جمعتنا القرابة *الجزء الثاني* (أنت قدري)

Partie 50

خرجت من عندو وهيا مقلقة خصوصا بعد ماشافت وجهو ، طلعت راسها لقاتها جاية بجهة بيتو
ماريا: كيفاش راهو ؟ ، تنهدت مستغفرة تتفادا وسوسة الشيطان
كامي: متكي وجهو مضروب معندك وين تشوفي فيه
ماريا: وماقالك والو ؟
كامي: لالا محبش يهدر ، أصلا تايه ومعجبتنيش حالتو كيشغل ماشي فوعيو
ماريا: كيفاش حبيتيه يكون فوعيو وانا وليدي يدو تقول مخدومة بالحجر اللي يضربو يصرعو
كامي: تقلقت منكذبش عليك ، سورثو كي شفت وجهو بصح معلاباليش آرام ميضربوش هكداك ، يضهرلي كشما دار
ماريا: هكاك ومعندوش الحق يضربو ماشي باباه ، علاش قاعد يربي فالناس !
كامي: والله معلابالي ، هادا راهو ضارب البكمة ، خلي كي يجي هوا نفهمو منو ، نروح نشوف إيلصا
ماريا: امشي نروح معاك
راحو لبيتها دقدقت كامي ، بلا رد ، مرة وزوج ووالو ، فتحت الباب دخلت وموراها ماريا ، شافت مع البيت ، الدريسينغ الضو طافية و الحمام شافت مكانش ، دارت عندها
كامي: مكاشها ؟
ماريا: بالاك راهي بايتة مع لورين ، ياك علابالك يموتو على التمنشير بعد les soirées
كامي: امشي نشوفو

كانو رايحين باتجاه بيت لورين ، لقاو وجدان جاية
كامي: إيلصا راهي بايتة مع لورين ؟ ، شافت وجدان مع ماريا اللي حاطة يدها على خدها مخلوعة وزادت شافت مع كامي اللي تستنا فاجابتها على احر من الجمر
وجدان: لالا !
كامي: آهه يا ربي آه ، ماتزيدونيش ، وين راحت هادي دوكا !
ماريا: امشي نهبطو لتحت بالاك لونار علابالها

هبطت كامي جارية ودخلت عليهم للصالون
كامي: لونار ماشفتيش إيلصا ؟
لونار: لالا ، علاش مراهيش فبيتها !
ماريا: رحنا نشوفوها دوك ملقيناهاش ، قعدت كامي فالفوثاي حكمتها الفشلة
كامي: آه ياربي وين راهي بنتي ، قدمت عندها آزار شدتلها يدها
آزار: ميكون غير الخير متقلقيش روحك
كامي: كيفاش منقلقش روحي ، واحد مضروب لفوق ووحدة بعتها للدار مكانش ، وباباهم ضهرلو شغل فنص الليل ، واش ندير انااا ، حابين يهبلوني اليوم ولا كيفاش
وجدان: بالاك راحت تبات عندك كاش صحبتها ، ناضت تعيط
كامي: راحت تبات تعيط تقول ، متخليناش مقلقين عليها ، معندهاش مالين سايبة اووو !
على عياطها دخل صهيب ، اللي مكانش مستغرب وكان متوقع يكون أكثر ، شافت معاه كامي
كامي: وين راه زاكو ؟ علابالو بلي وليدو مضروب وبنتو مكانش فالدار ، أومألها براسو بإيه ، وبقا ساكت ومعارفش كيفاش يقولها خايف يخلعها وتطيح تتغاشا ، تنهد وهوما ركزو معاه كامل عرفو صرات حاجة من تعابير وجهو
صهيب: زاكو راهو مع إيلصا فالصبيطار ، شهقت ، وراسم وصرب وقفو ، وماريا حكمت قلبها ووجدان شدتها خايفة تطلعلها l'attention ، لونار دموعها بداو يسيلو وآزار حضنتها مخلوعة حتى هيا وفطوم بقات تشوف غير بعينيها .... شوفو قبل ما يروح مخكم لحاجات grave راهي مليحة ، برك تكصرت من يدها
كامي: ددارت accident ؟ ، كانت تهدر بصوت متقطع تخرج الكلمات بالسيف ، حرك راسو بالنفي وهيا عقدت حواجبها ، كيشغل فهمت .... هو ضربها ؟
صهيب: إيه وكون مكانش هنا مروان كون منعرف واش صرا ، هزت روبتها ونايضة خارجة ، حكمها راسم
راسم: كامي ارصاي دوك نروحو كيف كيف ، بدلي حالتك ووجديلها حوايج ونروحو
كامي: لالا حتى نشوفها قدامي باش نرتاح ، دوكا ماني قادرة ندير والو ، راحت عندها ماريا
ماريا: راسم عندو الحق ، يالله بدلي وندولها حوايج تكون راهي مديرونجيا و نقعدو معاها حتى تخرج ، شافت معاها والدموع فعينيها ، شدتها ماريا من جهة ووجدان من لجهة لوخرة باش يعاونوها لانو فقدت التوازن و آزار راحت تلملها حوايجها وصهيب راح للبيرو تاعو كان يخلط فالكاميرات ، وراسم وصرب بقاو فالصالون يحكيو أما لونار عيطلها آرام وراحت تهدر معاه فالتلفون ، بقات غير فطوم طلعت تشوف ختها