جمعتنا القرابة *الجزء الثاني* (أنت قدري)

Partie 84

كان واقف مقابل الطاقة ويشوف لحت مشبك يديك اللور ، حتى يحس الباب تفتحت وهو يدور بالعرض البطيء ، يشوفها ، عقد حواجبو ...

فهمت من ملامحو بلي عرفها ، قدمت شوية بجيهتو وهو طلعها وهبطها بعينيه
لورين: صباح الخير سي مصعب ***** ، تبسم فالجمب وحط يدو فجيبو
مصعب: مولات الكيثمان ، تبسمت وأشارت بيدها
لورين: تفضل ، راحت قعدت فالمقدمة تاع الطابلة وهو كان يمشي بثقل وجبد الكرسي لي حداها وقعد وهو يصكاني فيها ، حتى لمح الخاتم فيدها وهو شافي مليح بلي المرة اللي فاتت مكانتش لابستو لانو عينيه ميراطيو والو خصوصا بنت كيما لورين تخليك تبقا تطلع فيها ، قاطعو صوتها
لورين: نعرفك انا لورين ***** بنت صرب ***** .. يعني هاد الشركة فرع من الشركة الأم saden électronique وأنا المسؤولة عليها ، عوج راسو
مصعب: متشرفين .. يضهرلي منشقاش نعرف بروحي ، اشار للمناجر .. راكم تعرفو كلش عليا ، تبسمت
لورين: واش يلزم ايه .. donc si normal راهي عندك question mark ❓.. علاش عيطنالك ، حرك راسو بايه ، خزرت فالمناجر اللي قدملها الطابلاط وهو ملاحظ كلش ، قدمتلو قدامو الطابلاط وهو شاف ليها .. هادو des électroniques تاع ماركة ألمانية جديدة فالسوق وعندها qualité روعة سواء فالتلفونات ، les pc .. ولا les électroménager .. وحنا عقدنا صفقة معاهم يعني راح تكون كاينة fabrication en algérie ، حرك راسو بايه وهو يسمع باهتمام .. وحنا رانا نحوسو على نقاط البيع .. يعني واحد كيما نتا يكون عندو خبرة فهاد المجال .. وندخلو معاه فصفقة ندعموه حنا وهو عليه البيع
مصعب: d'accord .. بصح علاش اختاريتوني انا .. كاين بزاف خلافي
لورين: فكل پلاصة راح تكون عندنا نقطة بيع .. ونتا كنت الشخص المعين فالبلاصة اللي راك تخدم فيها .. وادا علاش اختاريناك .. كنت مطابق مع الشروط .. عندك حانوت كبير ومتحوف وزيادة راح تزيد توسع يعني يمكن تدخل حتى l'électroménager .. نهار جيت كانت الخدمة تاعك مليحة .. يعني تعاملك .. واهم حاجة هيا الخبرة
مصعب: دوكا نهدرو على الأرباح شحال ليا وشحال ليكم ؟
لورين: 70% ب 30%
مصعب: فكلش ولا غير سلعتكم
لورين: لالا غير السلعة اللي ندعموك بيها .. الباقي خاطينا ، حرك راسو ، يعني العرض عاجبو وراح يزيد يدخلو أرباح بصح النسبة بانتلو قليلة ، مسح على لحيتو
مصعب: وكون واحد من الچاراجات لخرين ندخل فيه l'électroménager وتدعموني .. تبقا النسبة هيا هيا 30% ! ، حركت راسها بايه
مصعب: قليلة شوية لالا .. تاع الحانوت عليا وكلش عليا + ماشي انسان جديد راكم تدعمو فيه .. شغل نتوما راح تستفادو باسمي انا خاطر سلعتكم جديدة ومشي دايرة اسمها مليح فالمارشي
لورين: شحال راك حاب ؟
مصعب: نديروها 45% ، ضحكت
لورين: ونتا مبانتلكش بلي بزاف لالا ؟ .. خاطر راح ندخلو معاك شركة غير فالتدعيم يعني الباقي نتا حر بيه وكيشغل راك تبيع كيما كنت اللول برك راح تزيد ربح ليك .. وعلى هادي انا نشوف النسبة زايدة شوية .. نقدرو نلحقوها ل 35% مليحة
مصعب: منقبلش ، شاف المناجر معاها وهيا هبطت راسها مغزلة .. ادا هادا ماعندك تقوليه .. انا نروح ، شاف معاها كي لقاها ماردتش ناض رايح وهيا تحبسو
لورين: 38% آخر قرار حبيت حبيت .. محبيتش ربي يسهل ، تبسم فالشط وهو دايرلها بالظهر ، دار عندها
مصعب: متافقين .. المهم وقت تحبو ديرو العقد الحانوت تعرفوه تقدرو تتواصلو معايا .. تبقاو على خير ، خرج وخلاها تغلي ، وشادة على l'invitation اللي جابها معاه حتى كرفصتها
لورين: واش حاسب فروحو هادا ؟ ، بقات دور فعنقها ، كلش عندها عادي غير الخدمة شرسة ومعندهاش العاطفة تخدم عقلها ولأول مرة طيح فواحد يزيرها هكدا لانو اغلبيتهم كي يعرفو اسم الشركة يقبلو بدون شروط غير هوا ، ناضت والمناجر وقف معاها
لورين: اتواصل معاه خبرو mardi يجي نسينييو على العقد
المناجر: حاضر
خرجت رايحة لبيروها وهيا تنحي ف la veste ، كانت مقلقة وزادلها هادا ، فتحت الباب وهو يقابلها bouquet de fleurs 💐 كبيرر غوز فوق البيرو ، طلعت حاجبها وراحت للبيرو ، هزتو تشم فيه متبسمة ، بدللها الموود كامل ، شافت كارط هزتها كان مكتوب فيها