جمعتنا القرابة *الجزء الثاني* (أنت قدري)

Partie 59

صباح جديد وأحداث جديدة:

ماشية وتحاول تتفكر البلاصة وين بدات باش ماتحصلش فوسط الغابة ، كانت تشوف مع الأرجاء باش تميز كاش حاجة شافتها معاه كي كانو جايين توصلها ، حتى لمحت من بعيد الحجرة اللي كانو قاعدين عليها داك النهار
إيلصا: اه هاديك هياا ، كملت ماشية حتى وصلت لتم وڤارات ، فتحت الزجاج ، استنشقت النسمة اللي دخلتها وبقات فالطونوبيل لأنو كان الصباح ومزال الحال بارد والندا فلجبل ، بقات مدة تشوف لبعيد ممبعد هبطت بالشوية هازة طاسها تاع القهوة سخون وراحت تقعد فهاديك الحجرة وهيا تتبسم ، حطت القهوة قدامها على الحجرة وربعت يديها وبقات تتفكر نهار جاو هيا وياه لهنا وحدهم كيفاش حاول يبدلها الجو ويخرجها من الحالة اللي كانت فيها وكيفاش كان يحكي معاها ، وتماك أول مرة تحكي معاه مطول ويكونو على إنفراد يسمعو لبعض ويفضفضو ، حتى أنو شاركها من بين كل الناس مكانو السري كيما تسميه هيا ، بقات تتبسم تايهة ، حتى حست واحد هزلها الطاس تاع القهوة من قدامها ، دارت تشوف لقاتو هوا ، كان واقف قدامها ويجغم من طاسها ويشوف لبعيد مغوبش شعرو مشعكك وباين عليه ماشي راقد مليح ، عقدت حواجبها من حالتو ، وهو هز الطاس
مروان: صحاا جا فوقتو ، وقفت وقربت عندو
إيلصا: بتت هنا ؟ ، طلع راسو وهبطو بمعنى ايه .... علاش ؟ ، هز راسو بمعنى معلاباليش .... وين بت ، فالطونوبيل ؟ ، دور راسو لخيمة صغيرة كانت تما ، راحت ليها كانت بعيدة شوية تحت وحد الشجرة وقدامها طونوبيلتو ، طلت لقات غير كوسانة وغطا خفيف .... جيت تكومپي (تخيم) بغطا ووسادة برك ؟ ، تقعد على الحجرة داير لجيهتها يشوف معاها (مش الجهة اللي مقابلة لبحر)
مروان: مجيتش نكومپي ، وهادو دايمن نخليهم فالطونوبيل
إيلصا: يعني حبيت تريح راسك ، عوج راسو بمعنى يعني ، تنهدت وقدمت عندو .... ورتحت ؟ مبنتليش ! ، شاف مع عينيها مدة وهي كيف كيف بقات تشوف فيه عينيها مهبطتهمش ، ممبعد تكاكا مع روحو وبدل عينيه وخزر للجمب وجغم من القهوة
مروان: يضهرلي مراحش نرتح حياتي كامل ، عقدت حواجبها ، دورتلو وجهو بيدها بحنية وتقابلو عينيهم مرة وحدوخرة
إيلصا: مروان مراكش تبانلي مليح ؟ ، أصلا نتا كل ماتجي لهنا تكون بيك حاجة مشي هكا ! ، بقا يشوف معاها تايه ، ميكذبش كان حاب يضمها ويزير عليها باش يحس بالأمان ويفضفض كلش واش فقلبو ويعترفلها بحبو تاني ويتهنا ، بصح هيهات معلابالهاش انها وحدة من الهموم اللي مراهمش يخلوه يرتح ، تنهد يخفي غصتو
مروان: لا والو ، بقات تشوف معاه تاع راني مشي مأمنتك بصح محبتش تضغط عليه ، خلاتو فغرضو .... قوليلي نتي واش جيتي ديري هنا ؟ ، تبسمت
إيلصا: توحشتها قلت نجي نبدل شوية هنا ، متنساش ياك شاركتها معايا نجي وقت منحب 🤷‍♀️ ، تبسم فالجمب وشاف مع يدها
مروان: زدتي نحيتي مام هاداك اشلوش اللي كان هازلك يدك
إيلصا: محملتوش يقلقني ، اصلا اني بريت
مروان: واش بريتي ونتي دايراتو كي اللعبة تحطي وتنحي
إيلصا: ياودي راهو غير يديرونجيني برك ، اصلا هاد اليامات لازم نسربي يديا ورجليا باش نكمل الميموار تاع الدوكتوراه وياربي ، طلع حواجبو كي تفكر صاحب آرام اللي راح يعاونها
مروان: هدرتي مع هاداك السيد ، كشرت حواجبها متسائلة
إيلصا: شكون ؟ ، عوج راسو تاع اتفكري .... اااا صاحب آرام ؟ ، بقا يشوف معاها بلا تعابير .... نو مهدرتش معاه مدلي الإيمايل تاعو بصح مكان فواش راح يفيدني يعني ، علاهاديك مشكيتش نكونطاكطيه الا ادا صح حصلت وهادي حاجة مستبعدة ، هدر بدون شعور
مروان: احسن ، عوجت راسها متبسمة ، راحت قاعدة جمبو معاكساتو الإتجاه مقابلة البحر ، وبقاو ساكتين مدة
إيلصا: مروان نسقسيك !
مروان: امم
إيلصا: وين راك تشوف روحك بعد ربع سنين ، خزر فيها مع الجمب متعجب من السؤال
مروان: معلاباليش لاني والفت منخممش للمستقبل نعيش اليوم ونخدم لغدوة وخلاص ، علاش ؟
إيلصا: لالا سقسيت برك ، كنت نستناك تقولي نكون تزوجت ودرت الدار والولاد كباقي الناس ، تبسم
مروان: بصح أنا حياتي كامل مكانتش كيما تاع باقي الناس فغالبا منا على ربع سنين مراحش تكون كيفهم
إيلصا: مثلا واش راح يكون فحياتك ؟
مروان: أسست شركة وتفوقت فالمجال تاعي ويمكن نولي من أنجح رجال الأعمال ، طل على وجهها متبسم وهيا بادلاتو الإبتسامة
إيلصا: نشاله ، تسما راك تخمم للمستقبل !
مروان: فرق بين التخطيط والتخمام ، التخطيط هوا واش راك تشوف روحك بعد ربع سنين وتخدم ليه ،  والتخمام كيفاش ممكن تكون يعني تتخايل نفسك برك ، يعني وحدة واثق ووحدة كاين علامة استفهام ❓ فيها
إيلصا: اممم ، وراك حاب بزاف تولي ناجح ، طلع راسو وهبطو بمعنى إيه
مروان: علاش نتي مشي حابتني ننجح ! ، خزرت فيه تاع منيك
إيلصا: لعكس نتمنالك كل خير أصلا نحب الإنسان الطموح ، راسم حياتو لبعيد
مروان: عندي هدف أهم من النجاح وهو الدافع اللي خلاني نخمم ننجح ، شاف معاها
إيلصا: واش هواا ؟ ، تبسم
مروان: بعد ربع سنين راح تعرفيه
إيلصا: هممم نشاله
مروان: ونتي ؟
إيلصا: هممم ، مكانش حاجة راح نخدم عليها ولا حابة نوصلها يمكن الحاجة الوحيدة اللي راح تتبدل هيا نتغير من طالبة لأستاذة جامعية وخلاص 
مروان: ومتتزوجيش ومتجيبيش لولاد كيما كامل الناس ؟
إيلصا: السؤال المطروح هنا ، ادا راح نلقا right person وتتبدل حياتي معاه ونتزوج ونجيب لولاد ، أما ادا ملقيتوش فراح تبقا هيا هيا أكيد
مروان: يمكن يكون right person راه يوجد فروحو فهادوك الربع سنين باش يلقاك
إيلصا: واش يوجد واش ؟ غير يجي برك ميهم والو من غير أني نلقا الحب والصدق والسند والمفاهمة فيه
مروان: يعني هادو يغنيوك على الدراهم ، طلعت راسها وهبطتو بمعنى ايه ، وهو ضحك ، كشرت حواجبها
إيلصا: علاش راك تضحك ؟
مروان: جاتني موغريبة
إيلصا: علاش ؟
مروان: وحدة كيما نتي تربات فالعز والدلال والحاجة تحظر عندها قبل ماتطلبها تخير المعنويات على الماديات
إيلصا: وممبعد ؟ واش الفايدة كي ندي واحد يعيشني نفس العيشة اللي كنت عايشتها عند والديا ولا احسن وانا منتفاهمش معاه ولا يخونني وحياتي تروح غير مشاكل واكتئاب وادا زدت جبت ولاد نعيشهم المرار ، اللهم نعيش مع واحد قيسو يفهمني ونفهمو بيناتنا الحب والإحترام والصدق وولادي يعيشو فأسرة مثالية ، بقا يسمع ليها ، كلامها كان بلسم ليه ، بصح باقي مصمم مهما كان لازم ينجح باش يعيشها كيما تحب مهما متطلبش ، ويكون معاه الحب اللي هيا طالباتو
مروان: صراحة مكنتش نستنا تخمامك يكون هكا
إيلصا: ضلمتني متحشمش ، خبطتو بخفة لكتفو وهو ضحك
مروان: مالا قولولي diamond شكون يحبو جدي واقيلا ، غطات وجهها زعما تبهدلت
إيلصا: صح نحبو بصح ميعنيش اني علاجالو نقدر منختارش انسان يمكن يغيرلي حياتي ويرجع فيها الروح ويكون هو diamond الحقيقي فيها
مروان: علاش وشبيها حياتك ؟
إيلصا: نحسها فارغة كيشغل مافيها حتى معنى  حابسة ، كيشغل راني عايشة وخلاص
مروان: ونتي حابة هاد البنادم يجي يحركهالك ، ضحكها المصطلح ، وبقات تضحك .... لا حول ولا قوة ، حتى تبسم وفشلتو الضحكة ، مسحت دموعها
إيلصا: والله ضحكت ، الله يعطيك الربح
مروان: ياودي ليوم شوكيتيني روحي برك
إيلصا: مزال مشفت والو ، غمزتو بشقاوة وهو بقا يشوف معاها وابتسامة خفيفة على وجهو ، كان حاب يشدها يبوسها ، بصح نفض الفكرة وناض
مروان: نروحو بالاك انا جعت
إيلصا: إيه ، راح لم الخيمة تاعو ، وهيا ركبت طونوبيلتها ، سابقتو وهو لحق وراها ماشي