج ولا الحب
آيلا: بصح كون يحبك حتى هوا راح يبدل رايو ، قليو اللي يخير ماشي هوا
لونار: ايه وهادي مراحش تصرا لاني not his type
آيلا: وشكون قالك تعلمي الغيب ، اذا شكلا مكانش منها لانو 1000 واحد يتمناك وهو واحد منهم
لونار: مانيش نهدر physiquement برك ، حتى f la mentalité بعاد بزاف
آيلا: فواش زعما ؟
لونار: فبزاف حوايج ، اصلا عقليتو صعيبة نعطيك مثال دوكا مبيناتنا والو وراهو يدخل فلبستي وانا هاد الحاجة مراهيش عاجبنتني فمابالك حوايج وحدوخرين وتزيد بيناتنا حاجة خلات !
آيلا: بيناتنا باش نهدرو الصح ادا نتي تحبيه وحابة تكوني معاه لازم تتقبلي غيرتو عليك وخصوصا فاللبسة ، يعني متتوقعيش راهو متزوج بيك ولا خاطبك وتخرجو ونتي لابسة mini jupe وهو فرحان بيك يستعرض فيك قدام الناس الا اذا كان طحان
لونار: معلاباليش والله ساعات نقول مستحيل نتوالمو
آيلا: لونار فكل علاقة لازم نتي تحطي %50 وهو %50 وغالبا الراجل يحط اكثر ، يعني اذا نتي شايفة روحك مشي قادرة تتنازلي بحوايج علاجال هاداك الإنسان ولا تصلحي من روحك غير مكان لاه تكوني معاه خاطر كامل فينا عيوب بصح هادوك العيوب قادرين يضرو الشخص الثاني ولازم نصلحوهم اذا صح حابين نبقاو معاه
لونار: علاش غير انا لازم نتبدل وهو لالا
آيلا: كيف كيف تتنازلو للزوج وتتبدلو للزوج لانو مستحيل تكملو كون كل واحد يشد فرايو ويزكر
لونار: ديجا مخممتش اصلا نكون معاه
آيلا: مدامك حاباتو يعني مخممة تكوني معاه ، مكانش منها تحبيه هكاك برك
لونار: اففف علاش حافظتني هكاا منقدرش كامل نخبي عليك ولا نكذب
آيلا: ههههه الله غالب
وصلو للريسطو ، دخلو تغداو وراحو يدورو ورجعو للدار