جمعتنا القرابة *الجزء الثاني* (أنت قدري)

Partie 16

رجع آرام للدزاير وهي بقات فلندن تكمل شويا شغال وتلحق حتى هياا

.............................................

كان راقد على كرشو فدارو ما جايب خبر كان يرتح من تعب السفر ، حتى صونا تيليفونو مرة وزوج وخمسة ، فاق من غيبوبتو فاتح عين وحدة وغالق وحدة ، شاف مع التلفون لقاها يماه ، عاودلها وهو مازال ديخان بالنعاس
آرام: الو يماا
ماريا: تمويك الغمة هادا وين تفكرت بلي عندك يماك اه
آرام: غير الخير واش كاين تاني ؟
ماريا: واش كاين ! نتا اتخطب وانا نتحمل هبالها ياك كل دقيقة جاية عندي تبكيلي دايرتلي جنازة فالدار ، واش محتمة عليا !
آرام: واش صرا يالزح تاني
ماريا: شوف يا تصوب روحك مع خطيبتك وتكونو كي الناس يا تحبس عليا هاد التبهليل ماشي كل دقيقة جاية تشكيلي او زعكني او مهزش عليا التلفون ، شوف آرام هادي المرة اللولة واللخرة اللي نهدر معاك فهادا السوجي فهمتني ! يا تفريها نتا يا نفريها اناا ، غلقت عليه التلفون هو مازال ماشي مستوعب واش صاري
ناض فاسدلو دوش وبدل وخرج رايح للدار يفهم واش كاين

فالدار كانت قاعدة فالصالون معاها غير كامي وآزار ووجدان يسكتو فيها ، ميكدبوش ويقولو ماكرهوش منها لانو صح زادت فيها وسمطت بعمرها ، كانت هابطة وشادة فراسها
ماريا: واش مازال ماروحتيش ؟
نسرين: علاش طاطا ديرونجيتك !
ماريا: كرهتيلي حياتي برك ، خزرو فيها (كامي وآزار ووجدان باش تسكت) اما هيا ولا علابالها لانو معروفة اللي فقلبها على راس لسانها وزادت كرهت منها تسما ولات غير ترميلها فلكلام بصح هيا والو ، داخلة للدار ميتة بالعيا فاتت للصالون لقاتهم قاعدين غير دارت شافتها
لورين: يا بنعمي نتي كل نهار هنا واقيلا نوجدولك شامبرة باش ماتزيديش تشقاي تروحي لداركم ، ناضت عندها وجدان حكمتها من يدها
وجدان: بلعي نتي واش دخلك جات عند عجوزتها نتي واش من مرقة حرقتلك شواربك
لورين: ماما راكيش تشوفي فيها راهي حاسبة روحها عند la police كل نهار تجي تشكي على آرام وتكسر لطاطا ماريا فراسها ، سرارها هيا و الفيونساي تاعها كامل خرجتهم هادي كي تتزوج بيه alger كامل تسمع واش راهم يديرو ، دارت ليها
نسرين: واش من اسرار وحنا اصلا منحكيوش كامل حتى كي نعيطلو يهز عليا دقيقة ويغلق ، قلبت عينيها منها
ايلصا: ونتي كي راكي تشوفي فيه دايرلك هكاا وماشي مقيمك علاه مازلتي معاه ، (كانت داخلة للدار سمعتها تعاطي وتشاطي ايا راحت تشوف الأسطوانة لجديدة تاع نهار اليوم )
ماريا: ايه صح لمي شويا الكرامة اللي بقاتلك وحبسي من معاه بني هكاا مديور الله غالب حجرة ماتقدري تبدلي فيها ماتسمعلك ما والو ، هني راسك وهنينا معاك ، ناضت لعندها وانحنات على ركابها
نسرين: بصح يا طاطا نحبو وحبيت نتزوج بيه ، تنهدو كامل منها ، لورين هزت عمرها وراحت مغزلة  وايلصا بقات تشوف حايرة اذا صح كاين طفلة مذلولة قدهاا فالأرض
آزار: شوفي بنتي انا مدخلنيش بصح la relation تاعكم صح صماطت و مشكينش تكمل على الله كون تفريوها خير
ماريا: صماطت وصمطولي حياتي معاها ندمت على النهار اللي جبت فيه هاداك البغل وعلى النهار اللي خممت نزوجو ونجيب عروسة كيما هادي ، ماجات تكمل كان داخل عليهم للصالون شاف معاها لقاها جات جارية ليه (هو كان يسمع من برا) ، حكمها من يدها وخرجها ، ركبها فالطوموبيل وديمارا مقلع