جمعتنا القرابة *الجزء الثاني* (أنت قدري)

Partie 29

صباح جديد وبداية جديدة ناض الكل كل واحد راح شغلو ، ماعدا لبنات اللي ليوم كان نهارهم تاع التحواس فناضو فغرضهم ، لبسو وفطرو وخرجو ، فالطونوبيل لونار كانت تسوق وآيلا قدامها وايلصا ولورين اللور ، كانو حاطين الغنا ويحكيو وساعت يغنيو معاه المهم خالقين جو ، بداو يحوسو بآيلا داوها فالأول le jardin d'essai و مقام الشهيد تصورت تماك (مكانش اللي يروح ل alger وميروحلهمش خصوصا اول مرة) ممبعد راحو للجامع الأعظم لبسو عبايات واتصورو لداخل ، ممبعد راحو ياكلو
ايلصا: ضيعتوني بالشر ، فات النهار كامل وحنا من پلاصة لپلاصة ومكليناش
لورين: يختي تقوشي عندك غار تخزني فطرنا retard كيفاش حبيتينا نتغداو على ال 12
ايلصا: حبيتي ترديني كيفك نمشي بالطاقة الشمسية
لونار: انا حبيت نروح للقصبة ناكل السردين
لورين: ميكفيناش الحال نروحو غدوا
آيلا: alger كبيرة الله يبارك وحدها يومين وزيدلها شابة تهبل
لورين: مشفتيش les autres wilaya وهران ، قسنطينة ، عنابة ، ومنحكيوش على الصحراء ياختي
لونار: ايه عندنا كل ولاية واش فيها spécial
آيلا: حمستوني واقيلا نزيد نقعد
لورين: ماتروحيش وندوروك فالدزاير ga3
لونار: شوفي تاع ندوك ليهم كامل على ضربة مستحيل بصح وهران نقدرو ندخلوها فالحساب هاد اليامات
ايلصا: صح وزعما يخلونا
لونار: وعلاش لالا كيما alger كيما وهران الفرق منباتوش فالدار نهار ولا يومين مي رانا فالدزاير لالا ؟
ايلصا: مانعرف
لورين: علابالي بيك خوك المشعكك هاداك يدخل روحو فكلش
ايلصا: اممم يدخل روحو غير فيا محسوب ، غمزتلها وهيا تنبزت
لورين: فشكون راح يدخل روحو بخلافك نتي ختو
ايلصا: متلعبيهاش جايحة
لورين: اففف واش راكي تخلطي ، قربت منها لونار
لونار: علاش طلعتي حمرة مقالتش يدخل روحو فيك
لورين: انا تاني مقلت والو اففف
آيلا: مسكينة خلوها tranquille
ايلصا: حسبتلك رانا راقدين على ودننا مناش نشوفو كيفاش وليتو قراب ويخمم عليك وكداا ، اه !
لورين: راكي قلتيها قراب ، يعني صحاب
لونار: زعماا !
لورين: ايه واش حبيتو يكون بخلاف
لونار: انا قلت كاش قصة حب خاطر علابالي من جيهتك كاين des sentiments بصح من جيهتو الله اعلم مي بانتلي بداو يتكونو ، خبطت ايلصا لورين
ايلصا: صار هكدا يالكلبة تحبي خويا ومقلتيليش !
لورين: لونااار
لونار: وشن ياك منخبو والو على بعض
لورين: ماشي تفاهمنا ننساه وهاد السوجي خلاص هاداك النهار
لونار: ونسيتيه ! لالا ؟ خلاص مالا
ايلصا: شوفو فيا نتوما الزوج بالكفارة وصيام العام كيما تقول جدة الى زدت حكيتلكم حاجة انا ماشي ايلصا انا ماشي مراة
لورين: اي بداات
ايلصا: اسكتي نتي بعدا ، تحبك حبوبة طايحة فخويا وزيدي حبيتي تنسايه علاش مانعرف وانا آخر من يعلم
لورين: ماشي قصدي منحكيلكش كنت ماشي سور بلي نحبو حتى نهار شفتو فالأنيڤارسار تاعي قبل ربع سنين مع وحدة وغرت وبكيت شافتني لونار وحكيتلها وتفاهمنا ننساه ونكمل حياتي هادا ماكان ، ماشي قصدي منحكيلكش والله
ايلصا: اني نتقعد منيتك ، هادا كامل كان مجرجرك خويا الله يجيبلو كصرة نشاله الهايشة مخلي الزين كامل هادا ويشوف للمعوجات
لورين: خلاص ايلصا انا نسيتو رانا دوك just friends اصلا كان حب مراهقة
لونار: راكي سور ؟
لورين: ايه
ايلصا: بصح تبانلي هو راكي تعجبيه ! ، شفتو كيفاش يشوف معاك ويحرص عليك
لورين: لالا مكانش منها c just دايرني كيما ختو
ايلصا: ماشكيتش هاداك الشيء كامل وكيما ختو
لورين: خلاص اغلقو على السوجي تعيشو
لونار: ايه كيما تحبي ، كلاو البنات وكملو gصرو ورجعو للدار ، كل وحدة راحت لبيتها تريح