كانو مجموعين فالصالون يستناو فيه خصوصا كامي اللي كانت على أحر من الجمر ، سمعو صوت الطونوبيل حبست ، خرجت هيا اللولة وهوما وراها والبسمة على فمها من الشق للشق ، الرجال بقاو لداخل ومعاهم لورين اللي كانت مشي حابة تتلقاه دوك بصح سيفو عليها ، لحقت عليهم فطوم بصينية فيها التمر والحليب اللي كانت موجدتها لاستقبالو ، شافو الشوفور هبط راح يجبد الكابات وبقاو يستناو فيه يهبط حتى هوا ، قدم عندهم الشوفور جار الفاليزات ، وماريا قدمت للطونوبيل تشوفو ادا لداخل
ماريا: مكانشو ! ، دار عندها الشوفور
الشوفور: اه مجاش معايا قصدي قالي اسبقني وانا دوك نجي
فطوم: وليد الحرام واحنا خارجين نستقبلوه تقول هاد الوزير اللي راح يطل علينا ، شافت وجدان مع كامي اللي تنشعت نوعاا ما وهدرت مع يماها
وجدان: اشش يما خلاص بالاك ضهر عندو شغل
فطوم: واش من شغل يسبق عايلتو هادو ربع سنين وهو هامل بعيد على مواليه ودوكا ستخسر يبدا فيهم ... درية آخر زمان يلعبو بينا كيما يحبو
كانت تسمع فكلامها وغير تفور لدرجة كون واحد يهدر معاها تطرطق فيه وزادلها كلام فطوم اللي كب الزيت على النار ، دخلت ديراكت وطلعت لبيتها بلا حتى كلمة ، ربعت يديها وخزرت ففطوم
آزار: ريحتي دوكا يما ؟ كيشغل هيا خاصها ، دخلت مغزلة وماريا وراها
وجدان: يما متقدريش تحكمي لسانك شوية المراة اللي فيها كافيها خرجت بالشوقة تشوف وليدها تلقاه مجاش ونتي تزيدي على مابيها ، عوجت فمها
فطوم: انا هدرت الحق ... ديجا نتي وياها من وكتاش رجعتو تتفاهمو مشي كنتو كي العديان ؟
وجدان: الله يهديك يما اللي فات مات والطفل دا حقو وزيادة ... امشي ندخلو ، قدمت عندها باش تشدها ، وهيا تعطيها السنيوة
فطوم: هاكي هادي استقبليه نتي مالا انا منيش قاعدة للعب الدّر ، دخلت ووجدان تنهدت ولحقت وراها رايحين للصالون
ماريا: مفهمتش انا هادي يبعت حوايجو وهو مايجيش
صهيب: الغايب عدرو معاه
آزار: غاضتني كامي خرجت ميتة بالفرحة ، زاكو عوج راسو مقلق وعلابالو مدامها طلعت لبيتها تكون راهي تبكي
صرب: نشاله ميكون والو اما المجية راح يجي دوك ولا مبعد
فطوم: مابيه والو هادا واحد مدايرش الاعتبار لعايلتو برك
وجدان: يمااا
راسم: منضلموهش كي يجي ونعرفو
فطوم: كان قادر يعيط ، قلبت ماريا عينيها منها وآزار بقات تحرك فرجلها مقلقة ، زاكو ناض من قدامهم بلا حتى كلمة وطلع عندها لفوق وهوما شافو معاه عرفوه منشوع حتى هوا
دخل للبيت سمع شهقاتها وهو يغمض عينيه ، راح عندها ووقف مربع يديه ، كانت قاعدة فلفراش وحاطة وسادة على حجرها وتبكي
زاكو: فهميني برك علاش البكا دوك ؟ ، شافت معاه وهزت يدها
كامي: ربع سنين ... ربع سنين وانا محروقة عليه من نهار راح فالعرس مزدتش شفت وجهو من دون هاد العيمان فالجرنان كيما انا كيما الناس ... و. ووليوم كي قلت خلاص جاا وليدي وفرحانة بيه يديرلي هاد الهدة قدامهم كامل ؟ ، قدم عندها
زاكو: علابالك واش عندو بش ماجاش ؟ ... لالا! ... يمكن يكون عندو شغل ... يمكن تلاقاوه صحابو راح معاهم ... تسما متحكميش عليه حتى يجي ويفهمك ، مسحلها الدمعة اللي طاحت ... علاش راكي تكبري فالحكاية هكاك
كامي: فهمني برك انا مفهمتش واش الحاجة اللي تشغلو ... زيد صحابو اهم من والديه وعايلتو اه ؟ ، مالا حتى انا ميهمنيش ومنيش راح نتلاقاه ، قدمها عندو وحضنها
زاكو: راكي من الحرقة تهدري هكا علابالي كي يجي راح تفتحيلو يديك ... نوضي اغسلي وجهك وخلينا نهبطو لتحت ، بعدت عليه
كامي: منيش هابطة ، مسح وجهو وستغفر
زاكو: يا مراة اخزي الشيطان
كامي: انا هدرت وخلاص يحب يجي يشوف يماه هنا اللهم بارك ميجيش ربي يساهل عليه منيش مشتاقة فوجهو كيما صبرت على فراقو ربع سنين نقدر نزيد نصبر كتر ، هز روحو وناض
زاكو: اسيدي هو غلط معاك وبنتك ؟ ياك ليوم l'anniversaire تاعهم للزوج
كامي: خليني منها هاديك تاني مصباح وانا نعيطلها ... وين راكي؟ ... ازربي ارواحي للدار ... جات ؟ .. لالا ... تقول راني نطبل فالحيط ... كي هيا كي خوها كلامي دايريني تحت الصباط معنديش كامل القيمة معاهم ... نقولك حاجة الناس سعات لولاد وانا وياك سعينا الخلا ... واحد فيهم ما مسچم
زاكو: خلاص نتي خيرتي راحت بالك كي تقعدي هنا ... معليش دبري راسك المهم منسمعكش تبكي ولا تمرضي فروحك ، صحتك أهم ، مردتلوش وهو خرج مقلق هبط لتحت عندهم
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
