جمعتنا القرابة *الجزء الثاني* (أنت قدري)

Partie 34

صباح السبت ، ناضو النساء بكري لأنو يعرفو فطوم ديرلهم محاضرة ، تلاقاو فالدروج مع ال 8 تاع الصباح النعاس فيهم
ماريا: هيا انا نحب فطوم بصح النوضة د 8 تاع الصباح فالويكاند ماوصاوش عليها
وجدان: اليوم برك السمانة الجاية والله لاني نايضة وخلي تهدر اللي تحب ، هبطو لتحت لقاوها قاعدة وتشرب فقهوتها
آزار: صباح الخير يما
فطوم: صباح النور ، بكرتو
كامي: ها فطوم النهار اللول نبداوه بالتبهدايل تاعك قدام الولاد وحنا قريب نديرو الأحفاد ، رشفت من كاسها
فطوم: خلاص مبقيتش نهدر علاش راكم تسمعولي محسوب راني نطبل غير فالهوا
ماريا: حاشة فطوم بصح هادي النوضة تاع بكري واللبسة كل وقت وقتو وكي ميكون عندك شغال مكان لاه تنوض بكري
فطوم: فشطارة اللسان وحدة متفوتكم
ماريا: خسارة عليك ، عيطت لمليكة ، مليكة حطيلنا نفطرو ، هزت براسها وراحت
كامي: انا نروح نوض أديم يوجد روحو باش يروح يجوز le examen تاعو

طلعت كامي وهوما بقاو يفطرو مع فطوم ويحكيو ، دقدقت ودخت لقاتو مكسل والوراق قدامو مبعثرين شي فالفراش شي فالأرض ، كان راقد بحوايجو مبدلهمش ، قربت عندو وهبطت باستو على راسو وبقات تسلكلو بيدها على شعرو ، بدا يتفاطن بالشوية يفتح فعيننيه ببطىء ، دار عندها شافها تبسم
أديم: صباح الخير
كامي: صباح النور
أديم: شحال راهي الساعة ؟
كامي: راهي ال8 ، نوض فغرضك اغسل وبدل واهبط تفطر واتلاقا مانك فطوم حشومة البارح زعفت عليك ، اوموان تصبح على دعاويها ربي يوفقك
أديم: شغل انا بيا فطوم منتلاقاهاش علابالك شحال عزيزة عندي ، ياو راجلك مخلاليش الوجه نقابل بيه كل يوم يبهدلني قدامهم تقوشي طفل صغير
كامي: علابالي زايد فيها بصح تاني راهو يخمم فصلاحك حاب يشوفك ناجح فحياتك
أديم: يماا مانغطيوش الشمس بالغربال راجلك عايش للناس ، بيه كيفاش يقولو وليدو ميخدمش فالشركات تاع باباه هادا ماكان
كامي: أديم عيب واش راك تهدر ماشي لهاد الدرجة صح غالط كيفاش يتعامل معاك وزيد قدامهم بصح يحبك واي حاجة تديرها وتنجح فيها يفرح كتر منك
أديم: كون جا صح يفرحلي كون خلاني نكمل le foot وندير واش حاب انا ماشي يمشيني كيما يحب
كامي: أديم باباك خاف عليك من الضربة نهار طحت على راسك خاف يخسرك م... ، قاطعها
أديم: خلينا الله يسترك مع صباح ربي منيش حاب نتفكر ، ناض وخلاها راح للدوش وهيا تنهدت وخرجت هبطت عندهم ، لقاتهم مزالو قاعدين يفطرو ويحكيو ، شافت معاها آزار
آزار: مزالو مزعف
كامي: اممم وراهو شاد لباباه وهادا اللي مخوفني ، نعرف أديم يصدر يصدر ونهار يكلاطي تما تخلا
آزار: لالا بعيد الشر الله لايوصل هاداك النهار اللي يلحق يتقابض مع باباه
كامي: آميين ، بصح حكاية le foot منساهاش وزادلو كل مرة راهو عgابو بقات قطرة ويفيظ كاسو ، تنهدت بصوت مسموع حتى شافو معاها
فطوم: خير على هاد التنهيدة
كامي: راح يشيب راسي يافطوم راح يشيب
فطوم: الوالد وبنو تاني ، طلعت راسها بمعنى إيه ، كملت فطوم تهدر ، واش وراجلك ميحشمش دوك ويخلي الطفل tranquille بزاف عليه
كامي: ارواحي نتي وفهميه انا نقولو كلش يجي بالهداوة متزيرش عليه راهو كيفك فالعقلية روح معاه درجة درجة وهو معكس
فطوم: متقلقيش خليه عليا انا نصوبو حاب يخرج الطفل من عقلو ولا ياك فاللول قعد وراه حتى حبس البالون دوكا واش حاب تاني
كامي: حابو يكمل قرايتو يشد بلاصتو
فطوم: عندو الحق يخمم فوليدو يشدلو بلاصتو مراحش يجو الناس ويخلفوه بصح بلعقل نعرفو يخرنن بزاف وادا حط ورا الحاجة خلات ، هوما يحكيو وهو هبط ، غير شافها تبسم
أديم: فطوووم ، ناضت عندو ودخلت فحضنو
فطوم: توحشتك يالحرايمي
أديم: مام انا توحشتك لعزيزة الغالية ، بعدت وشافت معاه
فطوم: كبرتو صدركم راهو قد الباب الله يبارك
أديم: ونقعدو صغار
فطوم: هههه لالا هاداك هو مازال تكبرو حتى هنا ، مستلو فمخو 🧠
أديم: مازال شوية هاداك ، ضربتو لكتفو
فطوم: اهيه علاش مجيتش تتلاقاني البارح عندي ماحلفت باش منسلمش عليك بصح كي شفتك مقدرتش
أديم: الله غالب القراية واكي تعرفي كون نراطي هادا وليد ختك يجيبني برا ويقلعني من le carnet de famille فمرة
فطوم: هههه يجرب وانا كاينة ، متديش عليه هوا هكا يبركك بزاف
أديم: امم يبركك برك حتى نكون ماشي بنو ومنعرفوش ، معليش
شاف مع ساعتو وناض
أديم: فطوم أنا نخليكم دوك لعشية نديرو فيها سهرة خلوي حسنة منخليوها الذنوب اللي بقاولنا نكملوهم لعشية ، ضحكت فطوم وهوما تاني
فطوم: متكبرش ، روح روح الله يسهلك ويفتحلك بيبان الخير ويبعد عليك ولاد الحرام
كامل: آمين ، باسها من راسها وفات باس امو وراح