جمعتنا القرابة *الجزء الثاني* (أنت قدري)

Partie 19

فجهة خلاف كان يشوف فالتصاور تاعها كي كانت معاه فالريسطو وكي خرجو وراحو فالطونوبيل
فراس: إنشاله متغلطيش وتروحي معاه ولا تحكيلو خاطر ندمك وندم عايلتك كاملة على لعبكم معايا والديك بكري استهانو بيا ودوك هادا اللي راهو معاك راهو حاب يلعب معايا لعب الدرر بصح ماشي انا اللي ينلعب معيا، هز التلفون وعيط
فراس: اسمع ابقى متبعها لوين تروح رد بالك تغفل عليها ، تغلط راك علابالك واش دير
الراجل: حاضر ، غلق الخط وبقا يخمم ويشوف مع التصاور ويتبسم

فجهة خلاف كان باقي هو يسوق وهيا معاه ساكتين
لونار: حطني فالدار عييت اني حابة نرتح
آرام: بديتي فالخدمة ؟
لونار: لالا غدوة إنشاء الله ، أومألها براسو وسكتو ، وصلها للدار
لونار: صحاا على نهار اليوم ، تبسم معاها ، جات هابطة
آرام: لونار ، قلبها رجف كي عيطلها باسمها ، دارت عندو بمعنى واش ؟
آرام: ماكيش ناوية تروحي عند والديك ! ، سكتت وهبطت راسها
آرام: معلابالهمش بلي راكي هنا كون ماللي جيتي البارح وهوما عندك، خاطر راهم صح متوحشينك ، برك مهمش يبينو
لونار: علابالي بصح منقدرش نمدلهم امل بلي رجعت وكلش وانا يخلاص الديفيلي منا نرجع منا ، دار للجهة لوخرة غمض عينيه محبش يخسر معاها النهار تاع اليوم ، حك لحيتو
آرام: تسما ماراكيش ناوية تبقاي هناا
لونار: لالا ، بقا يشوف معاها شوية وهيا مفهمتش خزراتو خاطر تمتم يتقلب يكون مليح وتمتم ترجع هاديك التخنزيرة اللي تعرفها دايمن
آرام: اهبطي ، خزرت فيه تاع وشن ، اهبطي عندي شغل لازم نروح ، هبطت ، وهو دار بالطونوبيل رايح ، بقات تشوف معاه مخلي غير الغبار وراه
لونار: وشبي جدو هادا بين الدقيقة ولحين يولي مصعور ، دخلت حايرة بصح هادا ميعنيش انها ماهيش فرحانة لانو متعودة على تقلبات مزاجو ، طالعة فالدروج دخلت لبتها حطت صاكها واتكسلت ، مست قلبها اللي كان يخبط
لونار: واقيلة طحت على راسي وانا لا خبر ، بقات تخمم شوياا ، بصح راهو خاطب واش اني نخلط اففف بديت نهبل انا واقيل رايحة نولي خطافة الرجال المرة اللولة مكونتش فوعيي ودوك ، أستغفرالله واش راني نهدر، نوض خير ، نفضت عمرها وراحت تبدل وتغسل ورقدت

داخل للدار ، طالع فالدروج، لحق قدام بيت يماه طبطب مسمعاتوش فتح الباب بشوية خاطر علابالو باباه ماكانش ، شافها قاعدة ، راح لعندها ، كانت ساهية فالتلفون حتى لقاتو قعد قدامها
ماريا: غير الخير واش كاين تاني
آرام: علاش كي نقعد معاك لازم تكون كاينا حاجة
ماريا: ونتا ياوليدي عمرك قعدت معايا كي الناس بخلاف متكونش كاينة حاجة
آرام: هكذاا
ماريا: ايه ، قولي واش درت مع مالصكليب هاديك
آرام: تكرهيها لهاد الدرجة
ماريا: نقولك الصح الصح منكرهااش بصح منحبهاش ونهار روحت نخطبهالك الغمة حكمتني كي شفتها
آرام: وعلاش وشبيها
ماريا: واش مبيهاش قولي ماخلات حتى عيب فالدنيا مكانش فيها ، ضحك آرام
آرام: خلاص نخليلك نتي تخيريلي نشوفو واش يخرج من عندك
ماريا: نجيبلك لالاهم اناا ، بصح المشكل ماشي تما
آرام: وين تاني
ماريا: شكون تقبل بيك
آرام: أنااا ؟
ماريا: ياوليدي صح عندك الزين و الكور والدراهم وكلش بصح معندكش اهم حاجة اللي هيا العقلية وزيدلها الخدمة مرتك اللولة
آرام: ووشبيها عقليتي ، جبدت يديها وبدات تحسب
ماريا: ماتعرف تهدر ، ماتعرف تبلعط ، ماتعرف تسقسي على الناس وزيدلها تتقلق بالخف ولسانك مسمام
آرام: هادو كامل يا سيدي نجوزو مانعرفش نهدر ولساني مسمام ونتقلق بالخف ومنعرفش نسقسي عليك خاطر الناس ميهمونيش بصح واش دخل التبلعيط ؟
لونار: يا وليدي حنا النسا نحبو التبلعيط ، نزعفو تمتم و بزوج كلمات نرضاو تمتم وهادي ياوليدي كي قطعولك الصرة قطعولك التبلعيط معاها
آرام: تسما نتوما تحبو اللي يعيشكم فالكذب انا تعرفيني ديراكت ماندور مانزوق حبيت حبيت كرهت الله لا يردك
ماريا: علابالي صريح حتى فوق اللازم
آرام: قوليلي زعما ماشي كل خنفوس عند مو غزال تبانلي كي لحقت ليك تبدلت الحالة ، بصح معليش ماعندي حتى حاجة تصلح ؟
ماريا: هيا صح فيك عيوب الدنيا كامل بصح قلبك زين ، بصح يا وليدي الناس متعرفش واش فقلبك حتى تخالطك ونتا متخليش المجال اصلا للي يخالطك
آرام: اللي نحب نخليلو نخليلو
ماريا: اممم هكذاا ، دارلها براسو تاع ايه ، بقات تشوف معاه وتسلكلو على راسو ، علابالك شحال نحبك ، ضحك
آرام: ميضهرليش 😂 ، ضربتو على يدو
ماريا: ربي عالم شحال نحبك ونعزك نتا وليدي الكبير اول فرحة لياا
آرام: مام انا نحبك مارياا نتي عينيا بصح تكسريلي راسي مينداك ، صهيب مسكين راكي دايرة فيه حالة ، قبيحة يما قبيحة
ماريا: والله ماتحشم ماتندا ، دخل لعندهم
صهيب: راكم تهدرو علياا
ماريا: اممم
آرام: كنت نقولها صهيب ميلقاش كيما نتي ضريفة متهدريش بزاف عاقلة واش يزيد ، دارت ليه فاتحة عينيها
صهيب: شفت يا وليدي ، الله يعطيك وحدة كيما يماك
ماريا: آمين ، شافت معاهم يشوفو معاها وحاكمين الضحكه ، والله متحشمو كي نتا كي هوا ، خزرت لآرام ، وانا نقول ليمن خرجت ، نروح عند حبيب يمااه اللي يفهمها ونتوما اقعدو كيف كيف الحجرة لختها ، راحت وخلاتهم ، دار صهيب متبسم ليها شافها غلقت الباب وخرجت ، خزر فآرام
صهيب: حبست مع نسرين ؟
آرام: اممم
صهيب: ماراحش نقولك علاش ولا كيفاش خاطر ماشي من حقي وراك كبير وتعرف صلاحك ، بصح اذا كان بسباب الهدرة تاع يماك فهيا مدخلها وزيد علابالك بيها نهار تتزوج معندها ماراح تقول
آرام: لالا ماشي هيا السبة
صهيب: كان علابالي خاطر نتا ماشي من النوع اللي يسمع للكلام ، خزر فيه آرام وتبسم عارفو واش قاصد
صهيب: علاش خطبتها يمال كي عاد مراكش حابها
آرام: باباها جا وطلب مني ومحبيتش نردو تعرفني نحشم منو ، تقعد وخزر فيه
صهيب: نتا آرام وليدي محبيتش ترد باباها ؟ معقلتكش علابالك ، ناض آرام علابالو بلي كون يقعد مع باباه راح يفرش عمرو وعلابالو بلي يقدر يجوزها على الناس كامل غير هو لالا
آرام: انا نروح نرقد اني عيان
صهيب: روح وليدي روح راك مهدود ماشي غير عيان ، راح آرام وخلاه دخل لبيتو نحاا التريكو تاعو حط كاس ما شربو وبقا قاعد فالفوثاي اللي فبيتو راد ظهرو اللور ومعلي راسو ويخمم

بعد أسبوع :

مروان: اووه راني ميت بالشر كرشي راهي تزفرر تيرارا تيرارا
لونار: امشي قدامي علابالي كون منخلصلكش لغدا ليوم عام كامل ونتا تحكي عليه
مروان: الحمدلله كي فهمتي عمرك
لونار: علابالك واش حابة ناكل
مروان: وشن ؟
لونار: الكبدة فالقصبة ياجدك توحشتها كنت نروح مع les cousin تاوعي ناكلها تماك
مروان: شوفي المشحاحة لوخرة كي راح تخلصيلي مديتني ناكلو الكبدة
لونار: والله نعوضها برك معنديش معامن نروح بخلافك ، ديجا تاع وجهك الكبدة اللي نروح معاه لتما غير العزيز
مروان: امشي امشي ، ركبت معاه وراحو ، شوية هكاا وصلو ، طلعو للطيراصة لفوق ، دومونداو وقعدو يستناو فالماكلة
لونار: علابالك هنا تاكل احسن كبدة فحياتك
مروان: مام السردين بنين بزاااف ، تعرفي عندنا حاجة مشتركة ، كانت تاكل فالزيتون اللي حطلهم فوق الطابلة ، كمل يهدر، انا ونتي نحبو الماكلة بزااف
لونار: احسن صداقة اللي تكون مبنية على البلعة ، ضحك معاها ، جاتهم الماكلة ، بداو ياكلو ويحكيو

فجهة واحدوخرة كانت طالعة فدروج تاع القصبة رايحة تتغدا هيا وصحاباتها  كي العادة والعوايد ، غير وصلو هيا راحت تقعد وصحاباتها راحو يصورو فالمنظر ، هزت تيليفون وبدات تخلط فيه ، كانت قاعدة قدامها فالجهة لوخرة لونار بصح وحدة ماشافت ختها ، حتى جااا مروان بعد ماراح خلص
مروان: لونار امشي راني خلصت يالمشحاحة بصح نزيدهوملك فالشهرية متخمميش ، شافت معاه ممبعد شافت لوين يخزر ، وهنا بقات مصدومة 😳
لونار: ياودي نتا لعبتها جانتل مان ، بصح عجبني الجاسث
مروان: ايا اتحركي قاتلك جانتل مان ينعلبوه اللي يخرج معاك ، امشي قدامي ، هبطو يضحكو وهي بقات تحت الصدمة حتى جاو صحاباتها وفيقوها ، شافت ملقاتهومش ، ناضت جارية هابطة تلحقهم ، هياا تحوس منا ومنا حتى شافتهم هابطين ، كملت جارية لاحقة بيهم ، وعيطت
ايلصا: لوناار ، هيا غير سمعت هاد الصوت حبست وهو دار يشوف شكون اللي راهو يعيطلها ، جسمها ثقال باش يدور عرفتها غير من صوتها ، لحقت لعندها شدتها من يدها وحضنتها
ايلصا: توحشتك
لونار:...... ، مروان باقي يشوف معاهم حك شعرو وبعد شوياا ، جبد دخانو يكمي دايرلهم بالظهر ، بعدت منها شوياا
ايلصا: علاش مقولتيلناش بلي جيتي توحشناك
لونار: معنديش بزااف ملي جيت و.ومعنديش الوقت جيت نفري خدمة ونروح
ايلصا: ومتشوفيش والديك ، كان هاد السؤال دايمن من اصعب الأسئلة اللي يواجهوها ومتقدرش تجاوبو ، غرغرو فعينيها الدموع
لونار: ايلصا ممبعد ونهدرو ياك راني مزروبة دوك لازم نروح عندي خدمة ، تعيشي برك متقوليلهمش بلي شفتيني ياكي ، شافتها كيفاش تترجا فيها والدموع فعينيها ، تبسمت معاها
ايلصا: معليه خلي حتى ديريلهم نتي سورپريز ، دارتلها براسها ايه وغصة فقلبها ، فلتت منها وراحت وهيا تروشلها بيدها تاع باي باي 👋🏻 لانو الكلام هربلها وكون تزيد شوياا تكلاطي قدامها فحاولت تحكم عمرها وتروح خير ، اما هو فدار شاف مع ايلصا بعد ما كمل دخانو وتبع لونار ، كانت ماشية معلابالهاش لوين الموهيم توصل وهو وراها محبش يهدر معاها عرفها مهيش مليحة ، غير ركبو فالطونوبيل وصلها لدارها فالسكات
مروان: اهبطي تريحي متجيش ليوم انا ندبر راسي ، اومأتلو براسها تاع إيه وهو راح وهيا دخلت

كون تتفاعلو وتڤوطيو فكامل الحلقات نزيدلكم پارتي اليوم 😌🤝🏻

Hii babie nchalh tkono bkhir saha ftorkom , mtnsawch ttfaelo khatr maejbnich tafa3ol taekom kaml hada ychj3ni bach nzid nghbr machi nkml snn mtnsawch tvoti w tcommentiw li habin bien sur ❤️