جمعتنا القرابة *الجزء الثاني* (أنت قدري)

Partie 113

...
وصلو للدار هبطت هيا اللولة طالعة وتسقط فحوايجها من الباب باش تلبس پيجامتها ترقد direct ، لاحق وراها ويلم فقشها اللي كانت تطلق فيه فاللرض ويضحك عليها كانت كيما السكرانة ، اما هيا غير فتحت الباب دخلت للدريسينچ بدلت نحات مكياجها بالزربة غسلت وجهها وسنيها
إيلصا: افففف مزال نزيد ندير la crème hydratante والشيء لوخر ، طل عليها من الدريسينچ وهو ينحي فالتريكو
مروان: ماشي محتمة كل يوم تضربي ساعة تما .. ادا عيانة ارقدي
إيلصا: بصح هكا يديرولي التجاعيد مع الوقت
مروان: وانا نحبك بكل حالاتك ، عاود دخل هز حوايجو باش يدوش وهيا كانت ترطب فوجهها
إيلصا: راك تهدر منك صح ولا كي يلحق الوقت تبدل رايك ، كان يردلها من داخل
مروان: امم حنا نقولو هكا ومنا لتما نشوفو .. بالاك تكون كاينة وحدة صغيرة عليك وشابة تدي بلاصتك ماتدري ، حكم ضحكتو ، وهيا كمشت حواجبها مشي عاجبها الحال
إيلصا: هكاا ، ناضت مزعفة دخلت عندو وهو محبش يضور جيهتها .. مالا وحدة صغيرة وشابة تدي بلاصتي
مروان: اممم ، ضار رايح عندها وهيا مشات مزعفة مخلياتو ، حتى لقاتو جابدها محاوطها من خصرها بيديه وضهرها على صدرو لاسق
إيلصا: اطلقني .. خليني نروح نرقد ، كانت تحوس تنحيلو يديه بصح مقدرتش ، غرس راسو فعنقها يبوس ويهدر
مروان: اركحي
إيلصا: قلتلك خليني
مروان: مفهمتش علاش زعفتي ؟ ، طارتلها وناضت تعيط
إيلصا: منيتك ؟ .. تقولي نبدلك كي طيحي وتسنا فيا نسفقلك ونقلك براڤو واقيلة .. عندها الحق ماني فطوم اللي كانت تقولنا .. لي دير لامان فالرجالة غير اللي جابتها هجالة
مروان: هكاا ؟ .. نتي عارفة بعدا بشكون راح نبدلك ، جبدت روحها منو وجات مقابلتو وجهها ميتفسرش
إيلصا: لاااا مليحة وراك موجدها من دوك .. مينخافش عليك .. كاين الريزارڤ .. روح عندها دوك علاش راك معايا يمال .. علاش تعلق فيا ومبعد تخليني .. رووووح ، ناضت تسوغ وتبكي وتضرب فيه لصدرو وهو غير يشوف فيها كيفاش رجعت تنفعل وتمتم تكبر المواضيع وحدها وكان غير قصدو يچصر معاها كيما بكري ، خاطر من العادة تديها بالضحك وتكمل هيا تتمسخر معاه ، طلقت منو وهو يقدم عندها وهيا تبعد ... بعاااد عليا .. خليني متمسنيش ، جبدها عندو غرسها فصدرو يحوس يهدي فيها ويمسح على شعرها
مروان: اششش خلاص خلاص كنت نتمسخر برك .. وحدة مراح تدي بلاصتك كونك هانية .. نتي هيا الكل فالكل وراح نبقا نحبك بكل حالاتك ، جبدها شوية وحكم وجهها بزوج يديه يمسحلها فالدموع ... خلاص حبسي علينا هاد الدموع ندمتينا يالزح الواحد يجي يتمسخر يكملها حاصل الدموع والخناين على والو ، كانت تهدر بصوت طفولي مخلط مع الدموع
إيلصا: ب.. بصح كنت تهدر منك صح ، ضور راسو يستغفر
مروان: وشبيكي من اللي جينا لهنا رجعتي هكا .. زعما متعرفينيش حتى تخممي فيا صح نبدلك ، غرست راسها فصدرو
إيلصا: معلاباليش بصح غير خممت فيها برك وجعني قلبي ومحملتش .. نتا تاعي وحدي انا برك .. سمعت مروان والله غير نقتلك ونقتلها معاك روحو لفوق وكونو مع بعض المهم مشي قدام عينيا ، ضحك وزير عليها
مروان: مغيارة تاعي .. حتى بنتك ومتحبيهاش تدي بلاصتك ، طلعت راسها وشافت فيه ماشي فاهمة .. علابالك واش قصدي بصغيرة عليك وشابة .. راني على بنتنا .. خاطر حتى وحدة منقدر نشوفها خيرمنك منا وعلى 100 سنة من غير بنتي اللي راح تجيبيها نتي ، ضحكت والدموع بداو يطيحو .. خلاص كيما درنا معاك ماسلكنا الدموع فيها فيها ، مسحت دموعها بكفوفها
إيلصا: دوكا راني نبكي علاخاطر مكنتش نستنا فيها ، ضحك وزير عليها
مروان: اااه يا مرتي اااه واش درتي فيا وواش راح تزيدي ديري منا وفوق ، هزها بين يديه وهيا معلقة فيه وتتبسم من اللي قالها غير بنتك اللي تدي بلاصتك وهيا فرحانة وزاد حماسها باش تحكيلو ليوم ، حطها فالفراش وغطاها
مروان: ارقدي ندخل ندوش ونجي ، جا رايح شدتو من يدو
إيلصا: عندي حاجة لازم نقولهالك
مروان: ماشي دوكا راكي عيانة ارقدي وغدوة نهدرو
إيلصا: بصح ، قاطعها
مروان: اشش خلاص يالله ، باسها من راسها وراح دخل يدوش ، بقات تلعب بصباعها وقالت معليش خلي غدوة نقولو ، حطت راسها وغفات ، اما هوا فدوش وخرج لابس شورت يمسح فشعرو قدم عندها رما السربيتة وتكسل قدامها محضنها ورقد...
...
صباح جديد وأحداث جديدة :
...
عند مصعب:
خارج مچودها من يديها وهيا عيانة ومشي قادرة تهدر وبسيف باش كانت تمشي ، وانفال وراهم راحت عاونتو فتحتلو الباب تاع الطونوبيل ركبها وركبت حتا هيا وديماراو للدار ، مسافة الطريق كانو وصلو ، ماجاء يهبطها كانت صوراية فتحت الباب وخرجت عندهم شارقة ومخلوعة على ختها
صوراية: موفيدة ختي راكي مليحة
مفيدة: ..... ، شاف عندها مصعب وتنهد
مصعب: خالتي اديها لبيتها وبدليلها وحطيلها تاكل كاش حاجة ، حركتلو راسها بايه ودخلت مچودتها ، اما انفال فبقات تستنا فيه يدخل ، شاف فيها وهيا نطقت
أنفال: نتا متدخلش
مصعب: امم ، جا رايح قاطعتو
أنفال: وين مصعب ؟ ، ضار خزر فيها مطلع حاجب
مصعب: مشي كيشغل راكي تدخلي فحاجة خاطياتك
أنفال: لالا برك كي عيان قلت تريح
مصعب: مبعد نريح ، راح وخلاها وهيا دخلت تنفض فعمرها
أنفال: راه رايح عندها .. اففف ، شافتها رانية
رانية: علاش راكي تاكلي فروحك صباح ربي ، خزرت لبرا .. ولا حطهملك سخونين على قلبك هاد الصباح
أنفال: طيري من قدامي خير مانخبطك .. منيش قادرة على سوقك تاني
رانية: مفهمتش وقتاش ديري قيمة لعمرك هو ماشي سامع بيك ودايرك كيما ختو ونتي حالة فمك فيه كي البهيمة .. نورمالمو تحشمي على روحك قاعدين فدارهم ويظل يلقط فينا من الزنق وتخممي يخزر فيك .. باينة بلي راح يستحقرك
أنفال: بلعي مصعب مشي هكااا فهمتي متقارنيعش بلوخرين
رانية: لا حول ولا قوة إلا بالله .. الرجال چااع هكا .. يحبو الحاجة الصعيبة .. اللي عزيزة .. على الأقل ادا باباك ماعطاكش العز ديريه نتي لعمرك وشوفي جيهة وحدوخرة ميعرفش خلف الكواليس اللي نتي عايشتهم .. خاطر مصعب حتى وكان يخمم يديك راح يستحقرك كي يتزوجك .. باباك محنش فيك تحوسي وليد الناس يحن فيك
أنفال: مراهش وليد الناس .. راهو وليد خالتي ونعرفو خير منك
رانية: لالا باااين شحال تعرفيه .. راني نقولك هكا باش نهار تلقايه خطب متندبيش سعدك
أنفال: مستحيل يخطب بخلافي ، طاحت تبكي .. أنا منقدرش نعيش بلا بيه .. لقيتو فالوقت اللي مكان حتى واحد فحياتي لا أب لا أخ .. كان هو السند ديالي .. ميقدرش يديرها بيا ويتزوج ، هبطت لعندها شدتها
رانية: شفتي نتي متحبيش مصعب .. نتي غير تعلقتي بيه كي عوضلك الحرمان تاع بابا .. أنفال ختي الله يرضى عليك حلي عينيك وخلي السيد يشوف حياتو tranquille .. خيرو سابق علينا منردوهولوش بالعكس ، ناضت
أنفال: منقدرش .. افهميني منقدرش ديجا نتي واش عرفك انا اللي كبر عليك ونعرف صلاحي مدخليش روحك فيا ، ناضت تعيط ورانية طلعلها الدم للراس ، هزت يدها وعطاتها كف
رانية: كبير فالشيفر والعقل الله ينوب .. ومدامك بهاد التكلاخ ندخل روحي حتى تتسچمي .. ودوكا بلعي راهي تسمع فيك خالتي مخصهاش همك فوق مراهي لامتنا جاية طامعة فوليدها وتزيدي تعيطي فدارها .. خي حالة متحشميش ، جات صوراية تجري على عياطهم
صوراية: واش كاين هنا نتوما الزوج خالتكم خلعتوها .. هبلتو واقيلة
رانية: شوفي يا توقفي لبنتك وتنحي عينها من مصعب يا انا نرجعها للطريق .. الراجل رجع دارو يحشم يدخل ليها فسبابها .. مكفاناش التبهديل اللي معيشنا راجلك تزيد تكمل هيا مابقالنا .. بزاااف اووو .. مشي مدلكم يدو تاكلولو درعو ، راحت وخلاتهم وأنفال غير تبكي وتخنون
أنفال: شفتيها ماما كيفاش ديرلي لخواتات يوقفو مع بعض وهيا تضارب معايا وتزيد تضربني من فوق أنا اللي كبيرة عليها .. اصبري مايكون عينها فيه وراهي دير هكا باش نخليهولها ، كانت راجعة ليها تضربها
رانية: عاودي واش قلتي .. مي نتي مريضة تاع الصح ؟ ، جبدتها صوراية
صوراية: رانية امشي لبيتك يالله
رانية: هادي متليقلها غير طريحة تشد بيها الطريق ، راحت مخليتها ولوخرة غير تندب
أنفال: ماما ... ، قاطعتها
صوراية: أششش .. ختك عندها الحق ، شافت فيها مخرجة عينيها .. صايي سيينا معاه محبش خلاص هاد الشيء مشي بالسيف
أنفال: حتى نتي ماما ؟ .. علاش راكو ديرولي هكااا .. حسو بيا
صوراية: نسقسيك .. حابة تعيشي الحياة اللي عشتها أنا وتتمرمدي فالزنق على كبرك بيك بولادك كيما أنا ، شافت فيها وحركت راسها ب لالا .. يمالا ادي لي يحبك مشي اللي تحبيه .. منزيدلكش من هادي ونتي خممي ادا كان عندك شي عقل ، راحت وخلاتها وأنفال الدموع محبوش يحبسو ومشي متقبلة فكرة مصعب ميكونش راجلها هيا ...