جمعتنا القرابة *الجزء الثاني* (أنت قدري)

Partie 60/61

صورتها مضببة قدامو من كترة مكان مدوخ ويفتح ويغلق فعينيه ، حتى فقد الوعي ضربة وحدة ...

لمار: لالا خوياا متغمضش عينيك ، بقات تضرب فيه ووالو .... ياربي واش راح ندير ، تفكرت الماء اللي كانت هازتو ، راحت جابت القرعة تشمخ فيه بصح مفطنش ، جبدت ريحتها وحطت شوية فيدها تشممهالو ووالو ، زادت حطتلو فالتريكو تاعو عمرتو بالريحة وفيدو وكيف كيف ، ناضت تخزر مع الحالة الطريق مافيهاش بزاف لعيباد غير الطونوبيلات ماشيين ، والكلينيك تاع الدولة مشي بعيدة بزاف .... ياربي كيفاش راح نقدر نهز انا واحد كيما هادا بكمالو...
كان جايز وحد الجان بالصدفة ، غايس فتلفونو وداير كيتمان ، راحت عندوو حكمتو حتى خلعاتو
لمار: خوياا تقدر تعاوني ؟ ، شاف معاها ونحا ودنة باش يسمع
الجان: وشن ؟
لمار: ياربي نقعد نعاود ، معليش ، تقدر تعاوني نوصل هاداك ، اشارت لأديم .... للكلينيك ، كان راح يجاوب لكن مخلاتلوش المجال وكركراتو معاها لعندو ... هز من تما خويا ، سلم امرو وراح هزو من الجمب لاخر ، ومشاو بيه للكلينيك حتى وصلو .... بالسيف ، دخلوه لداخل قابلوهم الفراملة شدوه عليهم ، دارت لمار عند هاداك الجان
لمار: يعطيك الصحة خويا وسمحلي عدبتك ، كان يعوج فكتفو ، شاف معاها متشنف وراح ... شوف على ديك الولاد تاع الزمرر كلمة مليحة ميعرفوش يقولوها كي الناس ، حكمت صاشيتها تاع الدواء وراحت قعدت فالكرسي

الساعة 11:30 تاع الليل :
قاعدة وحاطة راسها على الحيط تستنا الطبيب يخرج ، وحد ال 10 دقايق شافت الباب تفتحت ، ناضت عندو
الطبيب: نتي من قرايبين المريض !
لمار: اه لالا انا لقيتو طايح فاللرض جبتو برك ، ياك مراهو شارب والو ولا انا منعرفوش غير لقيتو فالطريق حبيت نعاونو ، تبسم على ردة فعلها
الطبيب: لالا مراهو شارب والو ، برك عندو grippe قاسحة شوية ، ويمكن تاني قلة الماكلة علابيها أثرت فيه بزاف
لمار: ايااه مسكين ، ودوكا كيفاش راهو
الطبيب: راهو راقد ، كي يفطن يخرج ، طلعت راسها وهبطتو بمعنى ايه ، تفضلي ارواحي معايا نكتبلك الدواء اللي لازم يشرب ، راحت معاه للبيرو تاعو ، وهو بدا يعمر فال pc الدواء .... مقلتيليش كيفاش نكتب الإسم
لمار: معلاباليش ، خممت شوية .... تقدر تكتبو باسمي ؟ ، خزر فيها متعجب .... ايه شغل يضهرلي معندوش ولازم يشري الدواء وكون تكتبو باسمي نقدر نشريهولو انا بالكارط الشيفا تاع بابا الله يرحمو ، تبسم
الطبيب: d'accord ، طبعلها ومدلها l'ordonnance
لمار: صحاا doctor
الطبيب: بلا مزية ، صحاا نتي اللي عاونتي واحد هكاا وراح تشريلو الدواء من عندك ، ربي يكتر من أمثالك
لمار: آمين

خرجت لمار من عندو رايحة للفارماسيان تشري الدواء ، دخلت
لمار: السلام عليكم
الفارماسيان: وعليكم السلام
لمار: يعيشك خويا زيد مدلي هاد الدواء ، هز الورقة وشاف مع الاسم وشاف معاها
الفارماسيان: هادا ليك ؟
لمار: ايه ، وتبسمتلو ، راح بدا يجبدلها فيهم وحطهم قدامها وهيا تشوف معاهم ، حتى لمحت بواطة جاية كيشغل فيتامينات مرسوم فيها corp تاع راجل ، شافت معاه وشافت مع البواطة وهبطت راسها بعد مارجعت حمرة كي الطوماطيشة
الفارماسيان: هادا يتشرب كل صباح على الفراغ ، وهادا بعد الماكلة ، بقا يعيدلها وهيا متبعة معاه ، نحا التيكيات اللي فالبوايط (هادوك الخضورة) ولسقهم f l'ordonnance ، قدملها هاداك الدواء تاع الرجال .... هادا مايترومبورساش
لمار: شحال نخلص كلش
الفارماسيان: 140ألف
لمار: اويلي بالكارط الشيفا و 140ألف ؟
الفارماسيان: ايه هادا غالي فيتامينات تحبي متديهش ، بقات تشوف معاه وهيا تخمم ادا تديه ولا متديهش ، ممبعد تفكرت حالتو شفها ايا قالتلو يحطو ، لمهوملها فالصاشي وجات خارجة .... مدموازال اصبري هاكي هادي ، شافت مع يدو لقاتو l'ordonnance
لمار: ياك تدوها ؟
الفارماسيان: ايه بصح غلط مدلك زوج
لمار: اه dcr ، شدتها عليه .... معليش صحاا الله يعاونك ، خرجت رايحة للكلينيك وشارت هاداك l'ordonnance فالصاشي وماشية حتى لحقت