جمعتنا القرابة *الجزء الثاني* (أنت قدري)

Partie 97

فوحد البلاصة بعيدة بزاف فالجبل كان كاين مخزن قديم مكصر شوية ، ودايرين بيه الحرس من كل جهة ، فوحد البيت تماك كانت راقدة على وحد المطرح مسّخ فاقدة الوعي بعد الضربة اللي مدوهالها على راسها ، مقابلتها فالجهة لوخرة المختطفة الرئيسية اللي بسبابها راحت فالجرة ، كانت بدات تتفاطن وتفتح عينيها

شافت مع السقف اللي كون يزيد شوية يطيح عليها ، بدات تتقعد بلعقل ودور فعينيها على البيت اللي راهي فيها ، حتى تشوفها مغاشية قدامها ، معلابالهاش كيفاش راهي هنا معاها ، قدمت عندها وبدات تحرك فيها بالشوية
إيلصا: ميرال .. ميرال .. نوضي ، حطت يدها تحت راسها وهيا تحس بحاجة سخونة ، جبدت يدها وهيا تشهق .. د..دم .. م..ميرال ، بدات تخبط فيها بكفوف يديها ، بصح والو ، ناضت للباب اللي كانت قدامها تخبط بيديها ورجليها .. افتحو الباب الطفلة راح تموت .. افتحو الباب ، بقات تضرب حتى عيات وكل مادور تشوف مع معاها تزيد تخبط بكامل جهدها ، شوية وتفتحت الباب بزور اللي خلاتها ترجع اللور حتى قريب ما طاحت ، دخل راجل طويل ومعضل كيما les gardes اللي عندهم فالدار بصح هادا شكلو يخوف كتر وواشم وفرطاص ، بقات تخزر معاه وترمش مخلوعة
الراجل: واش كااين علاش هاد الخبيط كاامل
إيلصا: ااا .. رر .. راهي ت.تنزف بزاف من راسها ، عقد حواجبو وبدا يقرب وهيا تبعد حتى شافتو انحنا عندها وشاف دم فوق المطرح ، دار خزر معاها وناض
الراجل: دوك نشوف ، حركت راسها بايه وهو خرج غالق الباب ، راحت عندها وقعدت قدامها ودموعها يطيحو هيا من طبعها خوافة وزادتها هاد الحالة ..

خرج الراجل لبرا وهز تيليفونو يعيط
.....: وي
الراجل: سيدي هاديك الطفلة اللي شفناها صورت le matricule وجبناها .. راهي تنزف
.....: وشن ؟ .. مشي قلت متآديوهمش !
الراجل: ماشي حنا اللي جابوهم سيدي .. بالاك كانت حابة تهرب ولاا .. ، قاطعو
.....: جيبولها اللي يداويها .. ازربو .. وعيطولي كي تفطن
الراجل: حاضر .. ، غلق عليه وحط يديه على البيرو مشبكهم ، مدة وصلتو notification ، هز التلفون وبقا يقرا فالمعلومات اللي كان طلبها يبعتوهالو على الطفلة اللي راحت جرة بسبة إيلصا ، شويا وعوج فمو للجمب
.....: هممم .. فاميلية تسما .. ميرال ***** .. زوينة ماعليهاش ..

لحق جاري ، دخل ديراكت للدار وراح بجهة الصالون ، لقا وجدان دايرة مندبة بلبكاا وكامي حتى هيا لأنو خلاص بدات طيح الظلمة وتيليفونها مغلوق وهادا خلاها تزيد تتقلق وتشك بلي حتى هيا تخطفت مع ميرال وهادا التخمام اللي جاهم كامل ، بصح علاش ؟ فراس اللي كان كابوسهم ومات ، شكون هادا اللي عندو عداوه مع العايلة وخطف بناتها وشكون بنات ال ***** ، دور براسو على الصالون وراح عند حسام جبدو يفهمو وهو وجهو صفر
أديم: فهمني مليح
حسام: شوف ...

حط يد على جبهتو ويد على خصرو وبقا رايح جاي يدور بتوتر ، واش هادا حاس روحو في فيلم هيندي ، دار عند آرام
أديم: وين لقيتو الطونوبيل تاعها ، نطق ينيس اللي جا هابط من فوق خاطر كان مع مرتو اللي تخلعت وطلعتلها l'attention
ينيس: فالطريق تاع centre
أديم: يعني خطفوها قدام ربي وعبادو ؟ .. و la police واش راهي تقول !
آرام: حتى تفوت 24ساعة دوكا ميقدرو يديرو والو
أديم: كيفاش ميقدرو يديرو والو .. واش هاد القانون .. كون كاشما يصرا فيهم قبل ماتجوز 24 ساعة ، بقاو ساكتين عارفينو غير الخوف راه يخليه يدير هكاا ، سمعو خطوات جايين وهوما يطلعو راسهم معاهم كان صرب ووراه البقية ، وجهو فاسد وباين عليه القلاقة ، وقفت عندو وجدان وهيا حمرة بلبكا
وجدان: واش قالولك .. وين راهي ! ، بقا ساكت وهيا راحت عندو طبع فيه .. راني نهدر معاك جاوبني .. بنتي نحبها دوك ، طلع عينيه فيها بالزعاف ووقف طاير فيها
صرب: راهي في جيبي وخبيتها عليك .. وين علابالي أنا .. مكان حتى خبر عليها
وجدان: راها بنتي منقدرش نرقد كون متبانش ليوم
صرب: لالا سامحيني انا ماشي بنتي .. راجل يماها .. ومنيش حابها تعيش معانا ، دور عند ماريا .. اديها من قدامي يرحم باباك راهي طلعتلي الخراا لراسي خير مانصمك دين مها بكف هنا ، ناضت عندها ماريا تجري جبدتها مطلعتها معاها بسيف وتبعتها آزار اللي طلعت حتى كامي معاها اللي كانت غايبة عن العالم غير الأفكار السيئة دور فبالها ووراهم لونار ، اما فطوم فبقات معاهم لتحت قلبها ضارها على حفيداتها
فطوم: بلعقل اوليدي متتقلقش .. راهي تهدر من الخلعة
صرب: علاش بنتك خلات شي عقل .. حسبتها بنتها وحدها وانا عاجبني الحال .. كي بنتي مخطوفة
صهيب: خلاص الله ياودي .. دير عقلك مع النساء ياك تعرفهم فهاد الحالات .. يطير المخ ويبقا غير الراس
آرام: وواش حنا مانديرو والو نبقاو هكا
راسم: واش راح نديرو مثلا ؟ .. رجالنا وبعتناهم يحوسو و la police غدوا يبداو خدمتهم وحنا واش نبقاو ندورو برا بلا فايدة ، مسح على وجهو وتقعد ، ومروان باقي يدور وغير يسمع فكلامهم وكل مرة يعيط لرجالو يستفسر
أديم: لورين علابالها ؟ ، حرك صرب راسو بلالا
زاكو: غير خليوها متخلعوهاش غدوة كي تكمل الإجتماع راح تجي وتعرف ، حرك راسو بايه وبقا يشوف مع السقف ..