جمعتنا القرابة *الجزء الثاني* (أنت قدري)

Partie 35

دخلت الصباح لبيتها ، هازة سنيوة تاع الفطور ، حطتها فوق الطابلة وقدمت عندها ، قعدت قدامها ، تمسحلها على وجها اللي مازال اصفر ، بدات تتفاطن وهي تحس بلمسات خفاف على وجهها وشعرها ، شافت معاها لقاتها فطوم ، تقعدت
فطوم: صباح الخير
لونار: صباح النور الزينة ديالي ، قدمتلها السنيوة وحطتها فوق حجرها
فطوم: افطري تشوف قدامي شتي نقص الماكلة واش دارت فيك ، راكي قصبة تمشي فو الارض
لونار: انا قصبة خسارة عليك فطوم عندي taille mannequin
فطوم: طاي مانكين اللي جرات وراك هادي تسميها طاي هاربة
لونار: تسما جيتي تعيبيلي دوك على la taille تاعي مع صباح ربي
فطوم: مانيش نعيب بصح لازمك تاكلي باش تزيدي شوية ، علابالك الرجال تاعنا يموتو على وحدة معمرة ماشي كيما الgور ، خبطتها خفيف لكتفها
لونار: آه يافطوم واش راكي تهدري
فطوم: علاش راني نكذب !
لونار: هادوك تاع بكري وقت جدي وجماعتو بصح تاع دوك لالا
فطوم: يا المكلخة الرجال كامل يحبو وحدة ملحمة ، شوفي برك كون تسقسي آرام كيفاش يقولك ياك راهو من الجيل تاع دوك ، عقدت حواجبها شوية
لونار: شكون قالك يحب وحدة سمينة
فطوم: ماشي سمينة الشحوم تدلة بصح معمرة ، يعني المناطق الأنثوية يكونو معمرين راكي عارفة ، غطات على وجهها
لونار: اخلايا فطوم رديتيني نهدر معاك فوحد السوجي لا حول ولاقوة
فطوم: اسكتي يا المكلخة اني نعلم فيك
لونار: لالا يكتر خيرك نقعد مكلخة خير ولا تهدريلي فسوجي هكاا
فطوم: افطري افطري واقعدي قصبة على روحك الموهيم متمرضيلناش وخلاص واللي يحبك راح يقبلك كيما راكي
لونار: هاي الهدرة يحبني كيما انا منبدلش روحي علاجالو
فطوم: علاشش انا قولتلك اتبدلي علاجال واحد ، انا مديتلك مثال بآرام كيفاش يحب ، هو يحب مرتو هكاك نتي راجلك يحبك هكا ، سكتت لونار معجبتهاش هاد الجملة ، شافت معاها فطوم وناضت ماشية متبسمة مخليتها
فطوم: هكدا نكون ديت جوابي

أما لونار بقات تخمم ، زعما صح يحب وحدة عندها la taille ، تفكرت حنان l'ex تاعو ، هيا صح رقيقة بصح المناطق الأنثوية تاعها بارزين بزاف ، يعني فطوم عندها الحق ! ، تنهدت وخبطت وجهها

لونار: وانا واش دخلني فيه يحب الرقيقة ولا العريضة يتهارد ، تنهدت وجاوها الدموع ، وكملت تهدر ، علابيها مراهش يشوفني انا ماشي type تاعو ، هزت السنيوة وحطتها فوق الطابلة ، وعاودت غمت روحها (les règles مسكينة كملو عليها)

جيهة ال 9 تاع الصباح هابط لتحت ، عيط لمليكة ، جات عندو
مليكة: صباح الخير موسيو آرام كشما تحتاج
آرام: طلعتو لفطور للورين ؟
مليكة: ايه طلعتولها الحاجة فطوم ، بصح رجعنا السنيوة كيما راهي ممست فحتا حاجة ، عقد حواجبو
آرام: راهي مريضة لازمها تاكل ، روحي جيبيلي قهوة ومعاها وجديلي سنيوة وحدوخرة انا نطلعهالها
مليكة: حاضر ، راح قعد فالصالون يخلط فتلفونو الوقت اللي تجيبلو واش قالها ، حتى شافها جاية ، ناض شدها عليها وطلع ، راحت مليكة للكوزينة ، شافت فطوم تخدم فالفطير ، راحت عندها
مليكة: الحاجة راني مديتلو السنيوة وراهو طلعها
فطوم: يعطيك الصحة
مليكة: بلا مزية ، راحت مليكة وفطوم بقات تقلب فالفطير وهيا مبتسمة خاطر هيا وصاتها تقولو بلي مكلاتش