جمعتنا القرابة *الجزء الثاني* (أنت قدري)

Partie 89/90

وصلو للريسطورون ، هبطو ، جا وحد الچارد دا عليه المفتاح وراح يچاري الطونوبيل ، اما هوما غير دخلو لقاو الشاف و les serveurs في الإستقبال ، قدم الشاف وانحنى وقدم يدو لمروان ، (الكلام باليابانية)

تاي: مرحبا بك سيد مروان .. كيف الحال
مروان: بخير .. شكرا ، اشار لإيلصا اللي كانت حالة فمها فمروان كيفاش كان يهدر معاه بطلاقة لغتو .. اعرفك على خطيبتي إيلصا ، مد يدو ليها
تاي: اهلا بك سيدة إيلصا .. تشرفت بمعرفتك ، مدتلو يدها وخزرت فمروان باش يترجملها ، بصح قدرت تفهم من الإنحناء تاعو اللي معروف بيه الآسيويين بلي راهو يرحب بيها
مروان: راهو يقولك ليه الشرف كي عرفك ، دارت ليه وتبسمت وردت بالإنچليزية
إيلصا: nice to meet you to ☺️ ، جبدها مروان بعد ما ستأذن وراح ماشي بيها للطابلة اللي موالف يقعد فيها ، جبدلها الكرسي باش تقعد وعاود ردو بيها وقعد مقابلها ، وهيا كانت تشوف مع التفاصيل تاع المطعم و les chef 🧑‍🍳 كيفاش كانو يطيبو لانو كان مفتوح تشوف كلش
إيلصا: يهبل le restaurant ، تبسم وحرك راسو للسارڤور باش يجي
مروان: انا راح نطلبلك واش نعرف ونتي دوقي ، حركت راسها بايه ، دار عند السارڤور اللي جااا .. جيبلنا ...

بعد مدة جابلهم طلبيتهم وتعمرت الطابلة حتى مالقاو وين يحطو ، دورت عينيها على الأطباق اللي كانو قدامها
إيلصا: قلت تجيب les plats اللي تعرف ماشي le menu كامل
مروان: دوقيهم راح يعجبوك كامل ، بدا يقدملها بلحاجة للطبسي ديالها ، ومرة مرة يوكلها بيدو وياكل معاهم ويحكيو تقول غير هوما فالمطعم معلابالهم بحتى واحد ، واللي لداخل كاين اللي كان يصور فيهم وكاين اللي يشوف معاهم عاجبينو وهوما ولا علابالهم

كلاو حتى شبعو وخرجو ، رايح يدور بيها خاطر هبلتو ، كانو ياكلو وهيا اديني لهاديك واديني لهاديك ..

عند الكوپل تاعنا الحزين اللي كل مايجي يفرح تتقلب لحكاية
خرجت من البيت وهيا وارمة بلبكا والنعاس ، حكمها الجوع ، راحت للكوزينة ، بقات تدور وفتحت الفريجيدار وبقات تتفرج معاه ، صح جيعانة بصح ماعندهاش النفس باش طيب ، عاودت غلقتو وجات خارجة ، وهيا تشوفو داخل لابس غير شورت ، جات مكملة رايحة لبيتها
أديم: راح نوجد العشاء ادا تحبي تقعدي تتعشاي ، دارت عندو متعجبة
لورين: نتا راح طيب ؟
أديم: لالا خيالي ، دار بظهرو ، راح جبد الحوت وبقا يدور هنا ولهيه وهيا واقفة مع الباب متكية راسها وتشوف معاه متبسمة ، متمنية هاد اللحظة متخلاصش وتبقا هاك ديما معاه

معلومة على le couple تاعنا ، لورين عندها مهما تكون مزعفة منك غير تهضر معاها عادي ولا تبلعطها ترجع كي شغل مكان والو ، المهم هيا مترجعلكش ، المرة الوحيدة اللي رجعت فيها هيا مع إيلصا ، اما أديم فهو من الناس اللي كي تزعف تهدر بلا شعور ، عندو غضب يهد الدنيا بصح كي يهدن ويتفكر واش قال يندم ويرجع عادي ، وهاد الحاجة اللي خلاتهم مكملين ويتصرفو عادي بعد كل خصام