جمعتنا القرابة *الجزء الثاني* (أنت قدري)

Partie 114

هابطة فالدروج بعد ماستكشفت الدار شبر بشبر وعجبتها بزافف ، ذوقو كان simple و classe فنفس الوقت ، شافت مرأة داخلة دايرة حجاب وبشوشة تجي فأواخر الربعينات ، عرفتها اللي مستكلفة بالدار ، راحت عندها مريم
مريم: صباح الخير مدام واش حوالك
ميرال: بخير الحمدلله ونتي خالتي ؟
مريم: نحمدو الله ونشكروه .. كشما تحبي نوجدلك فطور ولا .. راه عيطلي سي حسام قالي عندي ضيفة spécial اتهلايلي فيها ، تبسمت ميرال وحبطت راسها حشمانة ، جات ماشية مريم لشغلها وهيا تحبسها
ميرال: خالتي واش راح ديري ؟
مريم: نوجد فطور لسي حسام ونحط الغذاء وندوس شوية الدار
ميرال: اه خليني انا نوجدلو فطورو ونتي ديري لباقي .. قوليلي برك واش يحب ياكل ، تبسمت مريم
مريم: تفضلي معايا للكوزينة نعاونك ، مشات مريم ومعاها ميرال دخلو للكوزينة ، راحت حلت الفريجيدار جبدت deux avocats ، بيض زبدة .. ، كلش واش يلزمها وحطتهم قدامها وراحت جابتلها طابلية تاع الشغل .. هاكي هادي باش متوسخيش روحك ، لبستها ميرال وهيا تتبسم وحدها فرحانة أول مرة حا طيب ، وخصوصا رايحة طيب علاجال بنادم خلينا نقولو معجبة بيه ... انا نروح نبدل حيجابي ونتي مابيد نجي اقلي البيض فالزبدة بصح مطيبيهش مليح يخي .. ميحبوش طايب ، حركت راسها ميرال بايه وهيا راحت ، هزت المقلة حطتها فوق la plaque وبقات تحوس منين تشعل النار معرفتش
ميرال: افف كيفاش تشعل هادي ، بقات تعبز على هادوك les boutons .. دوكا هادي ماتشعلش ؟ ، هزت يدها حطتها فوقها ، وهيا تبدا تعيط حرقت يدها ، خاطر شعلتها وهيا مشي علابالها ، جات تجري مريم عندها شافتها حاكمة يدها وتبكي
مريم: يابنتي متقوليليش حرقتي يدك ، قدمت شدتلها يدها كان حمر .. ياربي واش صرا ، كانت تبكي
ميرال: معرفتش نشعلها وغير حطيت يدي حرقتني ، راحت جابتلها la glace وحطتو على يدها
مريم: روحي يابنتي تقعدي .. الله يستر دوك السي حسام كي يجي واش يقول
ميرال: مراح يقول والو la faute فيا أصلا واش داني لحاجة خاطيتني ، راحت قعدت فبلاصتها وتخسر فوجهها بالوجع
مريم: انا كي قلتيلي توجديلو الفطور حسبت كل صبع بصنعة .. علابيها خليتك وحدك .. معليش ربي ستر وخلاص

كانو قاعدين شوية وسمعو حسو داخل ، مريم ناضت تترعد وحدها خايفة يبهدلها ولا ، وميرال غير تشوف تستنا فيه يطل ، طل عليهم من الكونطوار وهو متبسم
حسام: كاش ماكلة ؟ ، خبات يدها ميرال ورا ضهرها
مريم: اصبر عليا شوية دوك نوجدلك فطورك ، حرك راسو وراح عندها ، كانت غير ساكتة وتشوف بعينيها
حسام: شفتي الدار .. عجباتك ؟ ، تبسمت
ميرال: وي شابة
حسام: تحبي تبدلي كاش حاجة قولي .. راكي عارفة نتي مولاتها
ميرال: لالا كلش الله يبارك ، هز تفاحة عض منها
حسام: واشبيك ؟
ميرال: لا والو ، خزرت عند مريم .. روح تغسل كي تجي يكون لفطور واجد ، خزر فيها بشك ومشا رايح ...

...
فجهة وحدوخرة
كانو راقدين هو على كرشو وشاد الجمب الأيمن وهيا شادة الجمب ليسر مغمضة عينيها وحاكمة فكرشها ، من اللي طلع لفجر وخاطرها ضاير حتى تحرمت عليها النعسة ، شوية وجاتها الردة ناضت جارية راحت ل salle de bain 🚽 ترد ، بدا يتفاطن على صوت القياء ، غير ميز مليح ناض مخلوع تنفض من الفراش جاري للدوش
مروان: إيلصا !! ، حكملها شعرها اللور وهيا ترد ، غير فرغت داها غسلها وجهها ومسحو مشا بيها لداخل حطلها الريحة ... راكي مليحة ؟ ، حركت راسها بالشوية وجهها اصفر وباين عليها العياء .. راهي توجعك كرشك ؟
إيلصا: لالا ريحت شوية
مروان: بالاك البارح كي كليتي بزاف الماكلة ضرتك ، شافت معاه تخمم كيفاش تقولو
إيلصا: مروان... ، قاطعها كي جبدها مچودها تتكا فالفراش
مروان: ريحي .. دوك نقولهم يوجدولك حاجة تشربيها ، تبسملها وهبط لتحت وصاهم يطلعولها كاس تيزانة ، وهو حالتو حالة بلحفا ولابس شورط تاع النعاس شعرو مشعكك ، عاود طلع عندها لقاها مغمضة عينيها وحاكمة كرشها ، راح قعد قدامها يلعبلها بشعرها
مروان: حبيبي نجيب الطبيب يشوفك
إيلصا: لالا ، جات تتقعد وهو مدلها يدو تعاون بيها ، كتات ضهرها مع الفراش جات مقابلتو
مروان: ماكيش عاجبتني ومنهناش حتى نكونفيرمي من عند الطبيب بلي مكاين والو ، جا نايض حكمتو
إيلصا: اصبر والله راني مليحة .. غير خليني نهدر معاك زوج كلمات .. دايما تقصهالي فالنص .. خير ماتطلعلي منهدرش كامل حتى تشوف كرشي خرجت .. الله ، عقد حواجبو
مروان: ؟؟؟
إيلصا: شوف هاد الحوايج اللي راهم يصراو معايا طبيعيين .. واي مرأة فحالتي تتقيا بزاف .. دوخ .. تعيا .. تسخف (تتوحم)
مروان: المعنى ؟
إيلصا: ياربي واش من معنى .. راني بالحمل واش من معنى بخلاف هاد الشيء مروان
مروان: بالحمل ؟ .. راكي enceinte ! ، حركت راسها بايه متبسمتلو ، حط يد على راسو وواحد على صلبو رايح جاي ، ساكت يحوس يستوعب ، حتى نطق .. بصح تمتم لالا ؟ .. غير كيما كملنا شهر زواج
إيلصا: جبتو معايا .. تتقعد بيا دوكا مروان ، راح قعد قدامها وشدلها يدها
مروان: tellement منيش مأمن .. حق الله مكنتش متوقع نسمع هاد الخبر .. أنا راح نولي أب ، جبدها عندو حضنها وهيا تضحك .. معلاباليش واش ندير حاس روحي ضايع .. وفرحتي مخلطة مشي قادر حتى نعبر عليها .. علابالك هادا اسعد خبر جاني من بعد ما قبلتي تتزوجي بيا ، سكت شوية وهيا عينيها عليه حتى طاحت دمعة خفيفة من عينو خلات عينيها يغرغرو وهزت يدو تمسحهالو
إيلصا: علاش الدموع مروان ، تبسم
مروان: فرحتي ولحياة اللي كانت بالنسبة ليا حلم هادا شحال راني نعيشها
إيلصا: ربي مايخيب حتى واحد ، حرك راسو بايه
مروان: دوكا يامرتي راح نحبسو الزنق الدخلات والخرجات ونتكايسو على البيبي
إيلصا: إنشاءالله
مروان: نعرف نشاله ديالك
إيلصا: يالله نوض وصلني دوك نخبر ماما
مروان: صحاا ، جات نايضة مخطوفة حبسها .. واش قلنا ؟
إيلصا: نسيت .. مزلت موالفتش ، راحت تلبس وهو عساس عليها كون تزغد ولا يكون معاها ومخلاهاش تلبس الطالون ، المهم دار فيها حالة بسيف باش خرجو وهوما يتناقرو ...