جمعتنا القرابة *الجزء الثاني* (أنت قدري)

Partie 109/110

....
خارج من الدار رايح يجري 🏃 ، شافها تخلص فالطاكصي اللي وصلها لابسة رسمي ، غير طلعت عينيها وجاو فعينيه دورتهم تمتم ، شدت الصرف وعدات قدامو بلا ماتحلبو ، وهو ضار متبعها حتى دخلت لداخل ، وجبد تيليفونو من جيبو ، دار النيميرو اللي حاب يعيطلو وكمل ماشي
أديم: اهلا .. قولي كيفااااش ؟
• فرات .. بصح سمحلي باينة متجوزهاش عليها .. بقات تأكد كيفاش متفوتش l'entretien
أديم: مي مفاقتش ؟
• لالا .. متخممش .. اسمع نخليك دوك راني مشغول ومبعد نهدرو
أديم: معليش .. وصحاا كي رونديتلي هاد service
• متمسخرش ياخو .. مبيناتناش
أديم: علابالي .. ايا يامنعاش ، غلق عليه وركب les AirPod فودنيه وديمارا يجري ...

...
فالعشية :
داخلة للدار كالعادة ميتة بلعياء شادة طالونها فيدها وتمشي وتكركر فعمرها ، قابلتها فطوم هابطة
فطوم: واش العازب ديالنا جيتي
لورين: جيت فطوم .. جيت وراح نسمع الكاصيطة تاع كل يوم
فطوم: الكاصيطة هادي نهار تطفر فيك تما اتفكريها
لورين: رجعت نحس روحي خمسين سنة بهدرتك
فطوم: ماكيش خمسين سنة بصح عيشة راجل
لورين: آه يا ماني آه كلامك شحال يقطر عسل .. كون مجيتش نعرفك نقول تكرهيني
فطوم: راني نديرلك فقلبك يالجايحة
لورين: لالا الله يبارك شجعتيني غدوة نتزوج .. يهديك ربي فطوم ، جبدت روحها ومشات طالعة فالدروج ، مقدها العياء تزيدها هيا ..

دخلت لبيتها وبدات تنصل فحوايجها وراحت direct للدوش حطت البينوار يتعمر وهيا جبدت حوايجها حطتهم فوق الفراش لمت شعرها كعكة ودخلت فيه تسترخي مغمضة عينيها مع حطت فالماء produit يهدىء الأعصاب والصابون طلق ريحة شابة جابولها النعاس ..

مدة تفاطنت على يدين يحركو فيها ، شافت وين راهي لقات عمرها وسط البينوار وفالدوش عرفت روحها غفات من قوة العياء
ميرال: لورين راكي عيانة ختي ، شافت عندها وحركت راسها بايه .. كملي دوش تلقايني برا نستناك ، خرجت مخليتها وهيا كملت دوشت ولبست sortie de bain ديالها وخرجت عندها شعرها شامخ وخدودها حمرين
ميرال: بصحتك
لورين: الله يسلمك ، راحت للقجر جبدت المشطة تاع الشعر تسلكو بيها
ميرال: جيبي لهنا ، تبسمت وراحت عندها قعدت فالبنك وهيا بدات تمشطلها فيه بلعقل ، ستحلاتها قريب زاد جاها النعاس مرة وحدوخرة
ميرال: لورين
لورين: اممم
ميرال: واش رايك كون ديتي congé ريحتي شوية .. وخرجتي تبدلي الجو برا لبلاد ، تنهدت
لورين: راني عيانة moralement ماشي physiquement
ميرال: علابالي واش جاز عليك ماشي ساهل
لورين: الحاجة اللي مصبرتي .. علابالي بلي ربي ادا حب عبد ابتلاه .. وبعد هاد الشي كامل راح تجيني فرحة كبيرة
ميرال: نشاله ياربي .. حبيت نسقسيك .. محسيتي بوالو كي حبستي مع أديم ؟ ، سكتت شوية
لورين: نقولك الصح .. والو .. برد قلبي من جيهتو وحد البردة عالم بيها غير ربي .. من غير حسيت بلي ضيعت وقتي معاه وهو ميستاهلش
ميرال: بصح كنتي تمديلو des chances باش متظلميهش .. هو اللي ميسواش قاعد يلعب بيك وكون مقصيتيهاش نتي يبقا يلعب بيك حتى يكره
لورين: خلاص خلينا منو .. حكايتو بقات فهاداك الدار
ميرال: والله وتهنينا من وجههم ، شافت فيها بالشط .. قصدي وجهو .. احم .. حقا علابالك شكون جاي اليوم عندنا ؟
لورين: شكون ؟
ميرال: مصعب ، ضارت عندها
لورين: انعاااااام ؟ .. فحق علاش ؟
ميرال: پاپا عرضو .. بصح معلاباليش واش من سبة بالاك باش يشكرو على نهار عاونك فالعرس ، طاحت فوق لفراش
لورين: هاداك مابقا ليوم وكمل
ميرال: علاش وشبيه مصعب ؟ ولا راكي حشمانة تشوفيه كي عرفتي بلي تعجبيه
لورين: لاحول ولا قوة إلا بالله .. شوية من الطاقة اللي بقاتلي خليني نكمل بيها العشية تاع اليوم ، عوجت فمها
ميرال: ايه معليش .. نخليك توجدي عمرك ، غمزتها وراحت وهيا غرست راسها فلفراش ...