جمعتنا القرابة *الجزء الثاني* (أنت قدري)

Partie 93

بقات رايحة جاية تشد فصلبها تستنا فيه يجي ، وهيا مقلقة عليه طوّل بزاف وموالف كي يطول يعيط يخبرها
صوراية: يضهرلي راهو مع هاديك اللي جابها الصباح ، خزرت فيها
مفيدة: شكون هادي اللي جابها الصباح ؟
صوراية: معلاباليش كي دخل جابلك الدواء كانت راكبة معاه وحد الطفلة لقدام ، عوجت فمها وراحت قعدت وهزت تيليفونها ، لقات ميساج من عندو ، قراتو وكشرت ملامحها
مفيدة: بعتلي ميساج ومعيطش .. مشي موالف ، قدمت أنفال عندها قراتو ، جغللو عينيها بالدموع
أنفال: زعما يكون معاها ماما
صوراية: منضنش مصعب مشي تاع هاد الصوالح يعني يقعد مع طفلة حتى لهاد الوقت
أنفال: بصح كان مركبها معاه .. أنا ميحبش يخزر فيا même pas ، ناضت مفيدة المرض داير فيها حالة وتخمامها على مصعب وزايدتها هادي بالنواح كل دقيقة كي ماشي معبرها ، راحت لبيتها وغلقت عليها لباب وتكات malgré قلبها ممهنيهاش ..

صباح جديد ، فتحت عينيها وشافت مع السقف عرفت بلي ماهيش فبيتها ، تقعدت وهيا تمسح فعينيها وتتفكر واش صرا لبارح ، راحت غسلت وخرجت ، سقسات على يماها خبروها بلي رجعت للدار ، هبطت للكافيتيريا شرات قهوة وقعدت تشرب فيها ، غير كملتها طلعت لوين كانو حاطينو وقعدت فوحد الكراسا تما ومرة مرة طل عليه

ناضو الصباح وهبطو يفطرو كالعادة ، كامي كانت قالبة خليقتها وإيلصا كانت موجدة روحها باش تروح عند لورين ، كانو ساكتين ، سمعو حس وجدان داخلة ، راحت قعدت معاهم وهيا تمسح على راسها
وجدان: صباح الخير عليكم
كامل: صباح النور
أديم: خليتي لورين وحدها
وجدان: خليتها راقدة 😒
إيلصا: دوك نروح عندها أنا نقعد معاها
صهيب: وهاداك الولد كيفاش
وجدان: مزال حتى يفطن ونشوفوه مي حاليا حالتو مستقرة
ماريا: الحمدلله .. الله يشفيه ويردو لوالديه سالم
وجدان: آمين .. أنا نروح نريح ، طلعت لبيتها وصهيب وزاكو وراسم خرجو رايحين يخدمو ، مروان وإيلصا ناضو رايحين عند لورين ، آرام شد لونار وخرجو ، ينيس باس آيلا وخرج حتى هوا ، بقا غير هو قاعد معاهم شارد
ماريا: أديم متروحش تشوف لورين ، شاف معاها شغل فطنتو
أديم: نو رايح ، هز روحو وجا نايض ، دارت آزار عند كامي
آزار: أنا هاد الولد معجبنيش .. مشتيهش كيفاش تايه
كامي: والو مابيه .. ضايع يخمم شكون يخير بيناتهم .. وليدي ونعرفو .. بوالنسيوات ..

قاعدة ومرة مرة طلع التلفون اللي كان فيدها تشوف شكون زاد عيطلو ، كانو بزاف رجال باين بلي صحابو ويماه ، تنهدت معلية راسها تسوف مع الپلافون ، دارت تسوف للجمب خاطر سمعت صوت خطوات شافت إيلصا ومروان جايين عندها ، إيلصاا غير شافتها راحت تجري حضنتها
إيلصا: راكي مليحة ؟ ، حركت راسها بايه .. مصرالك والو نتي ! .. حركت راسها بلالا
لورين: ونتي راكي مليحة ؟ .. يدك كيفاش !
إيلصا: راني كي العود .. الحمدلله ، طلعت عينيها مع مروان اللي راح يطل على مصعب
مروان: حمدلله على سلامتو .. باين فيه راجل ونص ، ناضت إيلصا تطل معاه شافت شافت وحبت تعبر وخافت من مروان ، بصح مقدرتش تحمل 😅
إيلصا: راح نهدر وخلي تخلا .. شباب الله يبارك وعندو وحد le charisme كارثة ياديني حتى وهو مغيوب ، شدها مروان بالشوية زعما يخنق فيها
مروان: واقيلا راكي حابة يديرولك شمبرة مقابلتو
إيلصا: اصبر نفهمك مروان .. مروان .. هوا صح شباب وجذاب و corps الله يبارك بصح مشي كيما نتا عمري ، بقا يمخض فيها وهيا تتبهلل ، جابولها الضحكة
مروان: هاي ضحكت لورينو