جمعتنا القرابة *الجزء الثاني* (أنت قدري)

Partie 76

كملو يومهم الثاني فالعزاء وطلع كل واحد لبيتو ، راحت وجدان طلت على لورين اللي حكمتها الحمة ، بقات الليل كامل وهيا معاها حتى صبح الصباح ، كانت هبطتلها شوية
خارجة من عندها ميتة بالعياء والنعاس يدي ويجيب فيها ، وهيا داخلة سمعت صوت باب تفتح كانت كامي خارجة
كامي: صباح الخير
وجدان: صباح النور
كامي: راكي تباني مرقدتيش مليح
وجدان: مرقدتش كامل .. لورين باتت بالحمة حتى للصباح باش نقصت عليها شوية
كامي: ايااه مسكينة .. بالاك ضربها الريح ولا
وجدان: منعرف
كامي: ادخلي تريحي .. دوك انا نرجع نطل عليها
وجدان: تعيشي والله ، دخلت وجدان وكامي هبطت لتحت شافت الحالة وطلبت منهم يوجدولها الفطور باش طلعهولها
جات خدامة هازة سنيوة صغيرة ، شدتها عليها كامي وطلعت ، غير كملت الدروج أديم جاي بجهة الدروج هابط ، صبح عليها وباسها من راسها وخزر مع السنيوة
أديم: اوهااا ... رايحة تفششي الزوج الكريم بفطور للفراش .. ها الناس العايشة مشي المطايشة ، جا راح يهز حبة blueberry 🫐 كانت فوق pancakes 🥞 خبطتو ليدو
كامي: نحي يدك
أديم: حبة يما .. مشي مكتوبة فالدستور لازم ياكل 3 حبات blueberry كل صباح ، خزرت فيه بالشط
كامي: هادا مشي لباباك .. خاطر هوا خرج مقبيل ، جمع حواجبو
أديم: لإيلصا
كامي: لالا ، دار يدو على فمو مدهوش ، بضحكة
أديم: متقوليليش ليا .. اسعدي هاد النهار مبارك
كامي: حبس من الطنز ديالك .. هاد لفطور للورين راهي مريضة مسكينة باتت بالحمة .. عندها يومين واقفة على رجل بلا ماكلة .. ايا اني رايحة باش نوكلها بالسيف ، تبسم
أديم: بلعقل عليها .. لاتزيدي تقتليها بالماكلة ، خبطتو خبطة وراحت وهو تبسملها بصح كان محير عليها فنفس الوقت ، هبط لتحت وبقا قاعد حتى لحقو عليه بالواحد حتى من حسام من غير لورين ووجدان وإيلصا وتلمو على طابلة وحدة

صهيب: نكملو النهار تاع ليوم ونرجعو للدار .. لحياتنا العادية .. يما ماتت .. بصح بلاصتها مراحش تموت راح تبقا فقلوبنا .. بصح هادا ماراحش يمنعنا نكملو حياتنا عادي .. يعني اللي عندو خدمة يرجع يوقف عليها .. اللي عندو سفر الله يسهل عليه
ينيس: حنا كي كنا جايين ديسيدينا نبقاو هنا حتى تولد آيلا ويكبر شوية البيبي ومبعد يرحمها ربي
ماريا: صح ؟ ، حركتلها راسها مبتسمة بايه ... فرحتوني والله كانت بلاصتكم دايما باينة
راسم: وخدمتكم ؟
ينيس: أنا درت transfert لهنا للصبيطار اللي كنت نعدي فيه le stage .. وهيا اصلا مراهيش خدامة .. دارت pose
آرام: مليح تسما ماتلقاوش problèmes
ينيس: ايه
زاكو: ونتا مروان .. مراكش ناوي ترجع تستقر هنا ، حك راسو
مروان: والله مانكذب عليك .. بصح الدعوة مخلطة تما .. صعيبة شوية .. راك عارف تعاملاتي غير مع الشركات الكبيرة .. والدراير غالقة شوية
أديم: صح نتا تجيك شوية صعيبة .. بصح مع الوقت كي يكبر اسمك بزاف ميهمكش .. هوما يوصلو ليك وين ماتكون
مروان: هوما دوك وكون نرجع لهنا ويقعدو التعاملات كيما تما .. بصح انا متساعدنيش .. شغل الا كان التصدير 80% هنا يكون 60% وهادي حاجة ماشي فصالحي دوك
آرام: تقدر تقسم بين هنا وتم
مروان: بالاك مع الوقت
صهيب: نشاله ، ناض خارج موراه راسم ، اما زاكو فطلع لبيتو وصرب راح يشوف لورين ، وهوما بقاو قاعدين
ماريا: شحال مزالك تقعد هنا
مروان: خمس ايام هكاك .. بصح نرجع فالربعين
كامي: خصك مترجعش ، ضحك
دخلت عندهم وقعدت وهيا مشعككة
إيلصا: صباح الخير
كامي: صباح النور .. أشرف عيطلي كي مهزيتيش عليه ، غير سمع اسمو قلب عينيه
إيلصا: مشفتوش .. كنت راقدة .. دوك نعاودلو ، ناضت خارجة لبرا تهدر وهو باقي يشوف معاها راح يطرطق
أديم: يما راني نشوف هادا اشرف راه يدور بيها بزاف .. ماشي زدتو فيها شوية لالا ! ، كلامو طل على قلبو
كامي: الراجل يخدم معاها ودايما كيف كيف .. واصلا راهو جا من الباب لكبير حب يخطبها هيا كانت ترفضو
أديم: مادامها رفضتو يعني معاجبهاش .. علاش هاد الدخيص كامل
كامي: بكري مكانتش تقيمو چااع .. بصح دوكا شوية .. يعني بالاك رجع يعجبها .. خلي يتعارفو يقدرو يتفاهمو
أديم: الدخول ولخروج منحبوش .. جوزتها نهار دخلت فليل .. غمضت عينيا تاني كي كذبتي عليا .. بصح مراحش نزيد نجوزها ، دخلت على كلامهم مقاطعتهم
إيلصا: متخممش راح تكون بيناتنا حاجة رسمية بعد الربعين .. مديتلو فرصة برك بينلي بلي يستاهل وهادا واش نحتاج ، بقا يشوف معاها بلا مايرمش وهيا مخزرتش فيه même pas ، ناضت عندها كامي
كامي: قولي والله .. هادي حاجة تفرح فوسط هاد العزاء ، ناض عندها أديم
أديم: متأكدة ! ، حركت راسها بايه ، حضنها ... ربي يكتبلك اللي فيه الخير ، تبسمتلو
إيلصا: أنا نطلع نشوف لورين ، طلعت وهو عينيه متقلعوش منها ، اما كامي كون صابت تزغرت
ماريا: حيرتني كيفاش بدلت رايها تمتم
لونار: قالتك فالفرصة اللولة بينلها بلي يستاهل .. واش تزيد .. انا تبانلي الشخص المناسب هكا ميحتاجش يقعد يبينلك
آيلا: بصح يقدر تاني حكمت عليه فالمرة اللولة .. ممبعد ميتفاهموش
كامي: يتخطبو وساهل .. تما يتعرفو مليح .. وانا علابالي بلي راح يتفاهمو ، ناض ماشي ويتمتم
مروان: ادا عاجبك لهاد الدرجة عاودي بيه الزواج نتي..