هيا اللي دخلت للإصطبل ، رجعت ماري لبلاصتها ، بقات تسلكلها على شعرها
إيلصا: يالله أنا نخليك .. جوزنا عشية شابة انا ونتي .. مبعد نزيدو نعاودوها ، باستها بين عينيها وخرجت تغلق المجازة
جات راح دور وهيا تحبسها ريحة تعرفها مليح مليح ، وشكون من غيرو مروان اللي حافظة كل تفاصيلو حتى ريحتو اللي مستحيل تروح من قلبها وعقلها ، بقات حابسة فبلاصتها محبتش دور جيهتو ، جامدة على الحركة ، وهو قدم عندها حاط يديه فجيوبو
مروان: مكيش حابة تتلاقايني يضهرلي ، بقات بنفس الوضعية وبلا حركة ، قدم عندها وجبدها ليه حتى طاخت فصدرو وتلاقات العين مع العين وهنا الزمن حبس بيهم للزوج ، وكانو عينيهم يحكيو بزاف حوايج ميقدرش يهدرهم اللسان
........
علاش رحت وخليتني
..
حبيت ننجح ونكون من niveaux تاعك
........
بصح أنا ميهمونيش دراهمك
..
إيه وأنا هامني نتي .. تعيشي معايا بيان
........
عطاك خاطرك ثلث سنين ماتسقسي عليا ماتحوس كيفاش راني
..
اخبارك كانو يوصلوني لحظة بلحظة .. بصح مكانش عندي الوقت نحكي معاك
........
توحشتني
..
بزااااف .. كنت مكدب وقتاش نشوفك
........
تعرف شحال من مرة بكيت علاخاطر متوحشاتك
..
سمحيلي .. مراحش نزيد نبكيك
جات راح تبعد عليه وهو يعاود يجبدها مزير عليها ، خزر مع عينيها يكمل الحوار ويجاوب على اسئلتها اللي كان يقراهم فعينيها
........
شفت حياتك بلا بيا !
..
من غيرك ماعندي حتى حياة
........
وشكون هاديك اللي خرجو تصاورك معاها
..
منيتك انا نشوف فهاديك وعندي نتي
........
تبدلتلك ؟
..
زدتي زيانتي برك
........
تحبني
..
نموووت عليك .. مهووس بيك .. واهم حاجة منقدرش نعيش بلا بيك
هاد الحوار دار بين عينيهم بلا مينطقوه فوامهم
غمضت عينيها تخبي دموعها ، اما هو بقا مهبط راسو ليها يشوف معاها شادها من يدها ، بعدت عليه شوية وهو بقا حاكمها من خصرها
إيلصا: على سلامتك
مروان: الله يسلمك .. علاش ماجيتيش تتلاقايني يالالة ، هربت عينيها منو
إيلصا: مكانش علابالي بلي وصلت ، عرفها بلي تكذب
مروان: هممم .. واشراكي .. توحشتك ، رجعت خزرت مع عينيه ، هوا قالها توحشتك ، طلعت حمرة
إيلصا: بخير ، اكتفات بهاد الكلمة ، طلع حاجب ، وهدر بصوت هادىء دوبها
مروان: ونتي متوحشتينيش ؟ ، بقات ترمش
إيلصا: هااا .. ايه .. لالا .. قصدي .. ايه .. لالا .. ايه ..
مروان: ايه ولا لالا ، بلعت ريقها وهو متبع تحركاتها ، حوست تبعد عليه بصح بقا مزير على خصرها ... اركحي
إيلصا: حبيت نروح نبدل و.. ، قاطعها
مروان: دوك نروحو نبدلو .. خلينا فالمفيد ، عقدت حواجبها وبقات تطلع وتهبط فهاديك دوك نروحو نبدلو ، فهم تخمامها ، ضربها لراسها بالشوية .. ميروحش بالك بعيد ، هبطت عينيها بحشمة كيفاش يقدر يعرف واش راهي تخمم
إيلصا: سمعت بلي وليت business man كبير .. راح نرجعو نهدرو معاك بال rendez-vous ، ضحك
مروان: هوما كامل يشدو rendez-vous غير نتي ، تبسمت
إيلصا: اهيه وانا علاش ؟
مروان: خاطر نتي spécial
إيلصا: علاش على راسي ريشة انا
مروان: على راسك تاج 👑 بقات تلعبلو بالكول تاع تريكو وهو يشوف معاها حتى نطقت
إيلصا: تشفا نهار سقسيتك على ربع سنين واش راك حاب تكون واش قلتلي
مروان: اممم
إيلصا: راك حققت واش كنت حاب ..
مروان: ونتي .. لقيتي لي تكملي معاه حياتك ، بقات ساكتة تخمم وتشوف لبعيد ، ممبعد جاوبت بثقة وهيا تخزر مع عينيه
إيلصا: ايه ، خليقتو تبدلت ودور راسو يضحك هاديك الضحكة تاع الفقصة
مروان: اهيه وشكون هوا هادا .. اللي لقيتي فيه هادوك المواصفات
إيلصا: ممبعد تعرفو ، طبطبتلو على كتفو وجات رايحة ، عاود جبدها عندو كارز متكيها على الحيط اللي يقسم مابين الحصونة
مروان: شكون هادا ؟ أشرف ياك ! ، هدرتها بثقة
إيلصا: ايه ، تبسم فالشط
مروان: في منامك ومتصراش .. لا معاه لا مع غيرو ، بادلتو الإبتسامة
إيلصا: راح نشوفو ، جبدت روحها عليه رايحة وهو بقا متبعها وهيا تمشي وتتزعبل وشعرها يطاير
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
